Malik Berthelsen: Nunatta avataaneersunik sulisussanik pisariaqartitsivugut

Nunatta avataneersunik sulisoqartarnermut atatillugu KNR-ip Naalakkersuisoq Nivi Olsen (D) nunatta avataanit suliartortunik sukannernerusumik nakkutilliisoqarnissaanik kissaateqarneranik allaatiginnereernerata kingorna oqallinneq aallarteqqippoq.

Nunattalu avataanit suliartortut Kalaallit Nunaanni sivisunerpaamik ukiuni sisamani najugaqarsinnaanissaat Naleqqameersup Pele Brobergip siunnersuutigaa.

Qeqqata Kommunianili borgmesteri Malik Berthelseni (S) kangiamiut suliartortitat nunaqavissut suliffissaraluinik arsaartuisutut pineqarnerat isumaqatiginngilaa.

- Avataaniit suliartortut ingammik kangiamiut ukiuni kingullerni amerliartornerat iluatigalugu kalaallit suliffissaraluinik arsaartuinerarlugit oqaatigineqartarnerat isumaqatigineq ajorpara, Malik Berthelsen tusagassiorfinnut nalunaarummi allappoq.

Tikisitat inuiaqatigiinni suliffeqarfinnilu atorfissaqartinneqarnertik pissutigalugu tikisinneqartartut erseqqissarpaa.

Pisariaqartitsineq nunaqavissunit matussuserneqarsinnaanngilaq

Malik Berthelsen naapertorlugu, Qeqqata Kommuniani suliffissaaleqisut amerlavallaarmata suliffeqarfiit nunaqavissuinnarnik sulisussarsiornermikkut pisariaqartitatik matussusersinnaanngilaat.

Borgmesteri oqarportaaq, innuttaasunut sulerusuttunut suliffissanik nassaarnissaq periarfissaalluartoq.

– Kommunerput eqqarsaatigalugu isumaqarpunga sulerusuttut amerlanerpaat imaluunniit tamarluinanrmik suliffissaqarlutillu sullittut, tamanna innuttaasut akileraarutaasa qaffakkiartornerisigut qujanartumik takusinnaavarput, tusagassiutinut nalunaarummi Malik Berthelsen oqarpoq

Suliffeqarfiit kingunerisinnaasaannik mianersoqqusivoq

Malik Berthelsen oqarpoq pisariaqartinneqartumik sulisussaqanngikkaanni suliffeqarfinni assigiinngitsuni ingerlatsinerup ingerlaannarnissaa ajornakusoorsinnaasoq.

- Taamaasiunngikkuttami pisiniarfiit neriniartarfiillu pisisartut pisariaqartitaat aallaavigalugit ammasinnaanissaat imaluunniit aalisakkeriviit avammut tunisassiorsinnaanerisa tamakkiisumik ingerlanneqarsinnaanissaat qularaara.

Taamaattumik Malik Berthelsenimut apeqqut tassaavoq nunatsinni sulisut nunanit allaneersut qanoq amerlatigisut tikittarnerat piinnarnagu, inuiaqatigiinnili pisariaqartinneqartunik ingerlatsinernik attassiinnarnissamut sulisut naammattut qanoq qulakkeernissaat aamma pineqarpoq.

Kommuni sulisunik kangiamiunik tikisitsivoq

Sulisussanik pisariaqartitsineq kommunip nammineq suliffeqarfiutaani maluginiarneqarportaaq. Borgmesterip oqaatigisaa naapertorlugu Qeqqata Kommunia nammineq kangiamiunik sulisussarsiortariaqarsimavoq, nunaqavissunik pisariaqartinneqartunik piukkunnartunik naammattunik nassaarsinnaannginnami.

Sisimiuni meeqqerivinnut sulisunik tallimanik Maniitsumilu utoqqaat najugaqatigiiffiannut tallimanik Kommuni tikisitsivoq.

Malik Berthelsen naapertorlugu suliffeqarfinnit nalunaarutigineqartut pitsaasimapput, sulisullu nutaat sulisut pioreersut artukkiissutaannik oqilisaaqataasimapput.

- Sumiiffinnilu pineqartuni pineqartut tallimaannaagaluarlutik sulisunut sullitanullu annertuumik oqilisaataallutillu iluaqutaanerat annertuumik unnersiutigineqarput. 

Sullitallu isumassorneqartariaqartut sulisullu suli amigartuaannartut eqqarsaatigissagaanni avataaniit pisariaqartitsineq suli annertugaluartoq matumuuna naqissusissallugu erseqqissarpaa.

Naalakkersuisut suliffeqarfinnik oqaloqatiginninnissaannik kaammattorpai

Sulisut nunaqavissut periarfissaannut nunatta avataanit suliartortitat qanoq sunniuteqartarnerat immikkut politikkikkut oqallinnermi sammineqarsimavoq.

Malik Berthelsenilli isumaqarpoq aalajangiinerit suliffeqarfiit aalajangersimasumik misilittagaat pisariaqartitaallu tunngavigalugit aalajangerneqartariaqartut.

- Taamaattumik Inatsisartunut Naalakkersuisunullu kaammattuutigissavara inuit attaveqatigiittarfiini oqallinnerit kisiisa aallaaviginagit, suliffeqarfiilli sooq avataaniit tikisitsisariaqartarnersut pillugit oqaloqatigeqqullugit, allappoq.

Taamatuttaaq kajumissaarivoq sulisut nunaqavissut tikisitallu suliartortut inuiaqatigiinnut pingaaruteqassusiat qujamasuutigineqassasoq.

- Taamaattumik isumaqarpunga avataaniit suliartortut nunatsinni sulisartut peqatigalugit nunatsinni aningaasarsiornerup ingerlaannarnissaanut, isumassorneqartariaqartullu isumassorneqarnerinut qukakkeerinneqataammata qujamasuutigisariaqarigut, borgmester oqarpoq.