KL

DK

Nakuuserneq hashilu pillugit suliami katsorsarneqarnissamik pineqaatissiisoqarnissaa unnerluussisup kissaatigigaa

Angut 28-nik ukiulik ilaatigut nakuusernerit arlallit pillugit eqqartuunneqartussanngorpoq, aamma hashi pillugu aaqqiaginngittoqarnerani savimmik kapineqarsimavoq. Angut katsorsarneqarnissamik pineqaatissinneqarnissaa unnerluussisup piumasaraa.

Eqqartuussineq sapaatip-akunnerani matumani ataasinngornermit pingasunngornermut Sermersuup Eqqartuussiviani ingerlanneqassaaq.
Thomas Munk Veirum
Tusagassiortoq
Saqqummersinneqarpoq

Ataasinngornermi eqqartuussineq ulluni pingasuni Nuummi Eqqartuussisoqarfimmi Sermersuumi ingerlanneqartussaq aallartissaaq.

Angut pissutsini 21-ni pinerluttuliornernut unnerluutigineqarpoq, unnerluussut naapertorlugu 2022-mi novembarimit 2023-mi septembarimut pisimasuni.

Hashimik tuniniaasutut unnerluutigineqarnermit nakuusernernut arlalinnut tillinniarnernullu unnerluutigineqarnerit pineqarput.

Angut hashimik 25 grammimik 5.000 koruuninillu, 2022-mi novembarip 30-ani hashimik tuniniaanermi pissarsiarineqarsimasunik, tigumminnittutut unnerluutigineqarpoq.

2023-mi januaarip 21-ani angut igalaamik aseruisimasutut unnerluutigineqarpoq, ukiumilu tassani februaarimi arnamik nakuuserfiginnissimasutut arlalitsigullu allatigut nakuusersimasutut unnerluutigineqarpoq.

Aammattaaq imigassanik aalakoornartortalimmik iPhonenillu akisuunik arlalinnik tillissimasutut unnerluutiginninnermik unnerluussut imaqarpoq.

Aqqanileriarluni savimmik kapineqartoq

Unnerluutigineqartoq aamma 2023-mi juulimi hashimik tillinniariarsimasutut unnerluutigineqarpoq. Tillinniariaraluarnermili aqqanileriarluni savimmik kapineqarpoq inuuneralu navianartorsiorluni.

Maanna 28-nik ukiulik Nuup ilaani Nuussuarmi aqqusinermi persuttarneqarsimasoq siumorneqarmat, pisimasoq tamanna tamanut saqqummiunneqarpoq.

Angut 28-nik ukiulik piffissami killiligaanngitsumi Danmarkimi tarnikkut nappaatilinnut napparsimmavimmi katsorsarneqarnissaa unnerluussisussaatitaasut kissaatigaat.

tyveri retssag psykiatrisk behandling vold inuiaqatigiit hashhandel samfund

ATORFIIT Se alle jobs

Powered by Labrador CMS