Qallunaat naalakkersuisui naalagaaffiup
immikkoortortaqarfianik pilersitsiniarlutik juulli sioqqullugu nalunaarput,
taannalu Danmarkimi kalaallit naligiimmik pineqarnissaat pillugu suliniutinik
ataqatigiissaarisussatut akisussaaffigineqassaaq.
Aamma inuiaqatigiit
suliniutaannut aningaasaateqarfik, isummiussereertarnerup
immikkoortitsisarnerullu akiorniarnerannik tapersersuisussaq, pilersinneqassaaq.
Qallunaat naalakkersuisui naalagaaffiup
immikkoortortaqarfianik pilersitsiniarlutik juulli sioqqullugu nalunaarput,
taannalu Danmarkimi kalaallit naligiimmik pineqarnissaat pillugu suliniutinik
ataqatigiissaarisussatut akisussaaffigineqassaaq.
Aamma inuiaqatigiit
suliniutaannut aningaasaateqarfik, isummiussereertarnerup
immikkoortitsisarnerullu akiorniarnerannik tapersersuisussaq, pilersinneqassaaq.
Nangaaneq pillugu isornartorsiuineq
Naalagaaffimmi suleqatigiinnik pilersinnissamik suliniut naalakkersuisut ammip
qalipaataanik immikoortitsinermut iliuusissatut pilersaarutaannut ilaavoq,
taannali suli saqqummiunneqanngilaq. Iliuusissatut pilersaarut ukiut marluk
affarlu suliarineqareersimavoq, tamannalu pissutigalugu Christiansborgimi
partiit arlallit, ilaatigut Inuit Ataqatigiit (IA), naalakkersuisut
nagaanerarlugit isornartorsiorpaat. Iliuusissatut pilersaarut Folketingimi
kingullermik decembarip 17-ani apeqquteqaat tunngavigalugu oqallinnermi
oqaluuserineqarpoq, tassanilu IA-mi ilaasortaq Aaja Chemnitz ilaatigut ima
oqarpoq:
NAALAGAAFFIMMI IMMIKKOORTORTAMUT 1,8 MILLIONIT KORUUNIT
2025-mi
aningaasaqarnermut inatsimmi kalaallit Danmarkimiittut naligiimmik
pineqarnissaat pillugu 1,8 mio. koruunit naalagaaffiup immikkoortortassaanut
immikkoortinneqarput. Naalagaaffiup immikkoortortassaa nunanut allanut
akulerutsitsinermullu ministereqarfimmiissaaq. Naalagaaffiup
immikkoortortaqarfissaa suliassaqarfinnut assigiinngitsunut
ataqatigiissaarisuussaaq, suliallu kalaallit Danmarkimiittut naligiimmik
pineqarnissaannut tunngasut suliarissavai. Aamma aningaasanik inuiaqatigiit
suliniutaat suliniutillu Danmarkimi kalaallinut isummiussereernermik
immikkoortitsinermillu akiuinermut tapersersuisinnaasunik
immikkoortitsisoqarpoq. Danmarkimi naalakkersuisut 2025-mi 400.000 koruuninik
2026-milu annertoqataannik immikkoortitsinissaq siunniuppaat.
”Ammip qalipaataanik immikkoortitsinermut
iliuusissatut pilersaarut ukiuni arlalinni suliarineqarsimavoq, sulinerullu
nalaani ministeria allanngortinneqarpoq. Danmarkimi allamik nagguilinnik
nikaginnittoqartoq naalakkersuisut nassuerutigimmassuk nuannaarutigaara,
naalakkersuisulli suliamik ingerlatitseqqiiniarlutik nangaanerat
qularnanngilaq. Kalaalerpassuit tamanna nammineq misigisimavaat. Suliffiup
iluani immikkoortitsineq, pisortat oqartussaasuinik naapitsinermi ammillu
qalipaataanik immikkoortitsilluni oqaaseqartarneq pineqaraangata. Oqaaseq
”grønlænderstiv” (kalaallisut aalakoortoq, aaqq.) qallunaat oqaasiinik
qinerlerfissiaannut ilanngunneqarnikuummat inunngorfiullu tunngavigineqarnera
ullumikkut suli malunnartarmat tamanna pissutsit aaqqissuussaaneranni
ajornartorsiummut aaqqiiffigisariaqartumut uppernarsaataavoq”, oqaaseqartartoq
oqalugiarnermini oqarpoq, tassanilu naalakkersuisut iliuusissatut
pilersaarutaani suliniutit siunnersuutigineqartut Aaja Chemnitzip
”viinnitoqqanik puiaasanut nutaanut puukkanik” aamma taavai.
Aaqqissuussamik ammip qalipaataanik immikkoortitsineq
Aaja Chemnitz naapertorlugu danskit naalakkersuisui
akisussaaffeqarnerusariaqarlutillu aaqqissuussaanermi unammilligassanut, soorlu
Danmarkimi kalaallit meerartaannik pinngitsaaliissummik
arsaarinnissuteqarnermut, aaqqiissutissanik nassaartariaqarput.
Danmarkimi kalaallit pillugit allamik
nagguilimmik uumissuineq amerlanernit ilimagineqartumit nalinginnaanerusoq
nunanut allanut akulerutsitsinermullu ministerip Kaare Dybvad Bekip
nassuerutigaa.
„Tamanna sumiluunniit nalinginnaanngilaq,
Danmarkimilu naalagaaffeqatigiinnermi kikkut tamarmik eqqortumik pineqarnissaat
akisussaaffigaarput. Tamanna anguniarlugu aalajangersimasumik
ataqatigiissumillu iliuuseqartoqartariaqarpoq, tamannalu naalagaaffimmi
immikkoortortamik nutaamik pilersitsinikkut anguniarparput,“ Kaare Dybvad Bek
oqarpoq.
