Nannut takussaalerneri: Kommune Kujalliup nannuttassat minnerpaamik qulinut qaffannissaanut kissaateqarpoq

- Asasara Aalisarnermut piniarnermullu Naalakkersuisoq, Kim Kielsen

Kommune Kujallermi borgmesteri, Stine Egede (IA) taama allagaqarluni aallartippoq. Taanna nannuttassat kommunimi amerlineqarnissai kissaatigalugit Aalisarnermut Piniarnermullu naalakkersuisumut, Kim Kielsenimut (S) allagaqarpoq. 

Nunatta Kujataani innuttaasut kujataani nannunik ukiuni kingullerni naammattuuisaqattaarput, ilaatigut nanoq arnaviaq piaralik Nanortalimmi illoqarfiup iluani takuneqarluni.

- Ukiuni kingullermi, pingaartumik 2024-mi Nunatta Kujataani Nannut assut amerlisimanerat malunniukkiartorpoq. Amerlisimangaarmata nannut arnavissat suli ukioqalersimanngitsunik piaqqisarlutik inoqarfinnut annguttarnerat nalinginnaaleriartorpoq, Stine Egede allappoq nangillunilu:

- Uumasut suulluunniit anginerit, pingaartumik nannut, piaqqerillutik ulorianarluinnarsinnaasarput, tamakkulu naammattooriasaaraani ajorluinnartumik pisoqariaanaavoq.

Nannut kaattut

Borgmesteri naapertorlugu kujataani innuttaasut maluginiarsimavaat nannut illoqarfinnut appakaannissaminnut qunujunnaarsimasut, kaakkamik. 

Tamatuma saniatigut kommunitsinni savaateqarfinnut apuuttartut amerliartuinnarput. Ukioq mannalu marlussoriarluni inunnut ajorluinnartumik kinguneqangajassisoq, nalaatsornerinnakkut pinngitsoortinneqarsimasimasumik aamma allaaseraa.

- Inuit aarlerillutik nunamut angalaniarunnaarput, tuperiarnissaq ornigineqarunnaarpoq, aasaaneranimi inuit ilaat tuperlutik aalisakkanik panertiteralutik ukiussamut eqqanaarsartarput. Tamakkulu pisinnaajunnaarpata inuiaqatigiit inuusaasiannut pissaqarniarneranullu annaasaq imaannaanngitsuussaaq. Pilisarnerup piujuarnissaa illersortariaqarpoq.

- Aalisartut, piniartut savaatillillu taakkuupput nannunik naamattuuigajunnerpaat. Taakkulu oqariartuuteqarput nannut amerlisimaqisut, allaat inuussutissarsiutaannut ajoqutaalersimasumik. Kipparsimaffinni inuit soqutiginagit pilianik tilligartalersimapput, savaateqarfinnilu savat eqqissisimatinneqarunnaarsimallutik.

Pisassat amerlineqarlik

Borgmesteri Stine Egede isumaqarpoq maanna pisassat sisamaasut pissutsinut erloqinartunut qaangiutsitsisinnaanngitsut. Pingaartumik nunaqarfiit kujallerpaat piniarnerinnangajammik inuussuteqartunut suli amerlanerusunik nannuttassinneqarnissaat pisariaqarluinnalernerarpaa.

- Pissutsit erloqinartut qaangerneqassappata maani Kommune Kujallermi ukiumut nannuttassat sisamaanaasut ikippallaarujussuaqaat. Pingaartumik nunaqarfiit kujallerpaat piniarnerinnangajammik inuussuteqartunut suli amerlanerusunik nannuttassinneqarnissaat pisariaqarluinnalerpoq.

- Taamaammat Naalakkersuisunut matumuuna ilungersorlunga kaammattuutigissavara Kommune Kujallermi nannut minnerpaamik qulit ukiumut pisassiissutigineqartalissasut, borgmesteri Stine Egede naggasiilluni allagaqarpoq.