Kuannersuarni suliaq pillugu aatsitassarsioqatigiiffiup Kalaallit Nunaat sakkortuumik isornartorsiorpaa

Kalaallit Nunaata aamma australiamiut aatsitassarsioqatigiiffiata Energy Transition Mineralsip (EMT) Kuannersuarmi, Kalaallit Nunaata kujataaniittumi aatsitassanik piiaanissaq ukiuni sisamani affarmilu isumaqatigiinngissutigaat.

Naalakkersuisut suliamut akissuteqarlutik allagaat marlunngorpat tunniunneqartussaagaluartut, aalajangiinissaq kinguartinneqartussanngorpoq.

ETM naapertorlugu Naalakkersuisut akissutiminnik tunniussinissamut sapaatip-akunnerinik arfineq-marlunnik piffissamik sivitsuipput.

Akissutip allagaqaataa naammassineqareersoq naalakkersuisunit akuerineqartinnani qallunaatuumiit kalaallisut nutserneqaqqaartariaqarnera, kinguartitsinermut tunngaviusoq tassaavoq.

Naalakkersuisut isumaqarput kingusinnerpaamik decembarip 15-ianni tamanna pissasoq.

ETM-ip tusagassiutitigut nalunaarummi oqaatigaa paasiuminaatsikkaat Naalakkersuisut taakkualu qallunaat eqqartuussissuserisui nutserisoqarnissaanik suli isumaginnissimannginneri.

Pisortaaneq Daniel Mamadou naapertorlugu tamanna suliap suliarineqarneranik piaaraluni kinguarsaaneruvoq.

- Taamaattumik suliaq unitsiinnarniarlugu eqqartuussivimmut suliassanngortitsivugut, naatsorsuutigaarpullu suliamik kinguartitsiniarsarineq tamanna eqqartuussivimmit itigartinneqarumaartoq, oqarpoq.

- Suliaq eqqartuussivimmut suliassanngortinneqalerpoq. Malersuineruvoq, tamannalu ETM-ip Kalaallit Nunaannit anisinniarneqarneranik ersersitsivoq suliap sapinngisamik sivisunerpaamik kinguartinneqarneratigut. Suliarput saqqummiupparput, suliarineqarnissaalu piareersimaffigaarput, oqarpoq.

ETM-ip paasissutissaatai naapertorlugit 2007-imiilli, saffiugassanik aatsitassanillu nalilinnik ujaasinissamut akuersissummik pissarsinermi kingorna, Kuannersuarni 1 milliard koruunit sinnerlugit atoreersimavaat.

Aatsitassarsioqatigiiffiup saffiugassanik piiaasinnaatitaanera pillugu, Kalaallit Nunaata ETM-illu isumaqatigiinngissutigaat.

Kalaallit Nunaanni sumiiffinni uraninik akoqartunik, soorlu Kuannersuarni, aatsitassarsiornissaq 2021-mi inerteqqutigineqalerpoq.

Inatsit nutaaq naapertorlugu piiaaffimmik pilersitsisinnaajunnaarneq pissutigalugu, ETM-ip tamanna milliardilikkaanik taarsiivigineqarnissamik pisinnaatitaaffiginerarpaa.

RITZAU