KL

DK

Namminiilivinnerup kingorna naalagaaffimmit suli tapiisoqartassasoq ilisimatusartuuneq naliliivoq

Kalaallit Nunaat Danmarkimiit avissaareerarluarluni naalagaaffimiit tapiissutinik suli pisassasoq Diis-imi ilisimatusartuuneq Ulrik Pram Gad isumaqarpoq.

- Piviusunik tunngaveqarluartunik peqanngikkaluarlunga ukiut pingasut, tallimat qulilluunniit qaangiuppata Kalaallit Nunaat naalagaaffittut namminiilivissimassasoq eqqoriarsinnaavara. Kiffaanngisusseqarluni suleqatigiinnissamik aaqqiisoqarsimassasoq tunngaviusumillu naalagaaffimmit tapiisoqartarluni, Ulrik Pram Gad oqarpoq.
Ritzaus Bureau
Saqqummersinneqarpoq

Kalaallit Nunaata naalagaaffeqatigiinnermut ilaaginnarnissani iluaqutiginerpaassavaa, nunali namminiilivikkusuppat Danmark akornutaassanngilaq.

Misissueqqissaartarfiup Voxmeterip Ritzau sinnerlugu misissuinerani taamatut inerniliisoqarpoq.

Apersorneqartut 18-ileereersimasut 1065-iusuni 64 procentit Kalaallit Nunaata naalagaaffeqatigiinnermiiginnarnini iluaqutiginerpaassagaa isumaqarput. Kalaallit Nunaatali namminiilivinnissaq kissaatigippagu Folketingip akuerissagaa 58,8 procentit isumaqarput.

Danmarkimi qallunaat Kalaallit Nunaat pillugu isumasiorneqartarnerat pissutaalluni kalaallit Danmarkip aqutsiniarnerartarnerannik oqariartuuteqartarnerannut uppernarsaataasoq Ulrik Pram Gad, Danmarkimi nunanut allanut tunngasunut misissuisoqarfimmi (DIIS) ilisimatusartuuneq, isumaqarpoq.

Pisut uppernarsaraat

- Danmarkip pissusilersuutai Kalaallit Nunaanni taamatut isumaqartoqarneranut uppernarsaataapput. Tassalu naalagaassagutta aatsaat asassavatsigit, oqarpoq.

Inatsisartunut ukioq manna qinersisoqalerpat namminiilivinnissaq sammineqartorujussuussasoq taassuma naatsorsuutigaa.

USA-p præsidentissaata Donald Trumpip Kalaallit Nunaat Amerikamit aqunneqarnissaanik pigilerneqarnissaanillu kissaateqarnera Naalakkersuisut siulittaasuat Múte B. Egede sapaatip-akunnerini kingullerni arlaleriarluni erseqqissumik oqaaseqarfigaa.

- Inuiattut siunissarput naalagaafinngornissarpullu uagut nammineq ilutsinni suliassaraarput, Múte B. Egede marlunngornermi Facebookimi allappoq.

- Danskit, amerikamiut allarpassuillu isumaqarsinnaapput, uisakajaartunulli sunnertinnata, nammineerluta allanillu tikkuartuigata isumatusaartumik siunissarput pillugu aalajangiissaagut.

Amerlanerussuteqartut naalagaaffiup tapiisarnera akerlerigaat

Danmarkip ataatsimoortumik tapiisarnera attatiinnarlugu Kalaallit Nunaanni politikerit kalaallit qinersisartut takorloorsinnaasaannik siunnerfeqassasut Ulrik Pram Gad isumaqarpoq.

- Taamaanngippat kalaallit taasitinneqarpata naaggaartoqassaaq. Kalaallit Nunaanni isumasiuinerit takutippaat namminiilivikkusuttoqartoq, tamannali atugarissaarnerup ajorseriarneranik kinguneqassanngitsoq innuttaasut isumaqarput, oqarpoq.

Voxmeterip misissuinerani aperineqartut 71,3 procentiisa Kalaallit Nunaat namminiilivippat Danmarkip aningaasatigut tapiisarnini attatiinnassaraa naaggaarpaat.

- Qallunaat Naalakkersuisuisa ataatsimoortumik tapiissutit ingerlaannassasut qallunaanut nassuiaatigisariaqarpaat

Taamatulli pisoqarnissaa ilimanaateqanngilaq, Ulrik Pram Gad naliliivoq.

- Piviusunik tunngaveqarluartunik peqanngikkaluarlunga ukiut pingasut, tallimat qulilluunniit qaangiuppata Kalaallit Nunaat naalagaaffittut namminiilivissimassasoq eqqoriarsinnaavara. Kiffaanngisusseqarluni suleqatigiinnissamik aaqqiisoqarsimassasoq tunngaviusumillu naalagaaffimmit tapiisoqartarluni, Ulrik Pram Gad oqarpoq.

- Maanna nunanut allanut ministerip, ministeriunerup partiillu naalakkersuisuutitallit innuttaasut 71 procentii taama pisoqartariaqarneranik nassuiaanissartik suliassaraat, oqarpoq.

Nunasiaateqarunnaarnerup kinguneranik nunat marluk kiffaanngissuseqarlutik suleqatigiissinnanerat isumaqatigiissutigineqarsinnaavoq.

Danmarkip Kalaallit Nunaat ukiumut 4 milliardit koruunit missaannik tapiiffigisarpaa.

/ritzau/

rigsfællesskabet inuiaqatigiit samfund selvstændighed ulrik pram gad bloktilskud

ATORFIIT Se alle jobs

Powered by Labrador CMS