Naalakkersuisut soraarnerussutisiassanut ileqqaartussaatitaanermut maleruagassaq unitsikkallarniaraat

Naalakkersuisut soraarnerussutisiaqalernissamut ileqqaartussaatitaanermut inatsit allanngortinniarlugu Inatsisartut ukiaanerani ataatsimiinneranni siunnersuuteqassapput.

Aaqqissuussaanerup immikkoortuisa pingaarnersaasa ilaat atorunnaarsinneqarallarnissaa pineqarpoq:

- Inatsisissatut siunnersuut isumaqassaaq, maannakkut aaqqissuussaq, ileqqaagaqarnissamut pisussaaffiit naammassineqanngitsut innuttaasut akileraartarnermut allagartaanni akileraarutit qaffannerisigut akilersorneqaqqusaasinnaanerat 2026-mi 2027-milu unitsikkallarneqassasut, Naalakkersuisut tusagassiorfinnut nalunaarummi allapput.

Tassa imaappoq, innuttaasut soraarnerussutisiaqalernissamut inatsit naapertorlugu naammattumik ileqqaagaqanngippata oqartussat akileraarutit qaffannerisigut akilersuititsisarnerat 2026-mi 2027-milu atorunnaarsinneqarallassaaq.

Soraarnerussutisiaqalernissamut aaqqissuussaq 2018-imi atuutilersinneqarmalli arlaleriarluni isornartorsiorneqarlunilu oqallisigineqartarpoq, assersuutigalugu Inatsisartunut ukioq manna qinersisoqarnerani.

Immikkut ilisimasalinnik suleqatigiissitaq siunnersuusiussaaq

Aningaasaqarnermut naalakkersuisoq Múte B. Egede (IA) inatsisip immikkoortua taanna allanngortinnissaa sulissutigineqartoq Sermitsiamut aasaq manna siusinnerusukkut oqarpoq. Naalakkersuisullu qanoq iliorniarnersut maanna saqqummersinneqarpoq.

Naalakkersuisut avataanit immikkut ilisimasalinnik suleqatigiissitamik, namminersortut pisortallu soraarnerussutisiarititaat akimorlugit patajaatsumik ataqatigiittumillu soraarnerussutisiaqartitsinermik aaqqissuusseqqinnissamut kaammattuutinik suliaqartitsipput.

Immikkut ilisimasallit siunnersuutaat 2026-mi saqqummiunneqassapput, aamma soraarnerussutisiaqalernissamut ileqqaartussaatitaanermut allannguutissanik siunnersuuteqassallutik. Kaammattuutit 2026-mi naalakkersuinikkut isumaqatigiissuteqarnissamut tunngaviussapput.

Oqartussat akileraarutip procentianik qaffaanikkut innuttaasut ileqqaartitsisinnaajunnaarpata soraarnerussutisiassanut pinngitsoorani ileqqaartussaatitaanerup atorunnaarsinneqarneranik kinguneqassanersoq paasiniarlugu Sermitsiap Múte B. Egede oqaaseqartinniarsaraa.

Soraarnerussutisiassat ajorseriassanngitsut

Immikkut ilisimasallit suleqatigiissitat sulinerat arfinilinnik tunngaveqarpoq. Soraarnerussutisiassallu ajorseriannginnissaat siullertut piumasaqaataasoq Múte B. Egede tusagassiuutinut nalunaarummi nassuiaavoq:

- Immikkut ilisimasalinnik suleqatigiissitap siunnersuuteqarnikkut utoqqalinersiat ajorseriarpallaartinnissaat pinngitsoorniarlugu taamaaliortoqarpoq, imaassinnaammammi aningaasaqarneq eqqarsaatigalugu naapertuunnerpaatut tamanna iliornerusoq. Periutsit ilaat tassaavoq utoqqalinersiat ajorseriarpallaartinneqassanngitsut. Utoqqalinersialittatsinnut taamaaliorsinnaanngilagut.

Kalaallit Nunaata aningaasaqarnera patajaatsumik siunissamullu piareersimanissaa arlaannaannulluunniit attuumassuteqanngitsumit misissorneqartariaqartoq isumaginninnermut, suliffeqarnermut, nunamut namminermut avatangiisinullu naalakkersuisoq Bentiaraq Ottosen (A) nangilluni nassuiaavoq:

- Immikkut ilisimasalinnik suleqatigiissitap kaammattuutaasa atuarnissaat, tamatumalu kingorna soraarnerussutisiaqartitsinermik aaqqissuusseqqinneq ataqatigiittoq akisussaassuseqartorlu suliarinissaa saqqummiunnissaalu Naalakkersuisut qilanaaraat, Bentiaraq Ottosen oqarpoq.

Periutsit arfinillit immikkut ilisimasalinnik suleqatigiissitap sulinermini tunngavissaat tassaapput:

1. Utoqqalinersiat ajorseriarpallaartinnissaat pinngitsoortinneqassaaq
2. Utoqqalinersiat pingaarnertut isertitakitsunut sammitinneqassapput
3. Soraarnerussutisiassanut nammineq ileqqaakkat qaffasinnerunissaat ukkatarineqassaaq
4. Sulineq suli pilerinartuussaaq
5. Innuttaasunut pisariitsoq paasiuminartorlu
6. Soraarnerussutisianut aaqqissuussap patajaatsuunissaa