Issittoq aamma Atlantikup Avannaa pillugit isumaqatigiissutip immikkoortuisa aappaat 2025-miit 2033-mut atuuttussaq
Danskit illersornissamut ministeriata Troels Lund Poulsenip nunanullu allanut tunngasunut naalakkersuisup Vivian Motzfeldtip (S) oktobarip qulingani saqqummiuppaat.
Isumaqatigiissut 27 milliardit koruuninik aningaasartaqarpoq. Umiarsuit pissarsiarineqartussat isumaqatigiissutip immikkoortuani siullermi januaari 2025-mi aalajangerneqartup saniatigut umiarsuarnik marlunnik Issittumi atugassanik aamma piniartoqartussanngorpoq.
Aamma Sikuki Nuuk Harbour suleqatigalugu Nuummi illersornissaqarfiup umiarsuaanut talittarfiliortoqassaaq, kiisalu sikusiut sakkutuunit sakkutuujunngitsunillu atugassaq aamma isumaqatigiissutigineqarluni.
Naalakkersuisut saqqummiussinerisa kingorna borgmesterinit marlunnit ilaatigut isornartorsiorneqarput. Tassa danskit naalakkersuisunut isumaqatiginninniarneranni peqataatitsisoqannginnera isorineqarluni. Partiip illuatungiliuttup Naleqqap aamma isumaqatigiissut isornartorsiorpaa. Taamaammat Naalakkersuisut tallimanngornermi ullup-qeqqanut tusagassiortunik katersortitsipput, tassanilu isumaqatigiissut pillugu itisiliisussaassallutik.
Jens-Frederik nassuerpoq: Isumaqatigiissut sakkortuumik qisuariarfigineqarpoq
Illersornissamut isumaqatigiissut qisuariarfigineqangaatsiarsimasoq, Naalakkersuisut siulittaasuata Jens-Frederik Nielsenip tusagassiortunik katersortitsinerup aallartinnerani nassuerutigaa. Tassa ilaasa taperseraat allat aalassassutigalugu tupaallaatigigaat.
- Naalakkersuisut tamanna eqqumaffigaat, oqarpoq.
- Nutaanik ernumassutaasinnaasunik pisoqanngilaq, Jens-Frederik Nielsen oqarpoq.
Nunani allani politikkikkut pissutsit eqqarsaatigalugit naalakkersuisut akisussaassuseqartariaqarnerat aamma eqqartorpaa.
- Naalakkersuisut pissutsit sakkortunerulersinnianngilaat, Jens-Frederik Nielsen oqarpoq, nangillunilu:
- Pitsaanerusumik upalungaarsimallunilu nakkutilliinissaq isumaqatigiissutip nutaap siunertaraa.
Vivian Motzfeldt: Isumaqatiginninniarneq ataqqeqatigiinnermik aallaaveqarpoq
Illersornissaq pillugu isumaqatigiinniarnerit 2023-mili ingerlanneqartut, Vivian Motzfeldt oqarpoq.
- Piffissaq kingullerpaaq atorlugu iliuuseqarfigineqanngilaq, periusissiaavoq partiit sisamat isumaqatiginninniarnernut tunngaviusut isumaqatigiissutigisaat, Vivian Motzfeldt oqarpoq.
Illersornissamut isumaqatigiissummik isornartorsiuisut annerpaat ilagaat illuatungiliuttut partiiat Naleraq.
Partii isumaqatiginninniarnernut kissaatiminik apuusserusunnanilu Kalaallit Nunaata nunanut allanut politikkianut periusissiami peqataanngitsoq, Vivian Motzfeldt Naleqqap isornartorsiuinera pillugu oqarpoq .
Partii isumaqatiginninniarnissanut kissaateqarsimanngitsoq, Vivian Motzfeldt Naleraq pillugu oqarpoq.
Aammali suliap naammassineqarneranut isumaqataannginneq ajunngitsuusoq oqaatigaa.
- Pisut iluangersunartutut isigaakka, isumaqatiginninniarnerimmi aqqutit eqqortut malillugit pinikuupput. Silaannakkut imaanilu nuna tamakkerlugu isumannaatsuunissaq isumaqatiginninniarnerni pineqarput, Vivian Motzfeldt oqarpoq.
Upalungaarsimanermut isumannaallisaanermullu atortut pisoqaavallaarlersimasut, aamma imaani silaannarmilu nakkutilliinerulerneq nutaat ilagigaat, Vivian Motzfeldtip ilaatigut tikkuarpaa.
Matoqqavallaarneq isornartorsiorneqartoq
Tusagassiortut maanna apeqquteqarsinnaalerput. Suliap matoqqasumik ingerlanneqarneranut isornartorsiuinermut aamma Nuummi sakkutuunut atorneqartussanik sanaartortoqarnera sorsuttolissagaluarpat saassunneqartussatut siunnerfigineqalernissaanik kinguneqarsinnaasutut isigineqarnera pillugu aperisoqarpoq.
Naalakkersuisut borgmesterinut, innuttaasunut partiinullu paasissutissiisarniarlutik ilungersorlutik sulisimasut Vivian Motzfeldt oqarpoq.
- Isumaqatiginninniarnerit matoqqasumik ingerlanneqarput, paasissutissalli Inatsisartuni Folketingimilu ataatsimiititalianut attuumassuteqartunut ingerlateqqinneqartarput, oqarpoq.
Sakkutooqarnikkut annertuusaasoqanngitsoq
Nuummi suliniutit pillugit atortulersuutit pioreersut pitsanngorsarneqarneqartut Jens-Frederik Nielsen oqarpoq:
- Issittumi Sakkutooqarfik allaffeqarfittaassaaq. Sakkutuut umiarsuartaassaat talinngaffissaqarniassammata Nuummi sakkutuunut talittarfiliortoqarniarpoq, maannami taliffissaqannginnamik kangerlummi kisarsimasarput.
- Talittarfissaq pineqartoq sakkutuunut iluaqutaassaaq, aammattaarli uagutsinnut. Sakkutuunut sakkutuujunngitsuniillu atorneqarsinnaasussaavoq, Jens-Frederik Nielsen erseqqissaavoq.
Illersornissamut isumaqatigiissut pillugu paasititsiniaasoqarumaartoq Naalakkersuisut siulittaasuat aamma neriorsuivoq.
Kalaallit Nunaat ulorianartorsiunngitsoq aamma milliardilikkaanik aningaasaliissuteqarneq sakkutooqarnikkut annertusaanerunngitsoq Vivian Motzfeldtip oqaatigaa.
Upalungaarsimanerup pitsanngorsarneqarnera paasissutissanillu amerlanerusunik pissarsinissaq pineqartoq oqarpoq.
- Taakku qangalili iluarsineqartussaagaluarput, maannalu piviusunngortinneqarput, oqarpoq.
Tusagassiortunik katersortitsinerput naammassivoq, Sermitsiamili illersornissamut isumaqatigiissut kingulleq pillugu oqallinneq soorunami suli sammineqassaaq.
