”KIKKUT
ILLERSORALUARAANNILUUNNIIT” ukioq manna sakkortoqisumik aallartippoq, paasissutissarpassuillu
sunit tamaniit nassiussuunneqartut immikkoortikkuminaassinnaapput.
Taamaannat ukioq
manna nersornaasiinerit takullugit assut nuannaajummernarput.
”KIKKUT
ILLERSORALUARAANNILUUNNIIT” ukioq manna sakkortoqisumik aallartippoq, paasissutissarpassuillu
sunit tamaniit nassiussuunneqartut immikkoortikkuminaassinnaapput.
Taamaannat ukioq
manna nersornaasiinerit takullugit assut nuannaajummernarput.
Peqatigiiffinneeraluarpata
kommunimeeraluarpataluunniit nersornaatinik assigiinngitsunik pissarsisut
soorlu pissarsinerannut tunuliaqutaasoq atuarlugu allamut saasaatitsialaavoq. Suli
inoqatinik pingaartitsisoqarluarpoq. Uivernermi tamanna eqqaamatigu.
AG-mi sapaatip
akunnerani kingullermi saqqummertumiinnaq nersuinerit nersornaasiinerillu
assigiinngitsut pillugit Unniami tallimanik allaaserisaqarpugut. Timersornermut,
ukiorpassuarni peqatigiiffilerinermut, immikkut ittumik peqatigiiffilerinermut,
suliniuteqarnermut ilungersuussilluarnermullu nersornaasiisoqarpoq. Nunatsinnilu
tamani nersornaasiisoqarluni.
Politimesterip
Bjørn Tegner Bayip inuit ikiuukkumatunerat tupaallaatigiuaannarlugu sapaatit
akunneri amerlavallaanngitsut matuma siorna allaaserisatta ilaani oqaatigaa.
Inuiaqatigiinni
qanorluunniit inissisimagaluaraangatta immitsinnut ikiorluartarpugut. Piffissaq
paatsiveerunnarsinnaatillugu piginnaasaq taanna attatiinnartigu.
KAJUMISSUTSIMIK SULINEQ ikiorneqartumut
iluaqutaaginnanngilaq – aammali ikiuisumut iluaqutaasarpoq. Suliniut
suugaluarpalluunniit.
Kajumissutsimik sulineq siunertaqarnermik, ataatsimoornermik
inuttullu ineriartornermik misigititsisarpoq. Inuit ataasiakkaat
misigeqatiginnissinnaanerannut nukittorsaataallunilu allat inuunerminni
atugarisaannik paasinninnermik kinguneqartarami ataatsimoornerulersitsisarpoq.
KAJUMISSUTSIMIK SULINEQ inuiaqatigiit ingerlalluassappata
pingaaruteqarpoq. Innuttaasut kajumissutsiminnik suliniuteqarpata najukkami
innuttaasut ilaatitsinerulissapput, sumiiffimmillu kikkut tamarmik
takuneqarlutillu tusaaneqarfigisinnaasaannik pilersitsissaagut. Assigiinngisitsinermittaaq
annikillisaasinnaallunilu pisariaqartitsinerpaat inuunerisa pitsaassusaannut
pitsanngorsaataasinnaavoq. Naatsumik oqaatigalugu kajumissutsimik sulineq inuit
akornanni atassusioqataallunilu inuiaqatigiit akornanni ataqatigiinnermut
nukittorsaataavoq.
TAMANNA nunatsinni inuit ungasilligaluttuinnarfianni
pisariaqarluinnalersinnaavoq. Matumani kajumissutsiminnik suliaqartut
suliniutaat ungasikkaluaraanniluunniit atassuteqalersitsisinnaallunilu
tapersersuinermik ataatsimoornermillu pilersitsisinnaavoq. Kajumissutsimik
suliaqartut tassaakkajunnerusarput nunami avinngarusimasunik inoqarfilimmi
issittumilu ikiorneqarnissamik pisariaqartitsinermi ikiuuttartut, ataatsimoornermilu
pisuussutitut nalissaqanngitsutut inissisimapput.
KAJUMISSUTSIMINNIK SULISUT persuarsiutiginiarlugit
ataatsimooraangatta ileqqumik pitsaasumik pilersitsisarpugut. Tunniusimaneq
iluaqutaasoq takutittarlugulu allat ataatsimoornermut ilanngutsinniarlugit
kajumissaartarpagut. Taamaammat nersornaasiinerit nersornaatisisullu
nuannaarutiginiartigit. Kajumissutsiminnik sulisut angusaat inuiaqatigiinni
atatitsisuupput – nersorinninnerpullu naapertuuppoq.
