Naalakkersuisoq kommuninut angalalersoq
Meeqqanut, inuusuttunut ilaqutariinnullu naalakkersuisoq kommuninut tamanut tikeraarnissani sapaatit akunnerani matumani aallartissavaa. Isumaginninnikkut suleqatigiinnerup pitsanngorsarneqarnissaa angalanermi anguniarneqarpoq.
Mads Pedersen kommunit Naalakkersuisullu akornanni oqaloqatigiinnerulernissaq suleqatigiinnerulernissarlu anguniarlugit kommuninut angalavoq.
Assi: Naalakkersuisut
Kommunit Naalakkersuisullu isumaginninnermut tunngasuni suleqatigiinnerat pitsanngorsarneqartariaqartoq meeqqanut, inuusuttunut ilaqutariinnullu naalakkersuisuusoq nutaaq Mads Pedersen (IA) isumaqarpoq.
Taamaattumik kommuninut tamanut angalanissani aallarnerlugu Kommune Kujallermut ataasinngornermi aallassaaq.
Mads Pedersenip pulaagassaasa ilaagaat ulloq unnuarlu paaqqinnittarfiit, tassani ulluinnarni suliarisartagaat unammilligassaallu paasisaqarfigissallugit. Sumiiffinni borgmesterit pissutsit suleqatigiinnissamillu periarfissat eqqartorniarlugit aamma ataatsimeeqatigissavai.
Meeqqat naapinnissai aamma anguniarpai, taakku isumaat pisariaqartitaallu tusarusullugit oqaloqatigerusullugit:
- Kommunit tikeraarnissaanut innuttaasunillu naapitsinissannut qilanaarpunga. Suleqatigiinnernut tamanut tatiginninneq tunngaviusuuvoq taamaammallu naapinnissarput oqaloqatigiinnissarpullu aalajangiisuuvoq, Mads Pedersen angalanissaq pillugu tusagassiorfinnut nalunaarummi allappoq.
Mads Pedersenip kommunini unammilligassat suleqatigiissutiginissaat oqaloqatigiissutiginissaalu salliuppai. Sannginnerpaasut tapersersorumallugit oqartussaasoqarfiit innuttaasut pisariaqartitaannut aallaavigisaannullu eqqarsaasersorfigineqarlutillu tulluarsarneqassasut kissaatigai, aamma meeqqanik inuusuttunillu inissiisarneq kingullertut periarfissaassasoq naqissuserlugu.
