Naartuersittarneq pillugu oqallinneq:
Naalakkersuisut suliarinninnerat uparuarpaa
Kingusippallaarpoq, annikippallaarpoq, annertuallaarpoq. Demokraatiniit Anna Wangenheimip naartuersittarneq pillugu inatsisit tiguniarnissaanik suliaqarneq naammaginngilaa.
Naartuersittarnermut inatsisip tigunissaanut suliaq arriippallaaqaaq, Demokraatit oqaaseqartartuat Anna Wangenheim isumaqarpoq.
Leiff Josefsen
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Naalakkersuisut malunnartumik naartuersittarnermut inatsit nutarsagaq qanoq isikkoqartariaqarnersoq ersarissumik politikkikkut isummerfigisimanngilaat.
Anna Wangenheim (D), peqqinnissaq pillugu polikkimut tunngatillugu oqaaseqartartoq, Kalaallit Nunaanni naartuersittarnermut inatsisip tigunissaanut suliaq pillugu §37 naapertorlugu apeqqummut akissut pillugu taama oqarpoq.
AG-mi allaaserineqareersutut Namminersorlutik Oqartussani atorfilittat naalakkersuisullu inatsisip, ukiuni 50-inngortorsiungajalersup, tigunerata kingunerisinnaasai, matumani aningaasaqarnikkut allaffissornikkullu kingunerisinnaasai, misissuleruttorpaat. Misissuineq ukioq manna naammassissangatinneqarpoq.
NAARTUERSITTARNERMUT INATSIT
Suliaqarfiit ilaat 1992-imi januaarip aallaqqaataani tiguneqanngilaq, taamaammallu danskit naalagaaffiannit aqunneqarpoq.
Namminersorlutik Oqartussat naartuersittarneq pillugu inatsiseqarneq tamaat tiguniarlugu sulissuteqarput.
Tamanna danskit oqartussaat suleqatigalugit ingerlavoq. Sulinermi peqqinnissaqarfimmi suliaqarfiit sinneri tamarmik, makkuusut, pineqarput:
- Toqusumik misissuineq, toqungasumik pilaaneq pilattaanikkullu inissiineq il.il.
- Naartunermik kipisitsineq naartunillu ikilisitsineq.
- Naartusinnaajunnaarsitsineq naartutitsisinnaajunnaarsitsinerlu.
Danmarkimi naartuersittarnermut inatsit ungasinngitsukkut nutarsarneqarpoq, ilaatigut siornatigut naartuersissagaanni naartunermi sapaatip-akunneri aqqaneq-aappassaani kingusinnerpaamik naartuersiffissaq sapaatip-akunnerisa 18-iannut qaffanneqarpoq. Taanna Kalaallit Nunaanni atuutilissanersoq oqaatigissallugu siusippallaarpoq.
Siullertut inatsit tiguneqassaaq, kingornalu nutarterisoqassanersoq eqqartuisoqassaaq, Peqqinnissamut Naalakkersuisup Agathe Fontainip (IA) Anna Wangenheimimut akissutaani atuarneqarsinnaavoq.
”Taamaammat aalajangiitinnani peqqinnissamut ileqqorissaarnissamullu tunngasunik erseqqissaanissaq siunertaralugu piareersarluartoqarnissaa Naalakkersuisunut pingaaruteqarpoq,” Agathe Fontain akissummini allappoq.
Naalakkersuisut ileqqorissaarnissamut eqqarsaatersuutinik ilanngussinerat Anna Wangenheimup nuannaarutigaa:
- Tamanna inatsimmut tamakkiinerullunilu naapertuilluarnerusumut, inuiaqatigiit assigiinngisitaarnerannik katitigaanerannillu ersersitsisumut iluaqutaassaaq. Ileqqorissaarneq pillugu oqallinneruttaaq inuiaqatigiinni siammasinnerusumik eqqartuinissaq aallarnerpaa, tassani isummat assigiinngitsut tusarneqarsinnaallutillu eqqarsaatigineqarsinnaapput, Demokraatini oqaaseqartartoq oqarpoq.
Taassumali Kalaallit Nunaanni apeqqutit artornartut pillugit siunnersuillutillu aqqutissiuisinnaasunik ileqqorissaarnermut siunnersuisoqannginnatta ileqqorissaarnermut eqqarsaatersuutit aalajangiiffiuminaaratarsinnaasut ilanngullugu oqaatigaa.
Qinersinermut qanittoq
Naartuersittarnermut inatsisip tigunissaanut suliaq ukiorpaalunni ingerlavoq, Demokraatiniillu oqaaseqartartup suliap arriitsumik ingerlanera uparuarlugu ”naammassisaqarsinnaannginnermik iliuuseqarsinnaannginnermillu ersersitsisoq” isumaqarpoq.
Agathe Fontainip akissutaa naapertorlugu Inatsisartut naartuersittarneq pillugu inatsit pillugu aalajangiinissamut aappaagu aatsaat isummersinnaapput. Tamannattaaq Anna Wangenheimimit uparuarneqarpoq.
Taassuma tamanna suliamut kinguarsaaratarsinnaasoq tutsuiginarunnaaratarsinnaasorlu erseqqissarpaa, tassami aappaagu kingusinnerpaamik apriilip arfernani Inatsisartunut qinersinissaq suaarutigineqassaaq.
- Qinersinissaq taamak qanitsigitillugu siunnersuummik kinguartitsinermi apeqqut pimoorullugu naammassillugulu suliarinagu politikkikkut unammillerutitut atorneqaratarsinnaavoq, Anna Wangenheim aarlerisaarivoq.
