Naalakkersuisoq akisoq: Annamut inassutigissavara inassuteqaatit atuaqqullugit

Nakorsat pingaaruteqarluinnartut atorfiinik atorunnaarsitsinermut allaffeqarfiullu atuivallaarneranut Naalakkersuisut isertuussipput, taama Anna Wangenheim, peqqissutsimut tunngatillugu Demokraatit oqaaseqartartuat isumaqarpoq.

Anna Wangenheim naapertorlugu Qaanaami, Upernavimmi, Uummannami, Qasigiannguani, Qeqertarsuarmi, Maniitsumi, Paamiuni, Ittoqqortoormiini, Narsami, Nanortalimmi aamma Qaqortumi aalajangersimasumik nakorsaqanngilaq.

Aalajangersimasunik nakorsaqannginneranut peqqinnissaqarfinnut ajortumik kinguneqartoq, innuttaasullu inuunerannut sulisunullu atugassarititaasunut nanertuutaasoq, taanna isumaqarpoq.

Naalakkersuisup isornartorsiut ilisarisinnaanngikkaa

Peqqissutsimut Naalakkersuisup Agathe Fontainip Anna Wangenheimip nakorsat atorfiinik atorunnaarsitsisoqarsimaneranik isornartorsiuinera ilumuunnginnerarpaa. 

Agathe Fontain isornartorsiummut akissuteqartinniarlugu Sermitsiap attavigaa. Naalakkersuisullu akissummini tikkuarpaa illoqarfinni taaneqartuni nakorsat atorfiinik atorunnaarsitsisoqanngitsoq.

Naalakkersuisoq Agathe Fontain nassuiaavoq aalajangersimasumik atorfinitsitsisarnerit qaammatit 12-it sinnerlugit atorfinitsitsinernut taaguutitut atorneqartut. Taamaattumik tamanna piffissami sivikitsumi nakorsanik atorfinitsitsinertut paasineqassasoq. 

- Nakorsatut atorfilinnik pingaarutilinnik atorunnaarsitsineraaneq eqqunngilaq, allaaserisami illoqarfinni saqqummiunneqartuni. Sulisussarsiortarnermik uninngaannartitsiniartarnermillu ajornartorsiuteqarneq Kalaallit Nunaannut taamaallaat atuutinngilaq, nunarsuarli tamakkerlugu atuulluni, Agathe Fontain Sermitsiamut allappoq.

- Ilisarisinnaanngilara

Anna Wangenheim aamma isumaqarpoq Naalakkersuisut aatsaat taama qaffasitsigisumik atuisoqarnissaanik aammalu aningaasanik atugassanik sippuisoqarnissaanik akuersisimasut, naak allaffeqarfimmi sulisunut aamma taartaagallartutut tikisitanik taaneqartartunut nakorsiartarfinni sulisunut kingunissaasut imaannanngikkaluaqisut. 

-  Aalajangersimasumik sulisorisat sumiginnarneqarput siunissartik qanoq ingerlassanersoq ilisimanagu, tamannalu peqqinnissaqarfimmi sulisut akornanni nalorninermik pakatsinermillu pilersitsilluni.

Tamannali Naalakkersuisup ilisarisinnaannginnerarpaa:

-Allaffissornerup aqunneqarsinnaajunnaarluni annertusiartornerarneqarnera aamma uanga ilisarisinnaanngilara. Amerlanerit ilisimassagunarpaat, Peqqissutsimut Ataatsimiititaliarsuarmi ukiunut arlalinnut peqqissaarutarujussuarmik suliaqarsimammata. Naalakkersuisunut immikkut ittumik ilisimasallit atorfillillu, ataatsimiititaliarsuarmit tassanngaanniit inassuteqaasiorsimasut tatigineqarput. Tamanna tunngavigalugu inassuteqaatit, Peqqinnissaqarfimmi peqqissutsimillu suliassaqarfinni allani tapertaqarnissamut aqutsinissamullu tunngatillugu suliaqarnissamut politikkikkut tunuliaqutaqarluarnissaq qulakkeerparput.

- Anna Wangenheimimut inassutigissavara, inassuteqaatit, Naalakkersuisut nittartagaanni pissarsiarineqarsinnaasut atuaqqullugit.

Ajuusaarnartorujussuuvoq

Peqqissutsimut Naalakkersuisup Anna Wangenheimip Demokraatineersup Naalakkersuisut nipaarsaarussinerarlugit isornartorsiuinera akillugu isornartorsiuivoq. 

- Demokraatit peqqissutsimut isumaqatigiissummut ilaarusunngimmata ajuusaarnartorujussuuvoq. Peqataasimagunik suliat pillugit isumasioqatigiinnernut aallarniutaasunut, tamatumalu kingorna Peqqissutsimut Isumaqatigiissutip imassaasa isumaqatiginninniutigineqarnissaannut peqataanissamut periarfissaqarluaraluarput.

- Isumaqatigiissutigisinnaasarput aallaniutigeriartigu: ukiuni makkunani tamatta peqqinnissaqarfipput sakkortuumik tatineqarpoq, aamma siunissamut qaninnerusumut ungasinnerusumullu malunnaatilimmik pitsanngorsagassaqarnissaa pisariaqartinneqarpoq! Taamaattumik Demokraatit pqqinnissaqarfiup unammilligassaanut ataatsimut aaqqiissutissanik nassaarnissamut pissarsiffiulluartumik tapersiinissaminnut soqutiginninngingaarnerat assut tupigaara, Agathe Fontain, Peqqissutsimut Naalakkersuisoq allappoq.