Kittat ukiunik 45-nngortorsiorpoq: Kalaallisuut pillugit ilisimasat nittartakkamiilissapput
Kittat nittartagaanut iserluni kalaallisuut immikkuualuttui assigiinngitsut qanoq suliarineqartarneranik ilitsersuuutit siunnersuutillu takuneqarsinnaalerumaarput.
- Ilisimasatta katersornissaat tamanillu takuneqarsinnaalernissaat kissaatigaarput. Ammerinerup assassornerullu qaqugumorsuaq kingorngunneqarnissaa siunertaraarput – manna periuserineqartuniit ineriartornermut, Kittani, Ammiamiimi aamma Amitsialammi aqutsisoq, Aviaq Reimer Olsen oqarpoq.
Assi: Oscar Scott Carl
Novembarip 29-ani 1981-imi Nuummi Kittat siullerpaamik ammarpoq. Taamani Kittat arnarnut suliffeqanngitsunut suliassaqartitsiniutitut neqeroorutaavoq. Taamanerniilli ammerineq ileqqutoqqallu malillugit amernik suliaqarneq Kittani pingaarnertut suliarineqalerput.
Ukiut 45-t qaangiunneranni kalaallit assassoriaasaannik piujuartitsinermi, ingerlatitseqqiinermi ineriartortitsinermilu Kittat pingaaruteqarluni ineriartorsimavoq, kalaallisuuliornermik ileqqutoqqallu malillugit ammerineq immikkut sammisarineqarlutik.
Pingasunik immikkoortortaqarfeqarput, Kittat Nuummiittoq, Ammiamii Kapisilinniittoq aamma Amitsialak Qeqertarsuatsiaaniittoq.
45-nngortorsiornermut atatillugu Kittat nittartakkamik nutaamik, www.kittat.gl-imik saqqummiivoq. Kittat sullissinnermini neqeroorutai, kalaallisuut pillugit paasissutissat aamma nittartakkakkut pisiniarfimmi kalaallisuuliornermi atortussat innuttaasunit takuneqarsinnaallutillu pisiarineqarsinnaassapput.
Kommuneqarfik Sermersooq tusagassiorfinnut nalunaarummi taama allappoq.
Ilisimasat tamanit takuneqarsinnaassapput
Atortussat ajornannginnerusumik pissarisarineqarsinnaalernissaannit annertunerusumik anguniagaqarpoq. Piffissaq ungasinnersoq eqqarsaatigalugu nittartagaq qarasaasiakkut ilisimasanik katersivittut ineriartortinneqassaaq, kalaallisuut immikkoortui assigiinngitsut aamma assassornermi periutsit sukumiisumik nassuiarneqassallutik. Kalaallisuut immikkoortuinik assigiinngitsunik mersornermut Ilitsersuutit akeqanngitsut siunnersuutillu, ungasinnerusoq eqqarsaatigalugu aamma ineriartortinneqassapput.
- Ilisimasatta katersornissaat tamanillu takuneqarsinnaalernissaat kissaatigaarput. Ammerinerup assassornerullu qaqugumorsuaq kingorngunneqarnissaa siunertaraarput – manna periuserineqartuniit ineriartornermut, Kittani, Ammiamiimi aamma Amitsialammi aqutsisoq, Aviaq Reimer Olsen oqarpoq.
Kittat oqaluttuarisaanerat amernut, mersornermut aamma kalaallisuuliornermut kisimi tunngassuteqanngilaq. Inuit, ataatsimoorneq ilisimasallu kinguaariinnut ingerlateqqinneqartartut aamma pineqarput. Taamaammat ukiut ingerlanerani pilersinneqarsimasut siunissamilu ineriartortinneqartussat Kittat 45-nngortorsiornerani nalliuttorsitigineqarput.
Tamannalu tallimanngornermi novembarip 27-ani nalunaaqutaq 13.00-miit 17.00-ip tungaanut nalliuttorsiutigineqassaaq, tassami Kittat Nuummi illuutiminut kaffisoriaqqusivoq. Ilutigisaanik katersugaasivik akeqanngitsumik ammassaaq Kittat pillugu immikkut ittumik saqqummersitsinertalimmik.