Decembarip aallartinnerani §37 naapertorlugu apeqqutigineqartut, ullut suliffiusut qulit iluanni akineqartussaagaluartut qaammatini arlalinni akineqanngereerlutik, akineqarput.
Partiimi illuatungiliuttumi siulittaasup Pele Brobergip Naalakkersuisut apeqqutiminut akissuteqaqqullugit quleriarluni eqqaasissimallugit oqaatigaa.
Decembarip aallartinnerani §37 naapertorlugu apeqqutigineqartut, ullut suliffiusut qulit iluanni akineqartussaagaluartut qaammatini arlalinni akineqanngereerlutik, akineqarput.
Partiimi illuatungiliuttumi siulittaasup Pele Brobergip Naalakkersuisut apeqqutiminut akissuteqaqqullugit quleriarluni eqqaasissimallugit oqaatigaa.
Nunanut allanut tunngasunut naalakkersuisoq Vivian Motzfeldt (S) decembarip pingajuani naatsumik akissuteqarpoq, Pele Brobergillu tamanna naammaginngilaa.
- Innuttaasut Inatsisartulluunniit paasititsivigineqarneq ajortut
Naalakkersuisut matoqqavallaarnerarlugit isornartorsiorpai:
- Naalakkersuisut matoqqasumik periaaseqarput, innuttaasunik Inatsisartunilluunniit qanoq iliuuseqarniarnerminnik tusarliineq ajorput, oqarpoq.
Naalakkersuisut Nato-mi aasaq ataatsimeersuartoqarnerani sooq peqataannginnersut brobergip apeqqutigaa. Vivian Motzfeldtillu akissummini Naalakkersuisut peqataannginnerannut qaaqqusaannginneq pissutaasoq paasissutissiissutigaa.
Pele Brobergilli tamanna upperinngilaa, Naalakkersuisut qaammatit tallimat atorlugit nassuiaatissarsiniarmata:
- Qaaqqusaasimannginnerarluni oqarnera, tassa imaappa peqataaqqusaasimanngitsoq?
- Akissut apeqqutinik amerlanernik pilersitsivoq. Naalakkersuisugullu eqqarsaatigalugit tamanna sungiussimavarput.
Ataatsimiititaliaq akuliummat aatsaat akissuteqartoqartoq
Apeqqut: Nunani allani politikkikkut pissutsit Amerikamiullu soqutiginninnerat eqqarsaatigalugit akiniaaluusaarnermut ulapippallaarneq pissutaasimasinnaannginnerpa?
- Ulapinneq kingusinaarluni akissuteqarnermut pissutaasuuppat, piffissarujussuaq atornagu Inatsisartunut mailerluni paasititsisoqarsinnaasoq qularinngilara: Ulapippugut. Qaammatit tallimat qaangiuppata akineqarumaarpusi.
- Qisuariannginneq nammineq iliuuserineqarpoq. Akissuteqannginnissaq toqqarneqarluni. Nunanut allanut sillimaniarnermullu ataatsimiititaliaq aatsaat akissuteqaqqusilermat, ammanerusumillu sulinissamik piumasaqalermat aatsaat qisuariartoqarpoq.
Sermitsiap nunanut allanut tunngasunut naalakkersuisoq, Vivian Motzfeldt (S), oqaaseqartinniarsaraa.
