Naalakkersuisoqatigiinnissamut isumaqatigiissut: Naalakkersuisunngortut suut isumaqatigiissutigaat?

Naalakkersuisut nutaat saqqummiunneqaqqammerput, taamaalillunilu partiit sisamat Demokraatit, Siumut, Inuit Ataqatigiit aamma Atassut naalakkersuisoqatigiinnissamut isumaqatigiissutaat nutaaq saqqummiunneqaqqammerluni.

Isumaqatigiissutip "Ataatsimoorfigaarput Kalaallit Nunaat toqqissisimanartoq kiffaanngissusilik siuariartortorlu" qulequtaraa.

Isumaqatigiissutip ilaa ataani atuarsinnaavat.

Kalaallit Nunaat pigaarput

USA-p præsidentiata Donald Trumpip Kalaallit Nunaannik piginnittoorusulluni aqutserusullunilu qaammatini kingullerni oqariartuuteqarluni tatisiniartarnera isumaqatigiissutip aallaqqaataani atuarneqarsinnaavoq:

- Naggataatigullu Kalaallit Nunatta uatsinnik pigineqarnera qularutigineqassanngilaq. Nammineq siunissarput uagut aalajangissavarput. Uagut nammineerluta suleqatissatsinnik toqqaassagut. Taamaaliornitta sukkassusaa nammineerluta aalajangissavarput.

- Ingerlalluarnitsinni assoralisimaarfitsinnilu ataatsimoorluta inuiaanerput nunaanerpullu nunarsuarmut takutissavarput. Inuttut ataatsimuussuserput immikkoortuni ataasiakkaani politikikkut isumaqatigiinngissutsinit pingaarnerutinneqassaaq.

Namminiilivinneq

Qineqqusaarnermi namminiilivinnissaq oqallisaangaatsiarnikuuvoq.

Naalakkersuisoqatigiinnissamut isumaqatigiissummi allassimavoq § 21-mik isumalioqatigiissitap sulinini nanginnissaa suliaminillu naammassinninnissaa qulakkeerneqassasoq.

Innuttaasut peqataatinneqarnissaat qulakkeerneqassaaq, suliarlu paasissutissanik tunngaveqartumik ingerlanneqassasoq naalakkersuisoqatigiit nutaat isumaqatigiissutigaat.

Qinigaaffimmi susassaqarfiit angerlaanneqarnissaat sulissutigineqassasoq aamma allassimavoq, aamma Naalakkersuisut Danmarkimik isumaqatiginninniarnermik aallartitsissapput uku anguniarlugit:

- Kalaallit Nunaata Danmarkillu kiisalu kalaallit qallunaallu tamakkiisumik naligiissinneqarlutillu assigiimmik naleqartinneqarnissaat pillugu paaseqatigiinneq isumaqatigiissuteqarnerlu. Naalagaaffeqatigiit naligiissut suleqatigiinnerat pineqassaaq.

- Siunissami aningaasaqarnikkut suleqatigiinnermut isumaqatiginninniarnerit piviusorsiortut aallartinneqassapput, tassani Kalaallit Nunaanni ineriartornermik pilersitsinissaq pillugu aningaasaliinerit pisariaqartut ilanngullugit.

- Namminersorneq pillugu Inatsisip nalilersorneqaqqinnissaa siunertaralugu pilersaarusiornermut piumasaqaatit suliarineqassapput.

Aalisarnermut siunnersuisoqatigiit pilersinneqassasut

Nunami inuussutissarsiutit pingaarnersaat, aalisarneq, pillugu naalakkersuisoqatigiit nutaat aalisarnermut siunnersuisoqatigiinnik arlaannaannulluunniit attuumassuteqanngitsunik pilersitsiumaarput.

Aalisarnermut Siunnersuisoqatigiinnik attuumassuteqanngitsunik, Aningaasaqarnermut Siunnersuisooqatigiit ullumikkut inuiaqatigiit aningaasaqarnerat pillugu siunnersuisarnerannut periuseqarluni, aalisarnermut immikkoortumi Naalakkersuisunut siunnersuisussanik Naalakkersuisoqatigiit pilersitsissapput.

Aamma aalisakkat ilivitsut avammut niuerutigiinnarnagit, qanoq ililluni suliarinninneq aqqutigalugu aalisakkanik ataasiakkaanik aningaasarsiornerulersinnaanitsinnik suussusiisunik nalunaarusiortoqarnissaa naalakkersuisooqatigiit kissaatigaat.

Akileraartarnermik aaqqissuusseqqinneq nalilersorneqassaaq - ingerlatseqatigiiffinnut akileraarut apparneqassaaq

Demokraatit qinersinermi ajugaapput, taakkulu akileraartarnermik aaqqissuusseqqinneq atuutilersinneqarlaaq akerleralugu.

Akileraartarnermut aaqqissuusseqqinneq nutaaq 2025-mi januaarip aallaqqaataani atuutilersoq Naalakkersuisut nalilersorniarpaat. Akileraartarnermut aaqqissuusseqqinneq ulluinnarni aningaasaqarnerup oqilisaanneqarnissaanut pisariaqartitsisunut tamanut iluaqutaanersoq nalilersorneqassalluni.

Nalilersuereernerup kingorna akileraartarnermut aaqqissuusseqqinneq naleqqussarlugu suliarineqassaaq, 2026-mi atuutilersinneqarsinnaalluni.

Inuussutissarsiortut atugaat oqilisarnissaat naalakkersuisoqatigiit aamma akileraartarnermut aaqqissuusseqqinnissaq anguniagaraat. Aaqqissuusseqqinnermi ilaatigut ingerlatseqatigiiffinnut akileraarut appartinneqassasoq naalakkersuisoqatigiinnissamut isumaqatigiissummi allassimavoq.