Nakorsaaneq: Corona qularnanngitsumik tuniluutileriartuinnarpoq
Danmarkimi sapaatip-akunnerini kingullerni coronamik tunillatsittut amerliartupiloorsimapput, tamannali Kalaallit Nunaanni innuttaasunut ernumassutaasariaqanngilaq, nakorsaaneq Henrik L. Hansen erseqqissaavoq.
2020-mi coronap nunarsuarmi tuniluunnera aallartimmat tusagassiortunik katersortitsinerpassuit ilaanni Nunatsinni Nakorsaaneq Henrik L. Hansen.
Toqqorsivimmit assi: Leiff Josefsen
Danmarkimi coronamik tunillatsittut amerliartupiloorput, nunamilu maani "qularnanngitsumik" aamma taamaappoq, nakorsaaneq Henrik L. Hansen Sermitsiaq.AG-mut oqarpoq.
- Danmarkimi Omikron nutaaq KP.3-mik taaneqartoq maanna atugaalersimavoq. Nunami maani atugaalersimassajunnarsivoq. Siornatigut tuniluuttartunit tuniluunnarnerugaluarluni maannakkut perulunnartuunissaa ilimagineqarsinnaanngilaq, nakorsaaneq eqqissisaalluni oqarpoq.
Coronat nutaat Danmarkimi tuniluutilerneranit sapaatip-akunnialui qaangiukkaangata nunatsinnut annguttartut oqarpoq.
Coronamik tunillatsissimasut amerlanngitsut
- Nunami maani qanoq ittumik tuniluuttoqarnersoq maannakkut misissuinianngilagut, siornatigutullili pisoqartoq qularnanngilaq, Henrik L. Hansen oqarpoq, ilisimatitsivorlu 2022-mi qaammatini siullerni nunarsuarmi tuniluuttoqangaatsiareermalli Covid-19-imik tunillatsittoqartarsimasoq.
- Tuniluuttoqarnera aallartimmalli tunillatsissimasunik napparsimmavimmut unitsitsisoqartarpoq. Covid-19-imik tunillatsissimasut napparsimmavimmut unitsinneqartut suli amerlanngillat, peqqinnissaqarfillu maannamut annertunerusumik artukkerneqarneq ajorpoq. Tunillatsissimasulli napparsimmavimmut unitsinneqartut napparsimasunut allanut tunillaassuinnginnissaat pissutigalugu mattusimasariaqarmata napparsimmavimmut artukkiut annertunerujuaannarpoq, nakorsaaneq oqarpoq.
- Nunami innuttaasut pisoq kingulleq ernumagisariaqanngilaat. Ilaat tunillatsissapput, amerlanerilli qaangipallassavaat. Tuniluuttoqarneratulli maleruagassat pisariitsut malinnerisigut tunillaassuunneq annikillisinneqarsinnaavoq. Napparsimasut sapinngisamik allat attaveqarfiginaveersaassavaat angerlarsimaannarlutillu. Sapinngisamik qanillinaveersaartoqassaaq assallu eqqiluisaarluarneqartassapput, Henrik L. Hansen siunnersuivoq.
Errortuutikumik uuttuineq
Danmarkimi errortuutikoq coronavirusimik qanoq akoqartiginersoq uuttuiffigineqartarpoq, tamannalu inuiaqatigiinni tuniluuttoqarneranut ersiutaasarpoq. Danmarkimi coronamik tuniluuttoqarnera maanna akunnattumi inissisimasoq, Statens Serum Institut ilisimatitsivoq.
- Aasaanerani tuniluuttoqarnissaa ilimagaarput, ukiuuneranitulli tuniluuttoqarnissaa ilimaginngilarput, nakorsaaneq Bolette Søborg, Statens Serum Institutimeersoq, tv2.dk-mut oqarpoq.
