Nannunut upalungaarsimaneq Kujataani pilersinneqalersoq

WWF ulluni makkunani Qaqortumut tikeraarpoq, innuttaasut nannunut upalungaarsimanissamik pilersitsiniarluni. WWF-ip innuttaasut, ingammik illoqarfiup avataani najugaqartut toqqissisimanissaat sillimaniarnissaallu annetusarniarpaa. WWF tikeraarnermini nannunut qimaasitsisinnaasunik sakkunik innuttaasunut agguaassaaq.

Piffissami qanittumi nannut nunatta kujataani takussaapput, ilaatigummi allaat Qaqortumi illoqarfimmi angalaartoqarluni.

Kujataani innuttaasut nannunik saassunneqannginnissaq anguniarlugu sakkussanik pissarsissapput.

WWF ulluni makkunani Qaqortumiippoq, nannunut upalungaarsimaneq pilersinniarlugu.

Tikeraarnerup ilaatigut siunertaraa innuttaasut, pingaartumik illoqarfiup avataani najugaqartut toqqissisimanerulernissaat isumannaannerunissaalu qulakkeernissaat.

Sakkut qimaatitsisinnaasut

Innuttaasut nannunut qimaatitsisinnaanissaminnut sakkussaminnik tuniorarneqassapput. Sakkut ilaatigut siggartaataapput, ajornartoornermi qummoroortoq, ajornartoornermi aallaat nalunaaqutersuut imassallu.

-  Ittoqqortoormiini nannunik alapernaarsuiartortitatut ukiuni arfineq marlunni ingerlatsisimavugut, aammalu inuit nannunut illersorsinnaanissaanut misilittagaqarluartuulluta,  WWF-p Kalaallit Nunaanni suliniutaanut ataqatigiissaarisoq Malene Lynge oqarpoq nangillunilu:

- Misilittakkagut Ittoqqortoormiinit, Canadamit Alaskamiillu misilittagarilikkagut  pillugit avitseqateqarnissaq kissaatigaarput. Taamaattumik nannunik alapernaarsuiartortitat Qaqortumut qaaqqusimavagut, tassani inuit nannut pissusilersuutaanut pitsaanerusunut tunngatillugu paasissutissanik tunniussinnaammata.

WWF-ip innuttaasunik ataatsimiisitsinera pingasunngornermi juunip ulluisa 26-anni nalunaaqutaq 16.00-18.00 Campus Kujallermi aaqqissuunneqassaaq. Tassani nannunut illersuutaasinnaasut takuniarneqarsinnaapput.

Powered by Labrador CMS