Silap pissusianut tunngasunik ataatsimeersuarneq isumaqatigiissuteqarfiunani naammassisoq

Nalunaaquttap akunnerinik 44-nik qaangeereernermi COP31-mi silap pissusianut tunngasunik ataatsimeersuarnermi siulittaasup isumaqatigiissuteqartoqannginnera nassuerutigaa.

COP31-mi silap pissusianut tunngasunik ataatsimeersuarneq qitiusumik isumaqatigiissuteqarfiunngitsumik naammassivoq.
Saqqummersinneqarpoq

Aatsaat taama sivisutigisumik isumaqatiginninniareerlutik nunarsuarmi nunat COP31-mi silap pissusianut tunngasunik ataatsimeersuarnermi, qaqutigoortumik immikkoortut pingaarnerpaani isumaqatigiissuteqarnani naammassisumi, isumaqatigiissuteqarnissaq taamaatippaat. 

Tamanna COP31-mi siulittaasoq Tyrkiamiu Murat Kurum Antalyami sapaammi ualikkut ataatsimeersuarfimmi nassueruteqarpoq. 

- Oqaasertat uku isumaqatigiissutaannginnerat paasivara. Tamannalu tunngavigalugu aalajangiussat uku akuerineqanngillat, taanna oqaluttarfimmit oqarpoq. 

Tassani aaqqissuisut Tyrkiameersut Australiameersullu nunarsuarmi mingutsitsinngitsunut ikaarsaarnermi siuariartornissamut periarfissaq pingaarutilik maangaannartinneqartoq oqaluttuaraat. 

Aaqqissuisut sapinngisartik tamakkerlugu misiliisimanerat, isumaqatiginninniarnerillu arlaleriarlutik ingerlanneqaraluartut, siunnersuutillu nutaat saqqummiunneqaraluartut isumaqatigiissuteqarnissaq iluatsinngitsoortoq, COP-imi siulittaasup erseqqissarpaa. 

Taamaalilluni silap pissusianut tunngasunik ataatsimeersuarnerup ilaa pingaaruteqarnerpaaq nunat peqataasut 200-ngajaat akornanni ataatsimut isumaqatigiissuteqarnani naammassivoq. 

”Cover dicision”-imik taaneqartoq, silap pissusianut tunngasunik ataatsimeersuarnermit politikikkut oqariartuut pineqarpoq. 

Tassani EU nunallu 130-t naggatissaa tikillugu orsussat imerpalasut atorunnaarsikkiartortinneqarnissaasa isumaqatigiissummut ilanngunnissaa ilungersuutigigaluarpaat. 

Tamannali iluatsinngilaq. 

Taamaalillunilu EU sapaammi siusinnerusukkut oqaaseqaat itigartinniarlugu nalunaarpoq. 

- Kingumut sammisumik isumaqatiginninniarnissaq akuerinianngilarput. COP-imi orsussat imerpalasut mingutsitsinngitsunngortinniarneqarnerat akuerinianngilarput, Irlandimi klimaministeri Darragh O'Brien ataatsimeersuarfimmi oqarpoq. 

Taama nalunaaruteqarsimatsiartoq Tyrkiap COP-imi siulittaasuutitaata ataatsimeersuarnerup ataatsimut isumaqatigiissuteqarnani naammassineqarnera nassuerutigaa. 

Silap pissusianut tunngasunik ataatsimeersuarnerit isumaqatigiissutaat aalajangersakkanik sulinermilu malitassianik ukiumit ukiumut ingerlaqqittunik untritilikkaanik imaqartarput. 

Taamaammat suli aalajangiussanik assigiinngitsunik arlalinnik aalajangersaasoqassaaq. 

Pappiarali pingaaruteqarnerpaaq, "cover decision", ukioq manna akuerineqassanngilaq. 

Danskit klimaministeriata Samira Nawap assersuummik takutitsisoqassasoq sapaammi erseqqissaatigaa. 

- Ullumikkut killiliivugut. Nunat uuliamik tunisassiortut nunarsuarmi silap pissusaanut politikimik naalagarsiortitsiniarnerat akuerinianngilarput, Samira Nawa Ritzauimut oqarpoq. 

Suleqatigiinnerup nunarsuarmi silap pissusaa pillugu aallartitaqarnikkut sulinerup aallarteqqinnissaa pisariaqartoq takutikkaa, ministerip kingorna nassuiaatigaa. 

- Sulinermik aallartitseqqinnissaq pisariaqarpoq, tassanilu sooq nunarsuaq tamakkerlugu peqataasut uunga katersortittarnerigut isiginiassavarput, taanna oqarpoq. 

Kingullermik Københavnimi COP15-mi silap pissusianut tunngasunik ataatsimeersuarneq assingusumik inerneqarpoq. 

Tassanilu isumaqatigiissutip aalajangersimasup akuersissutigineqarnissaa isumaqatigiissutigineqarsinnaanngilaq, silaannaallu pissusaa pillugu aningaasalersuinissamut politikikkut pituttuisuunngitsumik naatsumik oqariartuut taamanikkut naammagiinnarneqartariaqarpoq. 

RITZAU

Powered by Labrador CMS