Inatsisinik atuutsitsinermut
ministereqarfiup pigisanik digitalikkut eqqartuussivikkoortumik
nalunaarsuisarnissamut siunnersuut tusarniaassutigigamiuk, pingaarutilimmik
puigugaqarsimagunarpoq.
AG-mi sapaatip akunnerani kingullermi
allaaserineqartutut, inatsisissatut siunnersuut Inuttut Pisinnaatitaaffiit
pillugit Siunnersuisoqatigiinnit (IPS) sakkortuumik isornartorsiorneqarpoq.
Siunnersuisoqatigiit tusarniaanermut akissumminni allapput, eqqartuussivikkut pigisanik digitalikkut
nalunaarsuisarnissaq kalaallisut pisinnaassanngimmat ”tupaallaatigigitsik”.
Inatsisinik atuutsitsinermut
ministereqarfiup pigisanik digitalikkut eqqartuussivikkoortumik
nalunaarsuisarnissamut siunnersuut tusarniaassutigigamiuk, pingaarutilimmik
puigugaqarsimagunarpoq.
AG-mi sapaatip akunnerani kingullermi
allaaserineqartutut, inatsisissatut siunnersuut Inuttut Pisinnaatitaaffiit
pillugit Siunnersuisoqatigiinnit (IPS) sakkortuumik isornartorsiorneqarpoq.
Siunnersuisoqatigiit tusarniaanermut akissumminni allapput, eqqartuussivikkut pigisanik digitalikkut
nalunaarsuisarnissaq kalaallisut pisinnaassanngimmat ”tupaallaatigigitsik”.
Siunnersuummi tunngavigineqartoq tassaalluni
pigisanik digitalikkut nalunaarsuinermi nammineerluni aaqqiissutissaq nutaaq,
taamaalilluni Nunatsinni innuttaasut siunissami internetikkut namminneq
biilinik illunilluunniit piginnittutut nalunaarsorneqarsinnaalissallutik.
IPS-illi tusarniaanermut akissummini
tikkuarpaa, Nunatsinni innuttaasup nammineerluni oqaatsini atorlugit
aaqqissuussineq atorsinnaanngippagu, tamanna inuttut pisinnaatitaaffinnut
akerliussasoq. Aamma taama Naalakkersuisut isornartorsiuineq tamanna isumaqatigalugu
oqaatigaat, Inuussutissarsiornermut, Niuernermut, Aatsitassanut, Inatsisinik
Atuutsitsinermut Naligiissitaanermullu naalakkersuisoq Naaja Nathanielsen
oqarpoq.
Pigisanik digitalikkut nalunaarsuisarnermut periuseq siunnersuutigineqartoq kalaallisut saqqummiunneqartinnagu akuerineqarsinnaanngilaq
Naaja H. Nathanielsen
- Naalakkersuisut IPS isumaqatigaat,
pigisanik digitalikkut nalunaarsuisarnermut periuseq siunnersuutigineqartoq
kalaallisut saqqummiunneqartinnagu akuerineqarsinnaanngitsoq, naalakkersuisoq
AG-mut allakkatigut taama oqaaseqaateqarpoq.
Taassuma ilanngullugu ilisimatitsissutigaa,
tamanna Inatsisinik Atuutsitsinermut ministereqarfimmut
nalunaarutigineqareersoq imalu itisiliilluni:
- Aaqqiissutissamik inatsisissatut
siunnersuutip pitsaaqutaanik qulakkeerinnittussamik, kalaallisulli
atorneqarsinnaanissaanik piumasaqaatinik sumiginnaanngitsumik,
nassaarniarpugut.
Naammaginanngitsoq
Tusarniaassutigineqartumi allassimavoq
aningaasatigut pissutsit pissutigalugit, pigisanik digitalikkut
nalunaarsuisarnermut periusissaq kalaallisut allanneqarsimanngitsoq.
IPS-ip tusarniaanerup ingerlanneqarnera
aamma isornartorsiorpaa, tassami tuaviuunneqarpasissutut ikkami.
Tusarniaassutigineqartut juulip aallartinnerani nassiussuunneqarput juulip
30-at ilanngullugu killilerneqarlutik, sivitsorneqarsinnaananilu, naak tusarniaassutigineqartut
qallunaatuinnaq allassimagaluartut. Tusarniaassutigineqartut aatsaat kingusinnerusukkut
kalaallisuunngortinneqarput.
IPS-ip ilisimatitsissutigaa piffissarititap
sivitsorneqarnissaanik qinnuteqaat Inatsisinik atuutsitsinermut
ministereqarfimmit itigartinneqarsimasoq, Naalakkersuisunit inatsisissatut
siunnersuutip ukioq manna ukiakkut ataatsimiinnermi suliarineqarnissaanik
kissaateqartunit piffissarititaasoq sakkortooq pissutigalugu.
Taama tunngavilersuineq naalakkersuisumit
isumaliornartinneqarpoq:
- Pigisanik digitalikkut
nalunaarsuisarnermut periusissiaqalernissamik kissaateqarneq nutaajunngilaq,
taamaattumillu Inatsisinik atuutsitsinermut ministereqarfiup Naalakkersuisut
suliamik kingusinaartumik aallartitsinermut utoqqatsissutigimmagit naleqqutinngilaq.
Suliaq qangali aallartinneqartariaqaraluarpoq, naalakkersuisoq Naaja
Nathanielsen taama erseqqissaavoq.
