Naalakkersuisut kommuninut isumaqatigiissuteqarput
Borgmesterit Naalakkersuisullu ataatsimoortumik tapiissutit isumaqatigiissutigeqqammerpaat, taakkulu 2025-mi 2 milliardit koruunit sinnerlugit naleqassapput.
Erik Jensenip aappaagumut kommuninut tapiissutit borgmesterinut isumaqatigiissuteqarfigai. Internetsi aqqutigalu ataatsimeeqatigiittut uani takuneqarsinnaapput.
Assiliisoq: Namminersorlutik Oqartussat
Ataatsimoortumik tapiissutit akinut akissarsianullu 2,25 procentinik iluarsiffigalugit Namminersorlutik Oqartussat kommunillu marlunngormat isumaqatigiissutigaat.
Aningaasaqarnermut Naalakkersuisoqarfimmit tusagassiuutinut nalunaarummi ilisimatitsissutigineqarpoq akileraarutinik aaqqissuusseqqinnermut atatillugu ataatsimut tapiissutit ukiumut 158 millionit koruunit sinnerlugit qaffanneqartartut.
Siusinaartumik suliunnaarnersiutit
- Isumaqatigiissummik ilanngullugu ataatsimoortumik tapiissutit 30,586 mio. koruuninik qaffanneqarput, kommunit siusinaartumik suliunnaarnersiutinik suliassaqarfimmut aningaasartuutaanut tapiissutitut. Taakkunannga 30 mio. koruunit ataasiartumik aningaasaliinerupput. Qaffaanermut tunngaviuvoq siusinaartumik suliunnaarnersiutit pillugit inatsimmik naliliineq, takutimmagu siusinaarluni suliunnaarnersiutisiaqalernissamut misissuisarnerup pitsanngorsarnissaa kiisalu siusinaarluni suliunnaarneriutit aamma aaqqiissutit allat akornanni pitsaanerusumik ataqatigiissitsinissaq pisariaqartoq, Aningaasaqarnermut Naalakkersuisoqarfik ilisimatitsivoq.
Kommunit aamma 25 mio. koruuninik immikkut 2025-imi pissarsissapput, taakkulu “kommunit suliffissarsiornermi ikiorsiisarnernut aamma pisortat ikiorsiissutaat pillugit inatsisinik nutaanik atulersitsiniarneranni unammilligassat aallartittut pakkersimaarnissaannut Naalakkersuisut aaqqeeqataanissamut suleqataarusunnerannut” atorneqassapput.
Angajoqqaarsiaasartut paarsinermi akissarsiaat isertitanit B-nit isertitanut A-nut allanngortinnissaat 5,5 mio. koruuninik qaffanneqarput, peqatigitillugulu nalinginnaasumik ilanngaatit atuuttut peerneqarnissaat kiisalu ilanngaatit akileraarutitigut nalinganik akissarsiat qaffanneqarnissaat pillugu aalajangiinerup kinguneralugu.
Naalakkersuisoq iluarisimaarinnittoq
- Iluarisimaarpara, ataatsimoorluta angusarisatsinnut, isumaqatigiissutigalutigulu alloriaratta, taamaasilluta Namminersorlutik Oqartussanut aamma kommuninut pisussaaffiliiffiusumik isumaqatigiissuteqaratta, Aningaasaqarnermut Akileraartarnermullu Naalakkersuisoq Erik Jenseni oqarpoq.
- Kialuunniit isumaqatiginninniarnermi kissaatini tamaasa pisinnaanngikkai ilisimavarput. Naalakkersuisutullu nammineq immikkut nuannaarutigaara, meeqqanut angajoqqaarsiaasartut, nunatsinni tamarmi pisariaqartilluinnakkatta kiisalu suliarujussuannut qujassutissaqarfigilluinnakkatta atugarisaannut pitsanngorsarniarlugit inissiigatta. Ilanngullugu isertuutissanngilara, isumaqatiginninniarnerit sivisusimammata, minnerunngitsumillu Namminersorlutik Oqartussani atorfilittanut aammalu kommunini atorfilittanut, misissuinernut pingaarutilinnut piareersarnerit annertuut sivisuumik suliarilluarsimammatikkit. Aamma taakku suliaqarnermut qujaffigineqartariaqarput, Erik Jensen kommuninut isumaqatigiissuteqarnermi immikkut qujasoq oqarpoq.
