Nakuuserneq ikiaroornartorlu pillugit suliami angut katsorsarneqartussanngortinneqarpoq

Angut 28-nik ukiulik ilaatigut hashimik tuniniaasimasutut, arlaleriarluni nakuusersimasutut kiisalu imigassamik aalakoornartulimmik iPhonemillu tillissimasutut unnerluutigineqarpoq.

Unnerluutigineqartoq aamma inummut allamut hashimik ujajaariaraluarsimasutut unnerluutigineqarpoq. Ujajaaniarnermi eqqissiviilliortoqarpoq, angullu taanna aqqanileriarluni savimmik kapineqarami toqussutaasinnaasumik ajoquserpoq. Nuummi Nuussuarmi savimmik kapisineq pivoq, tassani angut ajoqusersimasoq aqqusinermi siumorneqarluni.

Ataasinngormat eqqartuussivik suliami aalajangiivoq, unnerluussullu naapertorlugu 28-nik ukiulik pisuutinneqartoq, Kalaallit Nunaanni Politiit Sermitsiamut ilisimatitsipput.

Angut sivisunerpaaffissaligaanngitsumik tarnikkut nappaatillit napparsimmaviani katsorsarneqartussanngortinneqarpoq.

Unnerluussaasoq maannalu eqqartuussaasoq tarnikkut nappaatinik misissuisarfimmit, unnerluussap eqqarsartaasianik misissuisimasumit, inassutigineqartoq malillugu katsorsarneqartussanngortinnissaa politiit kissaatigisimavaat.

Eqqartuussut politiit naammagisimaarpaat, unnerluussisussaatitaasummi piumasaqaataa naapertorlugu unnerluutigineqartoq pisuutinneqarmat.