Naalagaaffiit tusagassiutillu nunani tamalaaniittut USA malinnaavigeqqissaarpaat. Trump Det Hvide Husimut januaarimi isertissaaq, isertereerpallu susoqassanersoq sumi tamaani isumaliutigineqarpoq.
Taamaammat sapaatip-akunnerani kingullermi nunanut allanut tunngasunut naalakkersuisoq Vivian Motzfeldt (S) apeqquteqaateqarfigineqarmat Inatsisartuni apeqqarissaarnerit pissanganarnerupput. Apeqqarissaarneq Inatsisartut nittartagaatigut kikkunnit tamanit malinnaaffigineqarsinnaavoq. Taamaakkaluartoq præsidentimut qinersineq pillugu apeqqutit marluinnaapput.
Naalagaaffiit tusagassiutillu nunani tamalaaniittut USA malinnaavigeqqissaarpaat. Trump Det Hvide Husimut januaarimi isertissaaq, isertereerpallu susoqassanersoq sumi tamaani isumaliutigineqarpoq.
Taamaammat sapaatip-akunnerani kingullermi nunanut allanut tunngasunut naalakkersuisoq Vivian Motzfeldt (S) apeqquteqaateqarfigineqarmat Inatsisartuni apeqqarissaarnerit pissanganarnerupput. Apeqqarissaarneq Inatsisartut nittartagaatigut kikkunnit tamanit malinnaaffigineqarsinnaavoq. Taamaakkaluartoq præsidentimut qinersineq pillugu apeqqutit marluinnaapput.
- Tusagassiortut qallunaat kisimik soqutigisorujussuuaat, Naleqqap siulittaasua AG-mit Amerikami pissutsit pillugit sooq nammineq politikkerillu allat apeqquteqannginnersut aperineqarami oqarpoq.
Nunamut attuumassuteqartuuneq
Pele Brobergip periarfissaq atorluarlugu namminiilivinnissaq kalaallillu inuiaat qanoq nassuiarneqartarnerat pillugit apeqquteqarpoq. Sammisat Pelep tullersortaatalu, parteeqataata Hartmann Heilmannip, Vivian Motzfeldtimut apersuutigiinnaavitaat.
Pele Brobergili namminiilivinnissaq pillugu taasititsisoqarpat kikkut peqataasinnaassasut nammineq qanoq isumaqarpa?
- Inuiaat kalaallit, naatsumik akivoq.
- Kalaallit Nunaanni innuttaasut 56.000-it missaanniittut akornanni nunanit allaneersut qallunaallu 4.000-5.000-it namminiilivinnissamut taasisinnaatitaanngillat?
– Aap, taamatupajaaq, Pele Broberg akivoq.
- Namminiilivinnissaq akuerineqarpat innuttaasut kalaalliunngitsut qanoq pineqassappat?
- Matumani nunamut attuumassuteqarneq pingaaruteqarpoq. Nunasinikut angerlartiinnarneqassanngillat. Japanimiu oqaatsinik kulturimillu ilinniarsimasoq ukiorpassuarnilu maani najugaqarsimasoq pineqarsinnaavoq. Taanna piumasaqaatit kinaassusersiunngitsut atuutilersinneqartut malillugit kalaallisut innuttaassuseqalernissamut qinnuteqarsinnaavoq, Pele Broberg akivoq nangillunilu: - Kalaallilli Nunaanni innuttaassuseqaleruit nunami allami innuttaassutsit atorunnaarsissavat.
- Inuk 1 procentimik 100 procentimilluunniit kalaaliunersoq apeqqutaanngitsoq Siusinnerusukkut oqarnikuuvutit. Suli attappiuk?
- Aap, soorunami.
- Marloqiusamimmi innuttaassuseqarneq?
- Taanna aaqqiissut FN-imiit innersuutigineqanngilaq, Pele Broberg akivoq.
Taassumattaaq Kalaallit-Qallunaat Namminersornermut Ataatsimiititaliarsuata 2008-mi “Kalaallit Nunaanni Namminersorneq” pillugu isumaliutissiissutaa 609-nik quppernilik innersuussutigaa.
- Inuit marloqiusamik innuttaassuseqartut sapinngisamik ikinnerunissaat inatsisit tunngavigalugit kissaatigineqarpoq, taamaammallu inuit kalaallisut innuttaassuseqartut Danmarkimi innuttaassutsiminnik annaasaqarpata tamanna ileqqoreqqusanut naapertuutissaaq, tamanna nalunaarusiami Pele Broberg naapertorlugu allassimavoq.
Ajuallatsitsineq
Pele Brobergip innuttaasunik taasisitsinissaq inuiaallu kalaallit pillugit ukiorpaalunni oqallissaariniartarnikuuvoq. Maannamulli suli paasinarsisoqanngilaq. Kina taasissanersoq – qanorluunniit paasineqassanersoq.
Oqallissaarut una soqutigineqarpallaanngilaq. Sooq taamaassoraajuk?
Arlallit akerliujumanngimmata. Qallunaat ajuallatsikkumannginnamikkit. Qallunaalli amerlasuut namminiilivinnissamik ilungersuuteqarnitsinnik tapersersuipput, Pele Broberg akivoq, namminerlu arni qallunaajusoq eqqaavaa.
- Qallunaajusutut misigivoq, isumaqarpungalu qallunaat amerlanerit aamma taama misigisut, erseqqissaavoq.
Pele Brobergip ammasumik oqallittoqarnissaa neriuutigaa, namminersornerlu pillugu ataatsimiititaliarsuup nalunaarusiami apeqqutip samminissaa annilaanngatiginngikkaa erseqqissarpaa.
– Inuit kikkut kalaallisut innuttaassuseqalersinnaanersut taamaalillunilu qallunaatut innuttaassutsiminnik annaasaqarsinnaanersut aalajangersarneqassasoq Danmarkip Kalaallit Nunaatalu akornanni isumaqatigiissummi pingaaruteqartoq tassani allassimavoq, Pele Broberg nassuiaavoq.
Ammip qalipaata apeqqutaatinnagu
Pelep parteeqataatalu Hartmann Heilmannip Vivian Motzfeldt apeqqarissaarfigineqarmat apeqqummik ataatsimik aperisaqattaarpaat, tassa qallunaat »ukiup affaani maani najugaqaramik« kalaallinut ilaalersinnaanersut.
Assersuutigalugu Inatsisartunut qinersisinnaatitaanermut malittarisassat inatsisitigut erseqqissarneqarsimasut, namminiilivinnermullu tunngatillugu taasisoqarsinnaanera tunngaviusumik inatsisiliornermut atatillugu sammineqarsinnaasoq Vivian Motzfeldtip eqqaavaa.
- Siullertut nunami maani najugaqarnissamut assigiinngitsunik tunngavissaqarpoq. Aamma nunamut attumassuteqartuunissamut assigiinngitsunik malittarisassaqarpoq, assersuutigalugu piniarnermut, aalisarnermullu takornariartitsinermullu tunngatillugu. Malittarisassat taakku qanorluunniit amikkut qalipaateqarneq apeqqutaatinnagu atuupput, Vivian Motzfeldt nassuiaavoq erseqqissarlugulu apeqqarissaarnermi Siumut pinnagu Naalakkersuisulli sinnerlugit peqataalluni.
Naleraq Inatsisartuni ilaasortanit 31-usunit tallimanik qinigaatitaqarpoq.
