KL

DK

Mútep Inatsisartunut qinersinissaq nalunaarutigaa - Inatsisartut isumaqataapput

Inatsisartut siulittaasuata Inatsisartut ataatsimiinnerat maanna unitsikkallarpaa. Inatsisartuni partiit aalajangiiffigisussanngorpaat Inatsisartunut qinersineq qaqugu pissanersoq.

Múte B. Egede.
Thomas Munk Veirum
Journalist
KASSAALUK KRISTENSEN
Digitalredaktør
Saqqummersinneqarpoq

Obs: Inatsisartut nal. 16.20 ataatsimiinnertik nangippaat. Allaaserisaq nutarterneqarpoq.

Inatsisartut ataatsimiinnerat nal. 15.30 tungaanut unitsikkallarneqarpoq.

Inatsisartunut qinersineq pissaaq 11. marts 2025.

Facebookimini ima allappoq:

- Piffissanngorpoq inuiaat kalaallit Inatsisartunut qinersinissaat. Suaaruteqarninnullu Inatsisartut akuersissappata tamanna pissaaq 11.marts.

- Piffissaq imaannaanngitsoq aatsaallu taamak unammillernartigisoq nunatut nalaapparput. Piffissaanngilaq avissaartuunnissarput. Suliassaqarpugummi annertuunik nunarput pillugu suleqatigiinnissamik katersuuffissarsiornermillu pisussaaffiliisunik. Nukissaqarluarpunga illit nuanarpullu sullisissallutit aamma siuttuuffigeqqissallusi, allappoq.

Partiit avataanit aningaasaliiffigitinnissaasa inerteqqutaalersinnissaannut siunnersuut akuerineqareersorlu Múte B. Egede Inatsisartut ataatsimiinnerat unitsinneqarallassasoq piumasaqarpoq.

Sapaatit akunneri arfinilinni qineqqusaarnissamut piumasaqaat malinnagu

Inatsisartut qinersinissamut ulluliunneqartiq akuerissappassuk, taava kommuninut qinersinissamut, 1. april, sapaatit akunneri pingasut sioqqullugit Inatsisartunut qinersisoqartussanngussaaq.

Inatsisartut nal. 16.20 ataatsimeeqqilerput, Múte B. Egedelu oqalugiarnermini ulloq qinersivissaq siunnersuutigaa.

Múte B. Egede qinersinissamik nalunaaruteqarnermini oqalugiartoq.

Taassuma ilisimatitsissutigaa qineqqusaarnissamut sapaatit akunneri arfinillit piumasaqaataasartut tikinnagit, qinersinissaq siusinnerusumut inissikkusullugu.

- Maanna pissutsit immikkut illuinnartut pissutigalugit, siusinnerusukkut qinersisoqartariaqarpoq, Múte B. Egede oqarpoq.

Qinersinissamut nalunaaruteqarnermi ulluliunneqartoq pillugu partiit oqaaseqartartui aamma naliliinerminnik oqaaseqarput.

Oqaaseqartut siullersaraat Mariane Paviasen Jensen (IA). Taassuma tupaallannanngitsumik Naalakkersuisut siulittaasuata siunnersuutaa isumaqatigaa.

- Tamat oqartussaanerata nalliussineqarnissaanut piffissanngorpoq, Mariane Paviasen Jensen oqarpoq.

Taassumunnga tulliulluni Siumumeersoq Karl Tobiassen oqaaseqarpoq. Siumup ulloq qinersinissamut siunnersuutigineqartoq aamma isumaqatigigaa, Tobiassen ilaliivoq. Taanna qinigaaffimmi suleqatigiissimaneq pillugu qujassuteqarpoq.

- Naalakkersuisunngortussanut oqarumavunga, piffissami tullermi suliassat imaannaanngitsut suliarineqartussanngormata, Tobiassen oqarpoq innersuussutigalugulu nunat tamalaat akornanni sillimaniarnikkut pissutsini tatisimaneqarneq.

Brobergip pisinnaatitaaffiit oqaluuserai

Naleqqameersup Pele Brobergip kalaallit pisinnaatitaaffii oqalugiummini eqqaavai:

- Tusartareerparput nunatta siunissaa kalaallit namminneq ilusilersussagaat. 

- Kalaallit inuiaqatigiit salliutinneqartariaqarput, Pele Broberg oqarpoq qinersinissamullu ulluliussaq aamma taperserlugu.

Jens-Frederik Nielsenip Demokraatineersup nuannaarutigaa qinersinissaq nalunaarutigineqarmat, qinersinissamullu ulluliunneqartoq aamma ilalerlugu:

- Politikkikkut suliniutit nalunaarutigineqarnissaannut qilanaarpugut, silaannaq salinneqarniassammat, Jens-Frederik Nielsen oqarpoq neriorsuillunilu peqqinnissaq inuussutissarsiutillu partiip sulissutigissagai.

Atassutip siulittaasuata torersumik qineqqusaartoqarnissaa neriuutigaa

Oqaaseqartussat kingullersaattut Atassutip siulittaasua Aqqalu C. Jerimiassen oqaluttarfimmut qaqivoq. Taassuma torersumik qineqqusaartoqarnissaa neriuutigaa:

- Qinersisartunut tamanut oqassaagut: Illit taasinerit tullippit taasineratulli isumaqartigaaq, Aqqalu C. Jerimiassen oqarpoq, torersumillu qineqqusaartoqarnissaanik kissaassilluni.

Mimi Karlsenip ilisimatitsissutigaa Inatsisartut qinersisoqareerpat katersuuteqqissasut.

Qinersinissamut ulluliussatut siunnersuut partiit tamarmik isumaqatigimmassuk Naalakkersuisut siulittaasuat nuannaarpoq.

- Tamassi qujaffigerusuppassi, aamma illuatungiliuttut, Múte B. Egede oqarpoq.

Inatsisartuni siulittaasup, Mimi Karlsenip (IA), naggasiullugu ilisimatitsissutigaa Inatsisartunngortussat qinersinerup kingorna katersuukkumaartut.

inuiaqatigiit inatsisartut múte b. egede samfund valg til inatsisartut 2025

ATORFIIT Se alle jobs

Powered by Labrador CMS