KL

DK

Múte inuiaqatigiinni ataatsimoornissamik kaammattuivoq

Kalaallit Nunaat maanna USA-p præsidentissaanit Donald Trumpimit kimigiiserfigitinnermik nalaataqarpoq, taassumami piumasaraa Kalaallit Nunaannik piginnittuulernissaq nunamillu aqutsilernissaq. Naalakkersuisut siulittaasuat nunatsinni innuttaasunut ataatsimoornissamik kaammattuuteqarpoq. - Pingaaruteqarpoq - inuiattut amerlasuujunnginnatta - ataatsimoorluta nunarput siunissarpullu pillugit ataatsimoornissarput.

- Uagut inuiaqatigiittut nunarput pillugu aquummik tigumminnittuuvugut, namminerisatsinnillu nunatta siunissaa ilusilersussavarput, taamaappoq maanna, taamaassaarlu siunissami. Tamanna qulakkeersimaannassagutsigu ataatsimoortariaqarpugut siunnerfitsinnillu aalajangiussisimalluta.
Jensine Berthelsen
TUSAGASSIORTOQ
Saqqummersinneqarpoq

Naalakkersuisut siulittaasuat, Múte Bourup Egede, Erik Jensen, Naaja H. Nathanielsen, Erik Jensen aamma Vivian Motzfeldt peqatigalugit Danmarkimiipput, ilaatigut Danmarkip, Kalaallit Nunaata Savalimmiullu akornanni, nunanut allanut, Illersornissamut sillimaniarnermullu Ataatsimiititaliami ataatsimiittussaagamik.

Suleqatigiit siulittaasuuffik paarlakaattarpaat, januaarillu tamaasa nikittarlutik, taamaattumik Danmarkimit Savalimmiut siulittaasuuffimmik tigusisussanngorput ataatsimiinnermi, tallimanngornermi ingerlanneqartussami.

Attaveqaqatigiinnermut ataatsimiititaliaq tassaavoq ataatsimoorluni naapeqatigiiffik, Kalaallit Nunaannut Savalimmiunullu immikkut pingaaruteqartunik sulianik samminnittarfik.

Qularutigineqanngilaq ulluni kingullerni pisut ilanngullugit oqaluuserineqarumaartut, ataatsimiititaliami ataatsimiinnermi imaluunniit/aamma naalagaaffeqatigiinneq pillugu ataatsimiinnermi, Mútep, Mettep Akselillu kisimik ataatsimiiffigisaanni.

Trump kimigiiseraluartoq Naalakkersuisut siulittaasuat eqqissisimavoq

Trumpip kimigiisernera apeqqutaatinnagu, kontaktudvalgi aamma nunat pingasut siuttui nangittumik nunat taakku pingasut ataatsimoorussamik suliassaannik suliaqarnerminnik ingerlatsiinnarput.

Naalakkersuisut siulittaasuat, Múte Bourup Egede (IA) eqqissisimavoq, ulluni kingullerni USA-p tulliani præsidentiata, Donald Trumpip, kimigiisernera pissutigalugu pingaartumik avatitsinni uivernertut ittumik aalassattoqaraluartoq, Trumpimmi kingullertigut nalunaarutigimmagu sakkutooqarnikkut nukinik atuinissani tunuarsimaarfiginaviarnagu, tamatumalu saniatigut akitsuusersuinikkut sorsunneq atorlugu piumasani anguniarniarlugu oqaaseqaraluartoq.

- Paasisinnaavara innuttaasunik ernumanermik pilersitsisimassappat, uanili pingaaruteqarpoq ataatsimoornissarput, aamma ilutsinni akerleriissutaasinnaasut unitsillugit ataatsimoorluta nunatsinnik sullissinitta nanginnissaa.

- Matumani aamma eqqaamassavarput nunat tamalaat akornanni suleqatiginnikkatta aamma isumaqatigiissuteqaratta, tamanna tatigisariaqarparput ineriartortittariaqarlugulu, aamma USA-mik annertunerusumik suleqateqarnissaq ilanngullugu. Iligiippugummi, aamma taanna aallaavigaarput.

Isumaqatigiinngissutit salliunnagit ataatsimoorneq salliunneqarli

Nunatsinni Inatsisartunut qinersisoqassaaq kingusinnerpaamik apriilip arfernani. Taamaattumik nunatta partiivi assigiinngitsut qineqqusaarnissamut piareersimapput aallartikumisaalereerlutillu, qineqqusaarnerni nalinginnaasumik pisuni, isumaqatigiinngissutigisat akerleriissutigisallu pissutaallutik assortuunnerit pisinnaasarput.

Naalakkersuisut siulittaasuat partiit qineqqusaarnerminni qanoq ingerlasinnaanerat akuliuffigerusunngikkaluarlugu, nunami ataatsimoornissamut kaammattuivoq:

- Inuiaqatigiit ikittunnguuvugut, pingaaruteqarpoq partiit assigiinngissuteqaraluartut, nunarput siunissarpullu pillugit ataatsimoornissarput, ulluni kingullerni pisut kingunerisaanik uippallertutut pissuseqarata. Qularutiginngilara oqaloqatigiinnerput aqqutigalugu suleqatigiinnerput nangissagipput, nunatta iluani aamma avatitsinni suleqativut peqatigalugit, Naalakkersuisut siulittaasuat naggasiivoq.

kalaallit nunaat inuiaqatigiit donald trump naalagaaffeqatigiinneq samfund usa

ATORFIIT Se alle jobs

Powered by Labrador CMS