Nannunik qanillattortunik pisarinnissinnaaneq Inatsisartut ajornannginnerulersinniarpaat
Inoqarfinni nannut tikiuttut qimaatinniarsareqqaarnagit
akuersissuteqaqqaanngikkaluarluni takunneqqaartumit pisarineqarsinnaalernissaannik inatsisit nutaat periarfissaqarnerulersitsissapput.
Piffissami kingullermi nannut Kalaallit Nunaanni sumiiffinni arlalinni inunnut inoqarfinnullu qanillattortarsimapput. Aana Qoornumi nanoq.
Assi nammineq pigisaq
Nannunik toqutsinermut malittarisassanik sakkukilleeqqusinermik Naalakkersuisut peqquneqassapput. Inoqarfinnut nannunik qanillivallaartunik arlaleriarluni pisoqartareersorlu Inatsisartut taama aalajangerput.
Kujataani savaatillit nannunit qanillattorneqarnerat pissutigalugu siunnersuut ullumi novembarip 13-iani akuersissutigineqartoq Mariane Paviasenimit (IA) siunnersuutigineqarpoq.
Malittarisassat allanngortinneqartariaqarnerat Inatsisartuni aalisarnermut, piniarnermut nunalerinermullu ataatsimiititaliami ilaasortat tamarmik isumaqatigiissutigaat.
- Siunnersuutip akuerineqarnera soorunami nuannaarutigaara, taamaalilluni nannut ajoqusiinnginnerini iliuuseqarfigineqarsinnaalissammata, Mariane Paviasen oqarpoq.
Kikkut tamarmik akuersaarnerat tupaallaatigaajuk?
- Naamik, tamanna tupaallaatiginngilara, Kujataaniinnaanngitsormi aamma allani ajornartorsiuteqartoqartarmat tamannalu oqallisigineqangaartarmat.
Qimaatinniarsarinngikkaluarlugu pisarineqarsinnaasoq
Savaatillit inoqarfiillu allat nannunit qanillattorneqartut akuersissummik qinnuteqaqqaanngikkaluarluni nannunillu qimaatitsiniarsarinngikkaluarluni inatsisit nutaat pisaqarsinnaalersitsissapput.
- Soorunami neriuutigaarput siunissami nannunik savaateqarfinnut taama qanitsigisumiittunik takkuttoqaqqinngisaannassasoq, taamaattoqassagaluarpalli maannakkut pisarineqarsinnaalissapput, inoqarfimmut tulliuttumut ajornartorsiut ingerlateqqiinnarnagu, Mariane Paviasen oqarpoq.
Taava neqi najukkami agguaanneqassaaq, nannullu sinnera piniartumut tunniunneqassalluni.
Nannut pillugit politikki
Tamatuma saniatigut Anders Olsenip (S) Kujataani nannuttassiissutit amerlineqarnissaat ajornartorsiutip aaqqiiffiginissaanut siunnersuutaa Inatsisartuni oqaluuserineqarpoq.
Nannuttassat amerlineqarnissaat, kujataaniinnaanngitsoq, Kalaallit Nunaannili tamarmi atuutissasoq, ataatsimiititaliap isumaqatigiilluni Naalakkersuisut kajumissaarpai.
Nannut pillugit paasissutissat amerlanerusut, 2025-mi saqqummernissaat naatsorsuutigineqartut, Naalakkersuisut utaqqeqqaarumavaat, tamannalu tunngavigalugu naleqqussaanissaq pisariaqarnersoq eqqarsaatersuutigineqassaaq.
