Inuussutissarsiornermik ingerlatsilluartut aningaasaliisartullu kalaallit pingasut, Frank Bagger siuttoralugu Ilulissani akunnittarfimmik tallimanik quleriilimmik sanaartorniartut kinguaattoorneq erloqissutigaat.
- Nunaminertamik qinnuteqaatitta kommunimit akuersissutigineqarnissaa suliamik aallartitsilluta pilersaarutitsinnik piviusunngortitsinissatsinnut utaqqisaavoq, Franlk Bagger Sermitsiamut oqarpoq.
– Qinnuteqaatitta Avannaata Kommunianit suliarineqarnera kigaappoq, tamanna isornartoqartipparput. Kommunalbestyrelsi ingerlatsivillu isornartorsiorpagut, taanna oqarpoq.
Hafnafjudurimi akunnittarfiliornissamut nunaminertaq, aningaasaliinissamut piginnqatigiiffiup Ilu Invest ApS-ip Ilulissaniittup Avannaata Kommunianut aggustip 13-ani qinnutigaa.
Ilu Invesilli maanna suliniut aallartissinnaanngorpaa, tamannalu aningaasaliisut nuannaarutigaat. Avannaata Kommuniani pilersaarusiornermut immikkoortortaqarfiup Ilu Invest novembarip sisamaanni nalunaarfigaa, suliffeqarfik akunnittarfiliornissamut nunaminertamik tunineqarsimasoq.
Nunaminertamik atuinissamut akuersissummik tunineqarneq nunaminertami sanaartornissamut akuersissutaavoq.
Aningaasaliinissamut piginneqatigiiffimmik ingerlatsisuupput nukariit Frank aamma Tommy Bagger Ilulissaneersut aamma Polar Seafoodimi piginneqataasimasoq, inuussutissarsiortut akornanni isigineqarluartoq Jens Salling Nuummeersoq.
Ilu Investip akunnittarfissaq nunaminertami illerngit aqqusaagaanni sanaartorniarpaat. Illorsuaq tallimanik quleriinnik 80-inik initalik eqqaaneqareersoq sananeqassaaq.
Kangiata illorsuanut isikkivilik
- Akunnittarfimmik pitsaanerpaamik sanarusunngilagut, kisianni akissaqartinneqartutut taaneqartartumik sanarusuppugut. Tikeraat ineeqqaniit Kangiata Illorsuanut isikkiveqassapput, ukiukkut upernaakkullu qimusserlutik saneqquttut takusinnaassallugit. Akunnittarfissamiit aamma pisuinnarluni pisiniarfiliartoqarsinnaassaaq, soorlu nerisassaarniarfinnut, tammajuitsoorniarfinnut, neriniartarfinnut aamma pisuttuartarfinnut, taanna oqarpoq.
Kalaallit Nunaanni sanaartornermik suliffeqarfiit annersaat KJ Greenland Ilulissaniittoq, ilaatigut Ilulissani Kangiata Illuarsuanik aamma Hotel Ilulissanik sanaartortoq Ilu Investip sulisisppaa. Akunnittarfiup pilersaarutaasup sanaartornissaata qanoq akeqarnissaa KJ Greenlandip suli oqaatiginngilaa.
- Sanaartortup akigititaa suliniutitsinnut nalunaarusiamut naapertuutissaaq. Tikeraat kisimik akiliisinnaapput. Ineeqqanut akigititatta akikitsuunerat ersersinngippassuk ineeqqat unnuiffissat akikitsut nunatsinneersunut aamma nunanit allaneersunut tuniniarnissaat soorunami ajornakusuussaaq, Frank Bagger oqarpoq.
Kommunip akuersineranit ukiut marluk-pingasut qaangiuppata akunnittarfiup sanaartorneqareerluni naammassinissaa taassuma naatsorsuutigaa.
Pilersaarummut tunngavissaq kommunalbestyrelsemit allanngortinneqartoq
Frank Baggerip isornartorsiuinera pillugu oqaaseqaammik Sermitsiamiit kommunaldirektør Nick Nielsenimut piumavugut.
Tommy aamma Frank Bagger,
Assi: Nammineq pigisaq
Taanna oqarpoq sumiiffik eqqartorneqartoq siornatigut inissialiorfisssatut kommunalbestyrelsemit pilersaaruteqarfigineqarsimagaluartoq. Kisianni Ilulissani nunaminertat akunnittarfiliorfigineqarsinnaasut amigaatigineqarmeranut ilutigitillugu aninigaasaliisartut arlallit akunnittarfiliornissamut soqutiginninnermik takutitsimmata, pilersaarutitut tunngavigineqartoq kommunalbestyrelsemit allanngortinneqarsimasoq, taamaalilluni sumiiffimmi akunnittarfiliortoqarsinnaalerluni.
Taassuma naqissuserpaa Avannaata Kommunia politikkikkut pilersaarusiornikkut, aningaasaliisartunut namminersortunut sumiiffimmi tassani akunnittarfiliornissamut periarfissiisimasoq.
- Nunaminertaq akunnittarfimmut atugassaq siusinnerusukkut akunnittarfimmik pilersaarummut allamut tunniunneqarsimagaluarpoq. Suliniulli taanna piviusunngortinneqanngilaq. Taamaattoqarnera kommunimut unammillernartoqarneranik ersersitsivoq, Nick Nielsen allappoq.
Immikkoortortaaqqami nunaminertanut tunngasunik suliaqarput
Sanaartorfissat inississimalluartut soqutigineqarnerat Nick Nielsenip tikkuarpaa, kisianni suliniutit tamarmik naammassineqarneq ajorput. Nunaminertaq suliniummut illuartinneqareersoq kingorna piviusunngortinneqanngitsoq aningaasaliisussanut allanut periarfissanik kinguarsaataasinnaasarpoq, nassuiaavoq.
Kommunip allaffeqarfiani nunaminertanik suliarinninneq suleqatigiinnit amerlanngitsunit suliarineqarpoq, tassani sulisut nunaminertanut tunngasunik suliaqarput. Taakku kommuni tamakkerlugu inissianik sanaartornermut, inuussutissarsiornermut sanaartugassanullu allanut tunngasunik qunnuteqaatinik ataavartumik suliaqartuupput. Qinnuteqaatit malittarisassat atuuttut, allaffissornikkut aamma pilersaarusiornikkut atugassat eqqarsaatigalugit suliarineqartarput.
- Suliassaqarfik annertooq uani pineqarpoq, suliallu ataqatigiissaakkamik illersorneqarsinnaasumillu tulleriiaarlugit suliarineqartariaqarput. Eqqortumik assigiissaakkamillu sullissisoqarnissaa kommunip qulakkeertussaavaa, taamaalilluni qinnuteqartut tamarmik assigiimmik tunngaveqarluni sullinneqarniassammata, tamatuma naqissusernissaa pingaaruteqarpoq. Nick Nielsen oqarpoq.
Kommunaldirektøri naapertorlugu akunnittarfinnik nutaanik takornarianullu sammisassanik allanik Ilulissani aningaasaliisoqarnissaa Avannaata Kommuniata soqutisarilluinnarpaa. Nunanullu allanut mittarfittaaq takornariaqarnerup annertusinerunissaamut periarfissiisussaammat naammattunik unnuisarfinnik pilersitsisoqarnissaa pingaaruteqarpoq.
- Alloriarnerit tigussaasut kommunimit aalajangiunneqareerput, pilersaarutip tunngaviusup allanngortinneratigut akunnittarfiliorsinnaaneq ammaanneqarluni. Aningaasalilluni suliniutit pimoorussat piviusunngortinneqarnissaat soorunami kissaatigaarput, kisianni inatsisit atuuttut aallavigalugit allaffissornikkullu illersorneqarsinnaasumik tamanna pisariaqarpoq, Nick Nielsen oqarpoq, taassuma nunaminertamik qinnuteqaat aalajangersimasoq pillugu Frank Baggerilu oktobarip naanerani attaveqaqatigiissinerminnik oqarnera ilisarisinnaanngilaa.
Akunnittarfik qulinik quleriilik naggaarneqarpoq
Suliffeqarfiup Tankeeraq Ejendommip, Tommy aamma Frank Baggerimit pigineqartup akunnittarfissamik angisuumik Ilulissani suliniuteqarnera pillugu paasissutissat ukiup ataatsip matuma siorna siullerpaamik pisortatigoortumik saqqummiunneqarput.
Nunaminertami illoqarfiup qeqqaniittumi akunnittarfimmik qulinik aqqaneq-marlunnilluunniit quleriilimmik 200-t missaannik ineerartalimmik sanasoqarnissaa taamani pilersaarutaavoq. Akunnittarfiup 2028-mi ammarneqarnissaa neriuutigineqaraluarpoq.
Nukariilli Baggerikkut akunnittarfiliornissamut qinnuteqaataat itigartitsissutigineqarsimasoq Sermitsiami ukioq manna januaarimi allaaseraarput. Taanna illoqarfiup qeqqani Pisiffimmut Brugsenimullu qanittumi inissisimasussaagaluarpoq.
- Suliaq pillugu innuttaasunut tusarniaasoqannginnerani tamanna pivoq. Aamma oqaatigisinnaavara akunnittarfimmik quleriinnik qulinik sanaartornissamik qinnuteqarnerput sioqqullugu, inissiarsuit portusuut pillugit innuttaasut isumaannik tusarniaalluni ataatsimiisitsisoqarmat. Taamani Atuarfik Mathias Storchip eqqaa ilaatigut pineqarpoq.
- Kisianni illoqarfiup qeqqani portusuunik inissialiortoqarnissaa akerlerineqanngimmat, qinnuteqaatitta kommunimit suliarineqarnissaa innersuussutigaarput. Taamani itigartinneqarpugut, Frank Bagger oqarpoq.
Ineeqqat amerlanerusut pisariartinneqartorujussuupput
Ilulissat Kalaallit Nunaanni illoqarfinnit tamanit takornariaqarfiunerpaajuvoq. Nunanut allanut mittarfik sisamanngornermi oktobarip 29-ani ammarneqarmat Ilulissaniit Københavnimut aqqut nutaaq atorneqarlerpoq.
Mittarfittaap atulerneragut ilaasut Københavnimiit toqqaannaq Ilulissiarsinnaanngorput, Nuummut Kangerlussuarmulluunniit meqqaanngikkaluarlutik, tassanngaanniillu toqqaannaq ingerlaqqissinnaanngorput.
- Ilulissanut toqqaannartumik aqquteqalerneq annertuumik periarfissiivoq, aasakkut angallattoqarnerpaaffiata naala kisiat eqqarsaatiginagu, kisianni aamma ukiukkut takornariaqarnermi, Air Greenlandimi pisortaaneq Jacob Nitter nittartakkatigut tusagassiivimmut Standby.dk-mut taama oqarpoq.
Frank Bagger naapertorlugu Ilulissani akunnittarfiit amerlanerit pisariaqartinneqarput. Taassuma suliassat "qaleriiaaginnartut" kommunimit pingaarnersiorneqannginnerat eqqumigivaa.
- Suliniuterput aamma akunnittarfimmik suliniutit allat Ilulissat aningaasaqarneranut inuiaqatigiinnullumi tamanut pingaarutilerujussuupput. Suliniut immaqa aneerasaartarfimmik alliliinertut assersuunneqarsinnaavoq, taanna isumaqarpoq.
Nukariit Baggerikkut 2021-miilli Jens Salling peqatigalugu Best Western Plus Hotel Ilulissat 78-inik ineeralik ingerlappaat. Naatsorsuutini kingullerni, 2025-26-mi, apriilip 30-ani naasumi, 1,9 millionit koruuninik sinneqartoorput. Ukiup siuliani aamma taamatut sinneqartoorput.
