Naalakkersuisut Trumpimut nunat tamalaat inatsisaat isumaqatigiissutaallu aalajangiusimaniaraat

Naalakkersuisut tusagassiortunut katersuutsitsisarfiat marlunngornermi tusagassiortunik nunanit allaneersunit qallunaanillu ulikkaarpoq, taakkualu ulluni makkunani USA-mi præsidentinngortup USA-p nunataata allisikkusunneranut anguniagaqarnini aamma republikanerit inatsisissatut siunnersuutaat Kalaallit Nunaata Danmarkimit pisiarineqarnissaanik siunertaqartoq, USA-llu præsidentiata oqaasii kingullernut Naalakkersuisut qanoq qisuariarfigineraat malinnaavigaat.

Donald Trumpip præsidentitut ivertinneqarnermini oqalugiarnermini Kalaallit Nunaat oqaatsimik ataatsimilluunniit eqqaanngilaa, USA-lli nunani allani oqartussaaffini annertusassagai oqaatigalugu.

Donald Trumpillu præsidentitut ullormi siullermi inatsisit 100-t siulliit atsiornerini oqarpoq Danmarkip Kalaallit Nunaat nunatut namminersortutut “pigiinnarsinnaanngikkaa”.

"Kalaallit Nunaat nuannersuuvoq, nunarsuarmilu isumannaatsuunissaq qulakkeerniarlugu pisariaqartipparput. Danmarki isumaqataalerumaartoq qularinngilara. Danmarkip piginera pigiinnarneralu aningaasartuutigingaatsiarpaat. Nalunngisatsitut Kalaallit Nunaanni innuttaasut Danmark nuannarinngilaat, isumaqarpungali uagut nuannarigaatigut. Ernera aallartitallu sapaatip-akunneri marlussuit matuma siorna tikeraarput, nuannaraatigut. Qanoq pisoqassanersoq takussavarput. Kalaallit Nunaat uagutsinnut pingaaruteqaannarani nunarsuarmi isumannaallisaanermut pingaaruteqarpoq. Russit Kinamiullu umiarsui tamaaniipput, taamaaginnarsinnaanngillallu," præsidenti republikaneriusoq Donald Trump oqarpoq, taanna tusagassiorfik ABC News aqqutigalugu toqqaannartumik aallakaatinneqarpoq.

Iligiit imminnut saassuttanngillat

Naalakkersuisut siulittaasuata Múte Bourup Egedep (IA) Fox News aqqutigalugu Kalaallit Nunaata USA-mik suleqateqarnerunissaq soqutigigaa erseqqissareerpaa, Kalaallit Nunaalli qallunaajorusunnanilu amerikamioorusunngitsoq. Kalaallit Nunaata isumannaatsuunissaa amerikamut atasoq. Tusagassiortunik katersortitsinermi Naalakkersuisut siulittaasuata partiit ataatsimoorlutik nammineq aalajangiisinnaaneq tunngavittut isigigaat erseqqissaqqippaa.

 Oqaatigeqqillugulu Kalaallit Nunaat amerikamioorusunnanilu qallunaajorusunngitsoq.

- Amerikamiuunianngilagut aamma qallunaajunianngilagut, kalaaliuniarpugut. Nunatta inui nunatta siunissaanut aalajangiisuusussaapput, nunat allat tatissanngilaatigut. Kiffaanngissusermik ujartuinitsinni taarsernianngilarput kiffaanngissusermik annaasaqarnermik, suleqateqarnissaq ujartortarput. Suleqatigiinnikkut inerisaanissaq ujartortarput, Naalakkersuisut siulittaasuat Múte Bourup Egede (IA) qisuariarpoq. Taassuma atorfilittat kalaallillu USA-mi aallartitaat aqqutigalugit USA-mik oqaloqateqarnissani sulissutigaa.

Kalaallit Nunaat USA-p iligigaa USA-mut erseqqissarneqassasoq nunanut allanut tunngasunut naalagaaffinngornissamullu naalakkersuisup Vivian Motzfeldtip tusagassiortunik katersortitsinermi Múte Bourup Egedep saamiatungaaniittup naqissuserpaa.

Issittumi sillimaniarneq sakkutooqarnerlu annertunerusoq

Naalakkersuisut nunanut allanut tunngasunut isumannaallisaanermut illersornissamullu periusissiaanni Issittoq (sapinngisamik) sakkulersorfiunnginnissaa qulakkeerniarlugu politikkeqarput, Issittumili isumannaallisaanerup illersornissallu nukittorsarneqarnissaa avaqqunneqarsinnaanngilaq, Vivian Motzfeldt oqarpoq, taannalu illersornissamut isumaqatigiissut pillugu Danmarkimik suli isumaqatiginninniarpoq. Illersornissamut aningaasartuutinik annertusaanissamik aamma pilersaaruteqarpoq.

- Iliginngisagut nunarsuatsinni issittumut qanilliartornerat ilisimaarissavarput, isiginngitsuusaarnagu illersornissamut isumaqatigiinninniarnerit annertuut massakkut ingerlappagut aamma taanna naatsorsuutigaarput piffissami qaninnerpaami naammassineqassasoq, Vivian Motzfeldt (S) oqarpoq.

- Taannalu uniffigiinnarneqarani illersornissakkut suli annertunerusumik nukittorsaassaaq, upalungaarsimanikkut piginnaasanik inerisaanermut suliaq ingerlammat, Vivian Motzfeldt oqarpoq.

Oqaloriaatsit naleqqutinngitsut

USA-p oqariartuutai præsidentillu Kalaallit Nunaannik pisinissamik anguniagai USA-mik oqaloqateqarnermi naalakkersuisut eqqartorniarpaat.

- Tassa oqaloqatigiinnerit aallartinneqassapput, pissutsillu nunamit iligisatsinnit oqaatsit naapertuutinngitsut tusaasagut taakkua soorunami oqaloqatigiinnikkut paaseqatigiiffissamik tunngavissiorneqassapput. Nunatsinni nammineq oqartussaassuseqarnitta sapanginneqanngisaannarnissaanik oqariartorneq piussooq. - Iligiit peqatigiinnerat allat qulliunerusutut qulagiinerannik tunngaveqassanngilaq, taakku nunat tamalaat inatsisaanni tunngaviupput. Taamaammat suleqatigiinnerit aammalu ullumikkut ilitut peqatigeriikkavut naalagaaffeqatigiinnerullu iluani nuna peqatigisarput peqatigeqqissaarlugu ulluni makkunani ataatsimooqqissaarnissaq pisariaqarpoq. Nunatut nunat tamalaat inatsisaannik ataqqinnittutut nunat peqatigisatta ukkatareqqissaarpagut taamaammat sinaakkutit avaqqunnagit, suleqatigiinnerput nukittorsarneqarnissaa sulissutigivarput, Vivian Motzfeldt oqarpoq.

Tamat oqatussaaqataanerannik tunngaveqartut

- Naalakkersuisut aqqutit eqqortumik, torersumik aamma oqaloqatigiinnikkut aaqqinneqarsinnaanerat killissaa tikillugu akiuiffigissavaat. Inuiassuit tamat oqartussaaqataanerannik toqqammaveqartut akunnerminni pingaartitariuaannavippaat isumaqatigiissutit akunnerminni pigisatik aamma oqaloqatigiinneq aqqutigalugit anigorsinnaasat anigorneqarnissaat suliarissallugu. Kalaallit Nunaatalu toqqammavik taanna aallaavigissavaa, taannalu ataatsimoorfiuvoq maani nunatsinni, Múte Bourup Egede oqarpoq.