Arnaq utoqqaq hashimik kuffertimiisitsisoq tigusarineqarpoq — angut hashimik imerpalasunillu suussusersineqanngitsunik tigummiaqartoq aamma tigusarineqarpoq

Hashimik nunatsinnut eqqusseriartut marluk Ilanngaaserisunit marlunngormat tigusarineqarput

Politiit ilanngaaserisunit nalunaarummik siullermik nal. 12.12 tigusaqarput, pigaartut pisortaat Lars Even oqaluttuarpoq. Timmisartumi ilaasup ataatsip nassataani kokaineqarsoralugu ilanngaaserisut pasilliigaluarput.

Politiit kokainimik nassaanngillat, hashili 548 grammiusoq poortukkanut marlunnut agguataarsimasoq nassaarivaat.

Tamatuma saniatigut nillujuitsoq imerfillu imerpalasumik suussusersineqanngitsumik imallit oqartussanit nassaarineqarput, aanngajaarniutaasinnaasorlu misissuiffigineqassaaq.

- Angut tigummigallarneqarpoq, pinerlunnermilu peqataasumik taasivoq, taannalu aam tigummigallarneqarpoq. Taamaattumik suliaq taanna pillugu inuit marluk tigummigallagaapput, Lars Even oqarpoq.

Politiit ilanngaaserisumiit allamik, nalunaartoqareernerata kingorna timmisartumut Danmarkimeersumut ilaasumik, nalunaarfigineqaqqipput.

Nalunaarut arnamut 70-it missiliorlugit ukiulimmut tunngavoq, taanna kuffertiminittaaq hashimik nassaarfigineqarpoq.

Haship oqimaassusaa politiinit 296 grammisut naatsorsorneqarsimavoq. 

Aanngajaarniutit pillugit inatsimmik unioqqutitsinertut arnaq pasineqarpoq, kingorna iperagaalluni, pigaartut pisortaat oqaluttuarpoq.