Naalakkersuisoqarfiup unioqqutitsilluni suliariumannittussarsiortoqarsimaneraanerit ilumuunnginnerarai
Nuummi inissiat ilaata blok 2-p silataata iluarsartuunneqarnissaanut suliariumannittussarsiuussinermi inatsisit naapertorneqarput. Namminersorlutik Oqartussat unioqqutitsilluni suliariumannittussarsiortoqarsimaneraanernik inoqatinut attaveqaatitigut siammarterisoqareernerani taama erseqqissaapput.
Blokkimik iluarsartuussineq misiliilluni suliniutaasoq, Ineqarnermut, Attaveqaatersuutinut Isorliunerusunullu Naalakkersuisoqarfik nassuiaavoq erseqqissaatigalugulu tamatumunnga unioqqutitsilluni suliariumannittussarsiortoqarsimaneraanerit ilumuunngitsut.
Foto: Selvstyret
Ineqarnermut, attaveqaatersuutinut Isorliunerusunullu Naalakkersuisoqarfiup Nuummi inissiat ilaata blok 2-p silataata iluarsartuunneqarnissaanut unioqqutitsilluni suliariumannittussarsiortoqarsimaneraanerit eqqortuunnginnerarpai.
Namminersorlutik Oqartussat qitiusumik sanatitsisutut inissisimanera Ineqarnermut, Attaveqaasersuutinut Isorliunerusunullu Naalakkersuisoqarfiup isumagisaraa, taamaalillunilu Namminersorlutik Oqartussat nutartigassanik neqeroortitsisarnerinut akisussaalluni.
Suliassap ’Nuummi blok 2-p qaliaanik, igalaavinik, silataatungaanillu nutarterineq’ neqeroortitsissutigineqarnera inatsit atuuttoq naapertorlugu pisimannginnerarneqarluni, taamaattumillu ileqqorlunnerusoq inuit attaveqatigiittarfiini saqqummiunneqartoq, Naalakkersuisoqarfik paasitinneqarpoq. Tamanna ilumuunngilaq.
Suliariumannittussarsiuussinermi inatsisit malinneqarsimanersut taamaappallu suliariumannittussarsiuussinermi qanoq periuseqartoqarsimanersoq, Nusukap tassa Nunaqavissut Suliffiutillit Kattuffiata naalakkersuisoqarfimmut allakkatigut ammasumik apeqqutigaa.
Nunaqavissunit iluarsartuunneqartariaqaraluartoq
Inissianik assingusunik siunissami iluarsartuussinissamut ilisimasanik misilittakkanillu katersisoqarsinnaaqqullugu suliaq taanna Nusukamit oqarnerat naapertorlugu nunaqavissut suliffeqarfiutaasa ilaannut tunniunneqarsimasariaqaraluarpoq.
Blok 2-lli silataata iluarsartuunneqarnera misiliilluni suliniutaasoq, naalakkersuisoqarfiup nassuiarpaa:
- Siunissami taamak ittut neqeroortitsissutigineqarnissaanni periarfissaq, naleqqussuserlu qulaajarumallugit periuseq aalajangersimasoq, atortussat, suliarineqarneralu misilittarneqarnissaat siunertaralugu Blok 2-mik nutarterineq misiliutaavoq.
- Misiliutaasumik suliniummik nalilersuineq pitsaassappat, Namminersorlutik Oqartussat ilaqutariinnut arlalinnut illuutaasa amerlanerusut nutarterneqarnissaannut nunami tamarmi assinganik neqeroortitsisoqassasoq naatsorsuutigineqarsinnaavoq.
