Naleraq Maniitsumi atuartunut angajullernut immikkut nutaamik atuarfiliorusuppoq
Atuartut minnerit annerillu immikkut atuafeqarnissaat Maniitsumi innuttaasut kissaatigaat. Meeqqat angajulliit immikkut atuarfittaarnissaat Maniitsumi innuttaasut kissaatigalugu oqariartuutigaat. Tamanna tunngavigalugu Naleqqameersup Karl Lyberthip kommunalbestyrelsimut siunnersuutigaa.
Atuarfik Kilaaseeqqap iluarsartuunneqarnissaata pilersaarusiorneqarnera malillugu hovedprojekt junip qiteqqunnerani 2024 siunnersuisartunit kommunimut tunniunneqartussaasoq tunniunneqarpoq massakkullu misissoqqissaarneqara ingerlanneqaleruttorluni.
Foto: Dorthea Reimer-Johansen
Karl Lyberth Naleqqameersup, Qeqqata Kommuniani kommunalbestyrelsimi ilaasortap innuttaasut kissaataat tusarlugu Maniitsumi atuartut angajulliit immikkut nutaamik atuarfittaarnissaannut kommunalbestyrelsip ataatsimiinnissaanut siunnersuuteqarpoq.
Innuttaasut nammineq aaqqissuussaminnik ataatsimiinneranni imaqarniliamut innersuussivoq:
- Innuttaasunit ataatsiisitsisimanermi imaqarniliaq kommunemut nassiunneqartoq ingerlateqqitaq innersuussutigalugu matumuuna kissaatigaara Maniitsumi meeqqanut atuarfeqarneq kommunalbestyrelsip tulliani ataatsimiinnissaani oqaluuserisassanut ilanngunneqassasoq.
Innuttaasut kommunalbestyrelsimut saaffiginninnerat ataqqillugu neriuutigivara oqaluuserisassanut saaffiginnissutaat ilanngunneqassasoq.
Atuartut minnerit annerillu immikkuussasut
Maniitsumi innuttaasut nammineq aaqqissugaanni ataatsimiinnermi, maajip ulluisa 30-anni pisumi innuttaasut oqariartuutigaat atuartut minnerit annerillu immikkut atuarfeqarnissaat toqqissisimanartillugu.
Siornatigut Kuuttartup Atuarfiata atuunnerata nalaani pissutsit
toqqissisimanartut misigineqartarsimaneri aammalu meeqqanut mikinernut
angusaqarfiulluartarsimaneri iluatinnartutut isigalugu.
Aallaqqaataaniit
Atuarfik Kilaaseeqqap nutarsarneqarnissaa ukiaru aallartissangatinneqarpoq. Ammasumik suliariumannittussarsiuussineq aggustip ulluisa 23-annut killeqartinneqarpoq. Qinnuteqartoq akuerineqarpat nutarsaaneq ukiaru aallartissangatinneqarpoq, 2017-milu naammassissangatinneqarluni.
Innuttaasut nutaamik atuarfiliornissamik kissaataat Qeqqata Kommuniani kommunalbestyrelsimit ilalerneqarpat tusarniaanerit aallaqqaataaniissapput:
- Atuarfik Kilaaseeqqap nutarsarneqarnissaanut pilersaarut allanngortinneqassappat pisariaqassaaq atuarfimmik atuisunik susassaqartunillu aallaqqaataaniik isumasiuinerup pilersaarusiornerullu ingerlanneqarnissaat. Pilersaarusiornermi iliuusissatut aaliangiunneqartut ullumikkut aaliangerneqarsimasunit allaanerussagaluarpata imaluunniit atuarfimmik nutaamik sanasoqarniarpat siunnersuisartunik neqeroortitsisoqaqqaassaaq, tamatuma kingorna projekt-imik suliaqartitsisoqassalluni.
- Taamaattoqassappat illut ullumikkut atuartitsiffiusut pilersaarutaasumiit suli sivisunerusumik atorneqarnissaat naatsorsuutigineqassaaq.
Atuartut ilinniartitsisullu ataatsimoornerat
Allaffeqarfiup aamma nalilerpaa siunissami atuartut ilinniartitsisullu ataatsimoorpata ataqatigiinnerannut iluarnerpaajussasoq. Kommuni naapertorlugu agguluttornerat maannamut utaqqiisaasumik akuersaarneqarsinnaagaluartoq, allaffeqarfiup innersuussutigaa atuartut ataatsimooqqilernissaat atuarfik tamakkiisumik iluarsartuunneqareerpat.
