KL

DK

Naalakkersuisut Neqimut aaqqiissutissamik nassaarniarlutik piffissaajaasut

Naak naalakkersuisoqarfiit akimorlugit suleqatigiissitaq KNI A/S-imik suleqateqarluni ukioq ataaseq sinnerlugu niuernermut piginneqataanermullu periusissamik nutaamik nassaarniaraluartoq, piffissaq ungasinnerusoq eqqarsaatigalugu aaqqiissutissaq toqoraaviup Neqi A/S-ip iluanaaruteqarluarsinnaaneranik qulakkeerinnittoq suli nassaarineqanngilaq.

Naak suleqatigiissitaq ukioq ataaseq sinnerlugu siunissamut aningaasarsiornissamut aaqqiissutissamik nassaarniarsarigaluartoq, toqoraaviup Neqi A/S-ip siunissaa suli ilisimaneqanngilaq.
Tusagassiortoq
Saqqummersinneqarpoq

2025-mi 8 millionit koruuninik aningaasaliissuteqarnikkut toqoraaviup Neqi A/S-ip siunissami piujuartitsisumik ingerlanissaanut periusissiamik nassaarnissamut Naalakkersuisut piffissaqarnerulerput.

Ukioq ataaseq sinnerlugu matuma siorna Nunalerinermut, Imminut Pilersornermut, Nukissiutinut Avatangiisinullu Naalakkersuisup Kalistat Lundip Neqi A/S allanngortiterneqangaassasoq qulaarpaa, tassanilu namminersortut ingerlatseqatigiiffimmik aningaasatigut ajornartorsiortumik piginneqataanissaat pilersaarutaavoq.

- Ingerlatseqatigiiffiup aaqqissuussaanera patajaatsoq tunngavigalugu piginnittullu eqqortut nassaarinerisigut, toqoraavik siunissaqarluartinneqarsinnaavoq maannamullu ingerlatsinerliortoqarsimanera anigorlugu siunissamut ilusissaa ilusilersorneqarumaarpoq. Taamaammat aamma pisortat namminersortullu piginneqatigiillutik ingerlatseqatigiiffimmik qanoq ingerlatsisinnaanersut pillugu suleqatigiissitaq misissuitipparput, neriuutigaaralu namminersorlutik suliffeqarfiutillit Neqi A/S-ip siunissaa pillugu suleqatigiinnissamut ammajumaartut, Kalistat Lund oktobarimi 2023-mi Sermitsiamut taama oqarpoq.

Killiffik

Aaqqiissutissamik nassaarnissaq unammillernartortaqarpasissinnaavoq. Suleqatigiissitat maannamut qanoq angusaqarsimanersut Naalakkersuisut Siulittaasuata Naalakkersuisoqarfiani siulersuisunut allattoqarfimmit Sermitsiamut oqaatigiumaneqarsimanngilaq.

- Neqi pillugu suleqatigiissitaq pillugu kingusinnerusukkut oqaaseqaqqikkumaarpunga, Siulersuisoqatigiit Allattoqarfiannit naatsumik taama akissuteqarput.

Toqoraaviup nunap karsianit annertuumik ikiorserneqarani aningaasarsiorluarsinnaanera apeqqutaavoq avaqqunneqarsinnaanngitsoq.

2023-mi suliffeqarfiup piginnittuata KNI A/S-ip akiitsut 142,5 millionit koruunit isumakkeerfigai, ukiut arlallit naatsorsuutinik peqquserluttoqareersorlu. Ukiumi naatsorsuusiorfiusumi kingullermi suliffeqarfik 1,05 millionit koruuninik amigartooruteqarpoq, naak 2024-mut aningaasanut inatsit aqqutigalugu immikkut ittumik 8 millionit koruuninik ilassutitut aningaasaliissuteqartoqarsimagaluartoq.

Siunissaq ungasinnerusoq

2024-mut aningaasanut inatsisimmi ima allassimavoq:

“Neqi pillugu KNI-mik sullissinissamik nutaamik isumaqatigiissuteqarnissaq ilimagineqarluni kontomi pingaarnermi uani aningaasaliissutit 2024-mi 8 mio. koruuninik amerlineqarput. 2025-mi ukiunilu tullinnguuttuni Neqip imminut akilersinnaasumik ingerlanneqalernissaanut aaqqiissutissarsisimanissaq ilimagineqarpoq.”

2025-mut aningaasanut inatsimmi nutaami Neqi A/S-imut tunngatillugu oqaaseqaat allanngortinneqarpoq, tassani aamma siunissami periutsip atuuttussap piariinngikkallarnissaa ersersinneqarpoq:

”Neqi pillugu KNI-mik sullissinissamik nutaamik isumaqatigiissuteqarnissaq ilimagineqarluni kontomi pingaarnermi uani aningaasaliissutit 2024-mi piffissarlu ungasinnerusoq eqqarsaatigalugu aaqqiissutissap tamatuma piviusunngortinnissaata tungaanut 8 mio. koruuninik amerlineqarput"

naalakkersuisut kni a/s kalistat lund inuiaqatigiit samfund offentlig/privat ejerskab neqi a/s

ATORFIIT Se alle jobs

Powered by Labrador CMS