Naak nannut arlalitsigut ajornartorsiutaasaraluartut, pisassiissutit attanneqarniarput

Naalakkersuisut aalajangiissappata, siornamut sanilliullugu Kitaani nannuttassiissutit allanngussanngillat. Tunuli pillugu ilisimatuussutsikkut inassuteqaat utaqqimaarneqarpoq, tamannalu Tunumi pisassiissutinik qaffaanermik appaanermilluunniit malitseqarsinnaavoq. 

Nannut nerisassarsiorniarlutik nunaqarfinnut illoqarfinnullu qanillattortarmata, Tunumi Kitaanilu suli ajornartorsiutaajartuinnarput. Piujuartitsinermilli tunngavilimmik ingerlatsissagaanni piniarneqarnisa sakkortusinissaat iluaqutaanavianngitsoq, tusarniaanermut saqqummiussami allassimavoq.

- Kinguaariinnut tulliuttussanut pisassatigut isumalluutit atorneqarnissaat attatiinnarsinnaajumallugu, uumasoqatigiit killilersukkat pillugit uumassuseqarnikkut siunnersuinernik Naalakkersuisut pissarsiniartarput. Siunnersuineq uumasoqatigiinnut ataasiakkaanut atatillugu suliarineqartarpoq, uumasoqatigiillu qanoq amerlatiginerat, uumasoqatigiinni ataasiakkaani uumassuseqarnikkut pissutsit, piniarneqarnerata sakkortussusaa aamma sumiiffinni uumasut siumorneqarfigisinnaasaanni uumaniarnikkut atugassarititaasut apeqqutaatinneqartarlutik. Piujuartitsineq tunngavigalugu piniarneq attassinnaajumallugu, siunnersuinermi uumasoqatigiiaanik ataasiakkaanik piniarneq qanoq sakkortutigisoq ingerlanneqarsinnaanersoq nalilerneqartarpoq.

- Nannunut atatillugu Canadap, Nunavut aamma Kalaallit Nunaata akornanni nanoqatigiiaat ataatsimoorunneqartut pillugit pingaarnersiuilluni tunngavissiaq malillugu Ilisimatuussutsikkut suleqatigiissitaq (Scientific Working Group) kiisalu piujuartitsineq tunngavigalugu atuinissamut Pinngortitaleriffik aqutsisunut siunnersuisartuupput.

- Ukiut tamaasa nanoqatigiiaat immikkoortut tamaasa pillugit ukiumoortumik pisassiissutinik Naalakkersuisut aalajangiisarput, uumassusillillu pillugit siunnersuineq ukiunut arlalinnut atuuttuusartoq tunngavigineqartarpoq, kingullerlu tassaavoq 2017-imeersoq, Kitaanut piffissami 2018-2026-mut atuuttussaasoq.

Aamma ilisimatitsissutaavoq ilisimatuussutsikkut inassuteqaatip saniatigut "nunat tamalaat isumaqatigiissutaasa aamma piniartut atuisullu ilisimasaasa eqqarsaatigineqarnissaat, kiisalu Piniarneq pillugu Siunnersuisoqatigiinni ilaasortat kommunillu tusarniarneqarnissaat Naalakkersuisut pisussaaffigaat. Ilaatigut pingaarnertut kattuffiit attuumassutillit aamma Piniarnermut Siunnersuisoqatigiit ilaasortaat kiisalu innuttaasunik ataatsimiisitsinerit aqqutigalugit, kiisalu siunnersuineq sioqqullugu uumasut piniagaasut pillugit misissuinikkut atuisut ilisimasaat ilanngunneqartarput." 

Aappaagumut pisassiissutit ima isikkoqarput:

Ukiup siuliani pisassiissuteqarfiusumi (2024-mi) pisassiissutinik sippuisoqarsimassagaluarpat, aqutsiveqarfimmut pineqartumut pisassiissutinik agguaassisoqareernerata kingorna taakku ilanngaatigineqassasut, Naalakkersuisut ilisimatitsipput.

Tusarniaanermut piffissaliussatut ulloq ataasinngorneq novembarip sisamaat 2024 Naalakkersuisunut killigitinneqarpoq, tassungalu oqaaseqaateqartoqarsinnaavoq.