Nanortalimmi nannut qaninaarai
Marlunngorneq ulloq nalinginnaasuusoq Sikkerninnguaq Frederiksenimut tupannartuuvoq. Taassumami nanoq piaraalu angerlarsimaffimmi eqqaralaannguani siumorpai.
Foto: Sikkerninnguaq Frederiksen
Sikkerninnguaq Frederiksen Nanortalimmeersoq marlunngornerup ullaaralaani suliartortilluni naasaqarpalummik tusaasaqalerpoq.
Aallaqqaammut isumaqarsimagaluarpoq qimmiussasoq, nipili tusaasani nipitummat sanimut qiviarpoq. Tupassutigeqisaminik nanoq arnaviaq angisooq piaraalu takuvai.
- Tupaqaanga nilliallungalu, Sikkerninnguaq Frederiksen oqaluttuarpoq.
Nanoq arnaviaq piaraalu meterit tallimat arfinillilluunniit missani qanitsigai.
- Isumaqarlunga angussagaannga, kisianni kaassimagunannginnamik sunngilaannga.
Uumarusuummertoq
Uippallerluni angerlarsimaffimminut utipallappoq. Uumarusuissortutut misigisimalluni. Assani sajuttut matu paarnaaqqasoq matuersaammik ammarniarsaraa, ammarneq ajuleraluarlugu naggataani iluatsippaa.
Naak nannunik siumuinera ullut marluk matuma siorna pigaluartoq, suli tupaqqavoq.
- Nannunilli naammattuuigama anilernerit tamaasa eqqarput qineqqaartarpara, oqaluttuarpoq.
Nanortalimmi nannunik takuneq qaqutigoorpoq. Nanoq arnaviaq piaranilu Nanortallip avannaatungaanut qimaapput, kingornalu takuneqaqqigatik.
