NAAMMAGITTAALLIORNEQ
Naalakkersuisut Greenland Airportsimik ataatsimeeqateqarusupput
Greenland Airportsip killiliussamittut avammut nalunaarutigisatik namminneq eqquutsittariaqaraat, Naalakkersuisut ilaatigut allapput.
Nuummi mittarfissuup illorsuartaata nutaap atuutilernera ilungersunartorsiorfiuvoq, isumannaallisaanermi ajornartorsiutit pissutigalugit nunanit tamalaanit timmisartuussinerit unitsinneqarallarmata.
Assi: Mittarfeqarfiit Kalaallit Nunaat
Naalakkersuisut Greenland Airportsimik naammaginninnginnertik nalunaarutigaat, taamalu pisoqarluni sapaatip akunnerani matumani paasinarsimmat, Nuup Mittarfianit nunanut tamalaanut timmisartuussinerit atorunnaarsinneqarallarnerat oktobarip aallartinnerata tungaanut sivitsorneqartut.
Atorunnaarsitsineq ingerlaqqittussanngorpoq, ingerlatseqatigiiffiup ajornartorsiutit Angallannermut Aqutsisoqarfiup aallaqqaammulli nunanut tamalaanut timmisartuussisarnerup matugallarnerani iliuusereqqusai naammassineqarsimanngimmata.
Siuariartortoqannginnera naammaginngikkaat
Naalakkersuisut tallimanngormat tusagassiuutinut nalunaarutaanni allassimavoq, Naalakkersuisut siulittaasuata Múte Bourup Egedep (IA) aamma ineqarnermut attaveqaasersuutinullu naalakkersuisup Hans Peter Poulsenip (S) Nuummi mittarfiliornerup nalaani ilungersunartut piffissami kingullermi atuuttut naammaginartumik iliuuseqarfigineqarsimannginnerat naammaginngilluinnaraat:
- Sulisut ingerlatsineq ingerlatiinnarniarniarlugu ajornartorsiuterpassuillu aaqqinniarlugit ilungersorsimagaluartut, ingerlatsinermi unammillernartut innuttaasunut tamanut kinguneqartut suli atugaajuarput, Hans Peter Poulsen oqarpoq nangillunilu:
- Kinguaattoornerit isiginnaaginnarsinnaanngilavut, taamaattumillu naatsorsuutigaarput Greenland Airportsip piffissaliussat nammineq tamanut nalunaarutigisimasani eqquutsikkumaarai.
Ataatsimeeqatigiinnissaq qinnutigigaat
Naalakkersuisut suliassami pineqartumi siulersuisut akisussaaffii aqutsisullu suliassaat qitiutinniarpaat ilungersunartut makku aaqqinniarlugit:
- Greenland Airportsimi siulersuisut siulittaasuat siulittaasullu tullia ataatsimeeqatigiumallugit qinnuigaavut, pissutsit aaqqiiviginiarlugit iliuuseqartoqarnissaa naatsorsuutigineqartoq qulakkeerniarlugu. Pissutsit maanna atuuttut akuerineqarsinnaanngillat, naatsorsuutigaarpullu iliuuseqartoqarnissaa sulissutigineqassasoq, Múte Bourup Egede oqarpoq.
Greenland Airportsip pisortaata Jens Lauridsenip sapaatip akunnerani matumani oqaatigaa, ajornartorsiutit aaqqinniarlugit mittarfiullu nunanit tamalaanit timmisartuussinernut isumannaallisaanerit pitsaanerpaamik pilerseqqinniarlugit ilungersorluni suliniuteqartoqartoq:
- Aaqqitassat kingulliit sapinngisatsinnik suliariniarpavut, sukkanerpaamik isumannaallisaanermut immikkoortumut 2-mut utersinnaaniassagatta, Jens Lauridsen Greenland Airportsip Facebookimi quppernerani taama oqarpoq.
