Naartunaveersaatinik spiralinik atuisitsisarsimaneq pillugu misissuineq kinguartoorpoq

1960-ikkunniit maannamut spiralilersuisimanermut,  naartunaveersaasersuisimanermullu tunngatillugu misissuineq kinguartoorfiuvoq. Tamanna Naalakkersuisut tusagassiorfinnut nalunaaruteqarlutik ilisimatitsissutigaat.

Immikkut ittumik ilisimasallit 2025-imi majimi suliap killiffiata qiteqqunnerani nalunaarusiaq tunniussimavaat, naatsorsuutigineqaraluarpoq nalunaarusiaq naammassillugu Naalakkersuisut septembarimi saqqummiunneqassasoq.

- Immikkut ittumik ilisimasallit 2025-imi majimi suliap killiffiata qiteqqunnerani nalunaarusiaq tunniussimavaat, tassanilu kinguartitsisoqarnissaa pillugu noqqaassuteqarput. Atortussat tikinneqarsinnaannginnerinik kiisalu atortussat tikinneqarnissaannut utaqqineq kinguartitsinermut pissutaavoq, ilisimatitsissutigineqarpoq.

Pissutsit arlallit paasiniarneqassapput

Immikkut ilisimasallit misissuisussanngortinneqartut aggustimi 2024-imi toqqarneqarput. Immikkut ittumik ilisimasallit misissuinerisa nunarsuarmi tamarmi inuit pisinnaatitaaffiisa aamma nunap inoqqaavisa pisinnaatitaaffiisa innarlerneqarnerat pisimanersoq qulaajassavaat. Tamatuma saniatigut innarliinerit inuiannik toqoraanerup nassuiarneqarneranut naammassinninnersut nalilerneqassaaq.

- Misissuineq massakkut kinguaattoormat, soorunami uggornarpoq. Kisianni suliap peqqissaartumik suliarineqarnissaa, aamma immikkut ittumik ilisimasallit suliaminnik naammagisimaakkaminnik tunniussinissaat uannut pingaarneruvoq.

- Spiralilersuisimaneq pillugu kalaallit-qallunaallu arlaannaannulluunniit attuumassuteqanngitsumik qulaajaanerannit inerniliinernik immikkut ittumik ilisimasallit massakkut atuisinnaanerisa periarfissaalernera, kinguartitsinermi pitsaasumik saniatigut sunniutaavoq. Immikkut ittumik ilisimasallit, naak kinguaattoortoqaraluartoq, sulilluarnissaannik kissaappakka, Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen oqarpoq.

Nunat tamat akornani akuerisaallutik immikkut ittumik ilisimasallit gruppiata, immikkut ilisimasalinnit misissuisitsinermik suliaqartup, inuttarai Dalee Sambo Dorough, Miriam Cullen, Jonas Christoffersen aamma Jensine Nedergaard.