Naalakkersuisut tassaarsuaqarnera pillugu attaveqatigiinnerup amigaataanera ernummatigaat
Qaqqap sisoornerata annertuup Dickson Kangerluani siorna pisup misissuiffigineqarnerata inernera naalakkersuisunut saqqummiunneqarsimanngilaq.
Siriusip alapernaarsuisuisa Issittumilu Sakkutooqarfiup atortuisa ilaat Dicksonip Kangerluani sakkortuumik tassaarsuaqarmat imaanut avalapput.
Assiliisoq: SIRIUS/ Arktisk Kommando
Allaaserisaq GEUS-imit akissuteqaat ilanngullugu nutarterneqarpoq.
Ilisimatusarnerup inernera nutaaq sapaatip-akunnerani kingullermi saqqummiunneqartoq Naalakkersuisut naammaginngilaat.
Danmarkimi Kalaallit Nunaannilu nunap qanoq issusianik misissuiffiup (GEUS) 2023-mi septembarip 16-iani Tunumi Dicksonip Kangerluani qaqqap sisoorneranut tunngasumik misissuineq uissuumminartoq pineqarpoq.
Qaqqap sisoorneranik tassaarsuaq annertooq 200 meterisut portutigisoq nunamut ulluni qulingiluani malugineqarsinnaasumik sajutsitsisoq ilisimatusartut nunarsuarmi tamarmeersut suleqatigiillutik paasivaat.
Paasisat saqqummiunneqarsimanngillat
Naalakkersuisut misissuinerup inernera pillugu ilisimatinneqarusupput:
- Ilisimatusarneq pissanganarlunilu inuiaqatigiinnut pingaaruteqarpoq, aammali ernumanarpoq ilisimatuussutsikkut misissuinerit ajunaarnersuarmik kinguneqarsinnaasut nalunaarutigineqaqqaaratik tamanut saqqummiunneqartarmata.
- Dicksonip Kangerluaniit paasisat nutaat Naalakkersuisunut saqqummiunneqanngillat. Tamanna naammaginanngilaq, taamaattumillu siunissami attaveqaqatigiinnerup pitsaanerunissaa siunertaralugu GEUS saaffigineqassaaq, Naalakkersuisuni ilaasortat Kalistat Lund (IA) aamma Naaja H. Nathanielsen (IA) tusagassiutinut nalunaarummi ataatsimoorussami allapput.
Pingaartumik pinngortitami ajunaarnersuaq pineqarmat, paasissutissat tamarmik sapinngisamik piaarnerpaamik oqartussanut eqqortunut ingerlatinneqarnissaat pingaaruteqartorujussuusoq naalakkersuisut marluk naqissuserpaat.
GEUS-imi tusagassiornermut pisortap Anja Fonsecap pisut ajuusaarnarai:
- Naalakkersuisut Dicksonip Kangerluani misissuineq pillugu ilisimatinneqarsimanngitsutut misiginerat ajuusaarnarpoq. Kalaallit Nunaanni oqartussani suleqatigisartakkavut toqqaannartumik oqaloqatigisarpavut, taamaattumik pisoq oqaaseqarfigeqqissanagu, Anja Fonseca, GEUS-imi tusagassiornermut pisortaq, Sermitsiamut allakkatigut paasititsivoq.
Aarlerinartut annikillisinniarneqartut
- Sumiiffinnut qaqqanik sisoortoqarsinnaaneranik annertunerusumik aarlerinartorsiorfiusunut nunap assiliornermik Naalakkersuisut siunnerfilimmik suliaqarput. Taamaattunik navianartunik pisoqarnissarpiaa paasisinnaaniarlugu immaqalu eqqoriarsinnaajumallugu, kangerlunni ulluinnarni angalaarnitsinni aarlerinaataasut taamatut suliaqarnermi annikillisinniarneqarput, nalunaarummi allapput.
Naalakkersuisut taamaattumik suleqatigiissitanik, sunniuteqarluartumik upalungaarsimanermik ersarissumillu attaveqaqatigiinnermik qulakkeerisussamik pilersitsipput, taamaalilluni sumiiffinnik qaqqap sisoorsinnaaneranik aarlerinartorsiorfiunerusunik peqartillugu, innuttaasut sukkasuumik nalunaarfigineqarsinnaassallutik. Aamma innuttaasut ilisimasaat pingaaruteqarput:
- Qaarsunut innanullu qajannartortalinnut attuumassuteqarsinnaasunik takusaqartut, nittartagaq https://govmin.gl/da/fjeldskred/ aqqutigalugu nalunaarutiginninnermut immersugassamik nassiussisarnissamut, kikkut tamarmik kaammattorneqarput, Kalistat Lund aamma Naaja H. Nathanielsen allapput.
