Mútep kajumissaarutaa: Suliassat peqatigiilluta kivitsigit

Partiip siulersorneqarnerani katitigaaneq maanna allarluinnaq tunngavigineqarpoq. Partii aalajangerpoq siulersuisuni ilaasortat nunarput tamakkerlugu siammarterneqassasut, tamannalu aaqqippaat malittarisassanik allannguuteqartitsinermikkut.

Ulluinnarni aqutsisut saniatigut, partiip aalajangerpaa siulersuisut sinniisaasa ilusilersugaanerat allanngortinneqassasoq.

Partiimi aalajangerpoq siulersuisuni ilaasortat kommuninit tallimaasunit aggerfeqassasut, aammalu siulersuisuni ilaasortaq ataaseq inoqarfinnit mikinerusuniissasoq aalajangerneqarluni.

- Ukiut arlaqartut siulersuisut katutitaagerat siammarneqarnerussasoq kissaatigisimasarput maanna piviusunngortinneqarpoq. Soorunami pissanganarpoq partiimut siulersuisut sinniisaasa nutaat ilusilersugaanerat partiitsinnut qanoq kinguneqassanersoq, aamma politikkikkut suliassatsinnut tunngatillugu, partiimi siulittaasumik qinigaaqqittoq Múte Bourup Egede oqarpoq.

Aningaasartuutit amerliartortut - isertitat ikiliartortut

Siulittaasumik siulersuisunillu qinersineq sioqqullugu aamma oqaluuserisassatut saqqummiunneqarpoq partiimut akileraarutitut qinikkat akiliutigisartagaat.

Siulersuisuunerit ataatsimiittarnerminni ajunngitsorsiaqartinneqalissasut aammalu siulersuisuunerit ataatsimiikulanerulissasut kiisalu sineriammi tunuliaquttaminnut tikittarnerat akulikillisinneqassasoq aalajangiunneqartunut ilaapput. Taamaakkaluartoq, tassa aningaasartuutissat amerligaluartut aamma siunnerfigineqarpoq partiimut akileraarutitut qinikkat akiliutigisartagaat annikillisinneqassasut.

Tassungali tunngasutigut oqallinneq unitsinneqarpoq Nivi Heilmann Efraimsen (ullormi tassani kingusinnerusukkut aaqqissuussaanermut akisussaasussatut siulittaasumut tullertut qinigaasoq) piumasaqarpoq partiimut akileraarutip appartinnissaanut kingunissaasut takutinneqassasut, taassumalu innersuussutigaa iliuusissatut aalajangersakkat aningaasartornerulernermik kinguneqartussat ilanngullugit naatsorsuisoqassasoq. Suliarlu taanna siulersuisuuninngortunut suliassanngortinneqarpoq.

Politikkikkut suliaqarneq aamma isertitaqarnerulernermik pisariaqartitsiviuvoq

Partiip iluani suliassat annertusineri aningaasaqarnikkut isertitassatigut unamminartuuinnanngillat, aammali  politikkikkut atugarissaarnerunissamik naligiinnerulernissamillu suliaqarnermi siunnerfiit aningaasartornerulissutaasut matussuserneqarnissaat suliassaavoq:

- Nunatsinni nammaqatigiinnikkut  isertitaqaqatigiiaat pitsanngorsaaviginissaat sulissutigaarput, tamatumali ilutigisaanik aamma suli unammilligassarpassuaqarpoq aaqqinneqarnissaminnut utaqqisunik.

- Nunatsinni isumaginninnikkut aningaasaqarnikkullu qajannartumik inissisimasortavut pitsanngorsaaviginiarlugit tamaviaarpugut, tamatumalu ilutigisaanik ilinniartitaanermik qaffassaanermik peqqinnissaqarfiullu kiffartuussineranik pitsanngorsaanissamik sulissutiginnittarpugut, tamakku tamarmik aningaasartuuteqarnerulersippaatigut. Taamaattumik suliffeqarnikkut inuussutissarsiutitigullu ineriartortitsineq annertusartariaqarpavut, tassa isertitassat  pilersitsisarnissat  aamma qitiutittariaqarpagut pitsaasumik isumaginninnikkut atugassarititaasut qaffassarnerisut, Múte Bourup Egede oqarpoq.

Inatsisartunut qinersereernerup kingorna suleqatigiinnissamut ammavoq

Maannakkut nutaanik aallartisaanissamut piffissaq kingullerpaatut oqaatigisariaqarpoq, tassami piffissaq qinersivik manna naangajalerami , taamaammat aamma ulapputtoqartoq qularutissanngilaq qinersivik naatinnagu isumannaarusutat imaaginnavimmata, qinersinermi tulleq pissaaq kingusinnerpaamik apriilip arfernganni 2025.

- Siumumik suleqateqarlusi  allannguinernik sulianillu annertuunik  aallartitsisimavusi, suli ilai naammassineqanngitsut, tamannna taava isumaqarpa Siumumik nangittumik suleqateqarnissamik siunertaqarluni IA sassassasoq?

- Naamik, suleqatigiilluarnerput iluarisimaarparput assigiinngissutsitsinnillu ataqqinnilluta, qinersisartulli tassaapput aalajangiisussat qanoq inatsisartoqarnikkut naalakkersuinikkullu aqutsisoqassanersoq qinersinerup kingorna, tamannalu tamakkiisumik soorunami ataqqivarput. Taamaattorli oqaatigissavara suleqatigiinnissamut ammavugut, tassami tamatta pitsaanerusumik inuiaqatigiinnik sullisserusuppugut, taamaattumik qinersinerup kingorna isumaqatigiinniarnerni qanoq pisoqarnissaa takujumaarparput.

- Kisianni partiit mikinerusut suleqatigisarsimagaluarpasi, pinerillu tamaasa avissaartarlusi, ersarinnerusumik isummersinnaavit?

- Naamik, inuiaqatigiinni demokraatiskiusumi inuuvugut, tassanilu qinersisut aalajangissavaat qanoq siulersuisoqarnissartik kissaatiginerlugu, taamaallaat oqaatigisinnaavara IA-p siuttuunerata ingerlaqqinnissaa uagut qulakkeerniarparput, aammalu naqissuseqqiinnasssavara suleqatigiinnissamut tamanut ammagatta.