Múte: – Nunatta karsia isumannaatsumik paarissavara

Naalakkersuisut siulittaasutut siuttuunermini, 2021-imiit maannamut nunatta karsia sinneqartoortoq tunniuttarnikuuaa.

Maannakkut nammineq, Jens-Frederik Nielsen (D) sulisitsisoralugu, nunatta karsianik isumaginnittussanngorpoq. Tassami Múte Bourup Egede (IA) aningaasaqarnermut akileraartarnermullu Naalakkersuisunngorpoq:

- Sulilernissara qilanaareersimavara aamma nunatta karsia isumagilluassavara, aningaasallu karsimi uninngaannartinneqaratik inuiaqatigiinni sulisinneqarnissaat qulakkeerniarlugu sulissaanga. Aningaasammi inuiaqatigiit aningaasaataat, naalakkersuisooqatigiinnissamut isumaqatigiissut naapertorlugu, inuiaqatigiinni tamarmi ineriartornermut iluaqutaasussanngorlugit sulisinneqassapput.

- Naalakkersuisooqatigiinni isumaqatigiissutigaarput inuiaqatigiit aningaasaataat pitsaasumik, mianersortumik minnerunngitsumillu inatsisit naapertorlugit aqunneqarnissaat isumagissallutigu, pisortat ingerlatsiviisa aningaasanut inatsisip timitalersorneqartarnerani isumaginnilluarneq ilanngullugu. Tamatuma saniatigut aningaasatigut iliuuseqartoqarnissaanik pisariaqartitsisoqalersillugu siumut naatsorsuutiginngisanik pisoqartarsinnaanissaa sillimaffigisatsinnut ilaavoq, tamannalu aamma periarfissaassaaq.

Múte Bourup Egede naqissusiivoq Naalakkersuisut ukioq manna aningaasanut inatsit naapertorlugu ingerlasussaasut, taamaalillunilu nutaanik iliuusissanik piareersarnissamut periarfissaqarluarpoq, Inatsisartut nutaat ukiakkut siullermeerlutik aningaasanut inatsisissartik akuersissutiginninnissaasa tungaanut.

- Isumannaatsumik aningaasaqarnikkut aqutsineq innuttaasut tatigisinnaassavaat

Suliassat inuiaqatigiinnut aalajangiisuusinnaasut aammalu qinersinissaq sioqqullugu isumaqatigiinngissutaasarsimasut suliarineqartarnissaannut tunngatillugu naalakkersuisooqatigiilertut qanoq ilillutik paaseqatigiillutik ingerlariaqqiffissarsiortassanersut, assersuutigiinnarlugu akileraartarnermut tunngatillugu aaqqissuusseqqinneq aaqqissuusseqqinnerillu allat aningaasatigut iliuuseqarfigineqartariaqartut pillugit, Múte Bourup Egede akivoq:

- Tamanna assut qilanaaraara, tassami naalakkersuisooqatigiinnissamut isumaqatigiissummi isumaqatigiissutigaarput politikkikkut iliuusissat assigiinngitsut oqaluuserisassallugit, siunertaralugu pitsanngorsaanissaq aamma nutaanik iliuusissanik aallartitsisarnissaq, aningaasaqarnikkut ineriartortitsinissamut iluaqutaasussanik. Assersuutigalugu aningaasaqarnikkut inuiaqatigiinni kaaviiartitsisarneq qanoq pitsanngoriartinneqarsinnaanersoq aamma iliuusissat nutaat qanoq isumannaarneqartassanersut isumaqatigiissuteqarpugut. Tamatuma saniatigut pingaarnerpaassaaq innuttaasut aningaasaqarnikkut kiffaanngissuseqarnerat aamma toqqissisimanissaat pillugu annertusaanissap ilusilerneqarnissaa. 

Aningaasaqarnermut akileraartarnermullu naalakkersuisunngortoq naggataatigut erseqqissaavoq naalakkersuisooqatigiit pitsaasumik tatigeqatigiinnermillu aallaavilimmik oqaloqatigiilluartarnerat akimmiffinnik pilersitsinani periarfissanik nutaanik ammaassisassasoq nammineq isumalluarfigigini:

- Suleqatigiilluarnissarput pillugu pitsaasumik anersaaqarpugut, taamaattumik qularinngilara aaqqiissutissanik pitsaasunik attanneqarsinnaasunillu nassaarsinnaasugut, unammilligassanut assigiinngitsunut tunngatillugu, aamma aningaasaqarnikkut aqutsinermut politikkikkut qanoq iliuuseqarnissatsinnut  ersarissumik aalajangersaanikuuvugut najoqqutassatsinnik, tassa inuiaqatigiit aningaasataat politikkikkut qanoq aqunneqassanersut aamma aqutsinikkut qanoq ingerlanneqassanersut, aningaasaqarnermut aamma akileraartarnermut Naalakkersuisoq, Múte Bourup Egede (IA) oqarpoq.

Múte Bourup Egede, aningaasaqarnermut akileraartarnermullu Naalakkersuisunngornermi saniatigut, Naalakkersuisut siulittaasuata tulliatut aamma toqqagaavoq.