Naalakkersuisut siulittaasuata Siumup siulersuisortaavi suleqatigissallugit nalunaarutigaa
Siumut nutaanik siulittaasoqalernera Inatsisartunut qinersinermi kingullermi naalakkersuisooqatigiilertunut allannguutaassanngitsoq Naalakkersuisooqatigiit erseqqissaatigaat.
Partiit siulersuisuuneri siuttuilu allanngornerat apeqqutaanani naalakkersuisooqatigiit sulinerat ingerlaannartassaaq. Siumup siulittaasuata siulersuisuunerisalu allanngornerat naalakkersuisooqatigiit sulinerannut sunniuteqassanersut Jens-Frederik Nielsen aperineqarami taama naqissusiivoq.
Assi: Oscar Scott Carl
Siumup nutaanik siulersuisoqalernera Aleqa Hammondimillu siuttoqalernera nutaamik isumaqatigiinniaqqittoqarnissanik, naalakkersuisooqatigiinnillu nutaanik malitseqarnissaanik kinguneqassanngilaq. Naalakkersuisut siulittaasuat Jens-Frederik Nielsen (D) Sermitsiamut allakkatigut akissuteqarnermini erseqqissaavoq.
Aleqa Hammond Siumumi siulittaasutut sapaammi juunip 29-ani qinerneqarpoq, tamannali naalakkersuisooqatigiinnissamik isumaqatigiinniaqqinnissamik tunngavissaqanngilaq.
- Siullertut Aleqa Hammond Siumumi siulittaasunngornerani pilluaqqorusuppara. Qinersinerup inernera ataqqilluinnarpara, aamma partiip Aleqa Hammondimik siuttuuffigineqartup suleqatiginissaanut oqaloqatiginissaa qilanaaraara, Jens-Frederik Nielsen oqarpoq.
Sulineq ingerlaannassasoq
Naluneqanngitsutut nunanut allanut ilisimatusarnermullu naalakkersuisoq Vivian Motzfeldt Siumumi immikkut ittumik ataatsimeersuartoqarnissaata tungaanut siulittaasuugallarpoq.
Partiilli immikkut ittumik ataatsimeersuarnerani Aleqa Hammondimut ajorsarami siulittaasuugallartutut tunuartariaqarpoq.
Partiit allat siulersuisuunerisa allanngornerat apeqqutaanani naalakkersuisooqatigiit suleqatigiinnissamik isumaqatigiissutaannik sulineq ingerlaannassaaq. Jens-Frederik Nielsenip tamanna naqissuserpaa:
- Naalakkersuisut naalakkersuisooqatigiinni isumaqatigiissutigineqartut malillugit sulinertik ingerlatiinnassagaat oqaatigisinnaavara, tamannalu allanngortinniarlugu pilersaaruteqartoqanngilaq, Jens-Frederik Nielsen oqarpoq.
