Múte: Maanna nunat tamalaat iliuuseqartariaqarput
- Amerikamiut sakkortuumik pinngitsaaliiniarnerat Kalaallit Nunaanni inuiaqatigiinnut maanna ima sakkortutigaaq, qaffasinnerpaamik inissisimalluni. Kalaallit Nunaanni partiit ataatsimoornerat iluaqutaanngilaq, naaggaaraluarnerput iluaqutaanngilaq aammalu diplomatiimik oqaloqatigiinniaraluarluni misiliinerit iluaqutaanngillat. Maanna nunat tamalaat iliuuseqartariaqarput, Inuit Ataqatigiit siulittaasuat, Múte Bourup Egede, kaammattuivoq.
- Kalaallit Nunaanniit amerikamiut paasitinniarsarigaluarpagut, inuiaqatigiittut inniminartuunerput namminerlu oqartussaanerput, tamannali minnerpaamilluunniit ataqqinagu kimigiisernertik sakkortusiartuinnarpaat. Iliuutsigut Trump-ip aqutsisoqarfianut sunniuteqanngillat, akerlianilli ullut tamaasa kimigiiserlutik sakkortusiartuinnavipput, maannakkullu nunarsuarmiut, minnerunngitsumik ikinngutigisagut ikinngutigiittut ikiuuttariaqalerput, Múte Bourup Egede (IA) oqarpoq.
Assi: Oscar Scott Carl
Inuit Ataqatigiit siulittaasuat isumaqarpoq inatsisinik atuutsitsisinnaasunik, innuttaasut sinnerlugit iliuuseqarsinnaasunik Naalakkersuisoqalernissaq pisariaqartinneqarluinnarmat:
- Diplomatiimik demokraatiskimillu naalakkersuinikkut periarfissat tamaasa misileereerpagut, kisianni tamakku tamarmik Donald Trumpimut naalagaaffiullu aqutsisuinut Kalaallit Nunaat pigilerniaraluarlugu aqussinnaalerniaraluarlugulu siunertaqartunut saaffiginnikkaluarnigut sunniuteqanngillat. Taamaattumik ulorianartorsiornerput paasisariaqarparput, minutsillu tamaasa pingaaruteqartorujussuusut paasisariaqarparput, amerikamiut nunatsinnik piginnittoorusinnerat piviusunngortinnaveersaarniarlugu, tamannalu pillugu inatsisinik atuutsitsisinnaasunik innuttaasullu sinnerlugit iliuuseqarsinnaasunik Naalakkersuisoqarnissarput pisariaqartipparput, Múte Bourup Egede (IA) oqarpoq.
Iligisagut sumiittunuku?
Múte Bourup Egede isumaqarpoq naalagaaffiit naalakkersuinikkut tamat oqartussaanerannik tunngavilimmik ingerlatsisut, pingaartumik Kalaallit Nunaata iligisai, Kalaallit Nunaannut tapersersuillutik nalunaaruteqarnissaminnut ersarissumik iliuuseqanngitsut:
- Kingusinnerusukkut amerikamiut, alliérigaluagut ikinngutigalugillu, tatigilluinnarsinnaasimagaluarpagut, qanittumik suleqatigiilluartarsimalluta. Inuiaqatigiittut ataqqinnillutillu suleqatigiilluartarsimavugut, ukiuni amerlasuuni attatiinnarusullugit. Kisianni piffissap tamatuma qaangiutereernera paasissavarput, amerikamiut aqutsisuisa nutaat soorunami soqutigisaqanngillat, massakkut kisimi pingaaruteqarpoq nunarput tigusinnaalerniaraluarlugu, Múte Bourup Egede oqarpoq nangillunilu:
- Aap, nunat killiit iligiillutik suleqatigiittut ikioqatigiittarlutillu sutigut tamatigut, kisianni maanna USA-mi præsidentip aqutsinerani tamanna allanngorpoq. Taamaakkaluartoq nunat iligut allat suleqatigisartakkagullu aammalu ikinngutitut isigisagut toqqortertutut pissusilersorput, taamaallaallu isussunngiluatsiaannarlutik teqeqqunnguamilu inissisimasuusinngiluatsiaannarlutik uagutsinnut tapersersuinertik oqaatigisarpaat, tamannali aamma sunniuteqanngilaq, taamaammat nipituumik ersarissumillu tapersersuilinngippata, ullut tamaasa ajornartorsiut annertusiartuinnassaaq, amerikamiullu kimigiisernerat annertusiartuinnassaaq, taamaattumik suleqatigisartakkatta ikinngutittalu erseqqissumik tapersersuinertik oqaatigisariaqarpaat, Múte Bourup Egede Sermitsiamut oqarpoq.
Mike Waltzip ersersinniagaa paatsuugassaanngilaq
Múte Bourup Egede innersuussivoq tikeraarniat "inuttut" tikeraassanerartut, tassa vicepræsidentip nulia, Usha Vance malittaasalu, saniatigut Donald Trumpip isumannaallisaanermut siunnersortaa Mike Waltzip ilaanissaa maanna ilimanarluinartoq.
Bourup Egede isumaqarpoq tamanna ersarissumik peqqusaarnerusoq , aammalu tamanna navianartuusoq:
- Maanna navianartorsiornitsinni qaffasissutsimut pivugut, tassanilu politikkerip nuliata tikeraarniarnera naviananngitsutut isigineqarsinnaanngilaq ajoqutaanavianngitsutut isumaliorluni. Tassami ingiallortissaa isumannaallisaanermut siunnersorti Kalaallit Nunaanni suniartoruna? Siunertaq tassatuaavoq pissaanermik uagutsinnut takutitsiniarneq, ersersinniagaallu paatsuugassaanngilaq, Trumpip tatigilluinnagaa qaninnerpaamillu siunnersortigalugu suleqataa, nunatsinniinnermigut amerikamiunut ersersitsissaaq Trumpip siunertaanik suli annerusumik upperinnilersitsilluni, tikeraarnerullu kingorna kimigiisernerat suli sakkortusiartussaaq, taamaattumik Naalakkersuisut aalajangiisinnaasut inuiaqatigiillu sinnerlugit siuttuusinnaasut pisariaqartippavut, Inuit Ataqatigiit siulittaasuat, Múte Bourup Egede, naggasiivoq.
