Kalaallit Nunaanni assammik arsarnermi Bankivik pingaarnerpaatut aningaasaliisartunngortoq

TAAK-p Bankiviullu aningaasaliisarnermut ukiuni pingasuni isumaqatigiissutaat, Kalaallit Nunaanni assammik arsarnermik tamanik, inuusuttuaqqanit nunanut allanut unammisartunut angajullernut, ilaqassaaq. Tamanna nuna tamakkerlugu arsartartunut isiginnaartartunullu periarfissanik nutaanik misigisaqarnissamillu periarfissiissaaq.

Aningaasaliisutut pingaarnerit ilaattut nunanut allanut unammisartut atisaanni Bankivik logoqarpoq.
Saqqummersinneqarpoq

Bankivik TAAK-lu pingaarnertut aningaasaliisutut nutaamik isumaqatigiissuteqarput, taanna decembarimi 2026-miit novembarimi 2029-mut atuutissaaq. Isumaqatigiissummi kalaallit assammik arsartartui nukittorsarniarlugit aamma meeqqat, inuusuttut inersimasullu timersornermik ataatsimoorfissaannik nuna tamakkerlugu ineriartortitsinissamut Bankivik nukittorsaarusuppoq.

Bankivik aamma TAAK tusagassiorfinnut nalunaarummi taama allapput.

- Assammik arsarnerup nunatsinni isorartoqisumi innuttaasunik qanillisitsillunilu katersuuffiusarnera qasseeriarluta takoreerparput. Tassuuna immitsinnut qanillisarpugut, peqatigiilluta tulluusimaarutissaqalertarpugut, misigisassarpassuarnillu tunineqartarluta. Meerartatta inuusuttattalu peqatigiinnermik annertuumik pissarsiffigisarpaat, tassuunalu kivitseqatigiinneq, imminnut akisussaaffigeqatigiinneq, pissutsillu imaannaanngikkaluaraangata tunniutiinnannginnissaq ilikkartarpaat.

- Naleqartitat tamakku Bankivimmi pingaartitaraagut. Naleqartitammi tamakku unammisarfiup avataani aamma iluaqutaasarput, inuiaqatigiittullu ataqatigiinnitsinnut nukittorsaataallutillu patajaallisaataassallutik. Taamaammat Kalaallit Nunaanni assammik arsarnermut tapersersuinerput tulluusimaarutigaarput, timersornerullu Nunatsinni peqatigiinnernik nukittuunik pilersitsisarneranut ikorfartueqataarusulluta, Anne Nivíka Grødem, Bankivimmi nunatsinni pisortaq taama oqarpoq.

Aningaasaliineq nuna tamakkerlugu atuuttoq

Aningaasaliissutit ukioqatigiiaanut tamanut atuupput – meeqqat inuusuttullu najukkami assammik arsartartut akornanniit angutinut arnanullu nunanut allanut unammisartunut. Tapersersuinerup siammasissumik apuunnissaa, Kalaallit Nunaannilu assammik arsartarnerup nukittorsarneqarnissaanut iluaqutaanissaa Bankivimmut pingaaruteqarpoq. Pingaartumik siunissami assammik arsartartussanut pitsaasunik atugassaqartitsinissaq immikkut ukkatarineqarpoq.

- Bankiviup Kalaallit Nunaanni assammik arsartartunut pingaarnertut aningaasaliisunngornera nuannaarutigalugu tikilluaqqungaarparput. Siammasissumik tapersersuerusuttumik aningaasaliisoqarnissaq assorsuaq pingaartipparput – unammisartunit nukarlernit nunanut allanut unammisartut ilanngullugit. Suleqatigiinnissatsinnut qilanaarpugut, naatsorsuutigaarpullu assammik arsarnermut pitsaasumik tunngaviliissasoq, nunalu tamakkerlugu meeqqanut inuusuttunullu suli amerlanerusunik periarfissiissasoq, TAAK-mi siulittaasoq Carsten Olsen taama oqarpoq.

Bankiviup ilisarnaataa ilaatigut nunanut allanut unammisartut unammiarnermi atisaanni ilisarnaatigineqalernissaa aningaasaliisartutut pingaarnertut isumaqatigiissutimmi ilaavoq. Aningaasaliinermut isumaqatigiissut arnat nunanut allanut unammisartut decembarimi Canadami VM-imut anngunniunnissaannut atatillugu saqqummiunneqassaaq. Tassani 2027-mi VM-imut, anngunniunnermi peqataasinnaanissamut nunanut allanut unammisartut unammisussaapput.

Bankivimmut isumaqatigiissut ukiuni pingasuni suleqatigiinnissamut aallarniutaavoq Kalaallit Nunaannilu assammik arsartarnerup ineriartortinneqarneranut pitsaasumik sunniuteqarnissaq anguniagaavoq.

Powered by Labrador CMS