Nappartat dieselimik imallit malinnit amuneqartut – mianersorlusi angalagisi
Nappartat dieselinik imallit malinnit amuneqarsimassagatinneqarput, Glacier Lodge Eqillu eqqaani immamut avalaanneqarsimassagunarlutik. Nappartat marluk nassaarineqarput, arfineq pingasulli suli nassaarineqanngillat. Piffimmi angalasut tamarmik mianersorlutik ingerlaarnissaannik kaammattorneqartut, World of Greenland allappoq.
Nappartat dieselimik imallit Glacier Logde Eqip eqqaani malinnit amuneqarput. Dieselolia illuaqqani atorneqartussaagaluarpoq.
Assi: Topas Travel
Sermip nakkaaneratigut malinnik pilersitsinikkut nappartat tungujortut qaamasut qulit dieseloliamik imallit Glacier Lodge Eqip, Ilulissat avannaani 80 km-erit missaanniittup, eqqaani malinnit amuneqarsimassagatinneqarput.
Taama World of Greenland pisoq pillugu tusagassiuutinut nalunaarummini allappoq.
Nappartat ataasinngornermi piffimmut niuneqarput, tassanngalu illuaqqanut assartorneqartussaagaluarlutik. Marlunngornermili ullaap tungaani nappartat tassaniikkunnaareersimapput, ataaserlu nunamit takuneqarsinnaavoq:
- Qanga qanorlu pisoqarsimanera erseqqissumik ilisimaneqanngilaq, sermilli nakkaaneratigut mallilernerani nappartat malinnit amuneqarsinissaat ilimagineqartoq, World of Greenland allappoq.
Angallattut mianersoqquneqartut
Pingasunngormat nappartanik ujarlerneq aallartinneqarpoq, Air Greenlandillu helikopteriata nappartat marluk sumiiffissivai, taakkulu upalungaarsimasunit qaqinneqarput.
- Naak sukumiisumik ujarlertoqaraluartoq nappartat sinneri arfineq pingasut nassaarineqanngillat, taakkulu avalassimanngikkunik kivisimassasut, World of Greenland allappoq.
Piffimmi angalasut tamarmik mianersoqquneqarput, nappartammi aporlugit navialisitsisinnaapput.
Suliffeqarfik naapertorlugu suliamik ingerlatsisut avatangiisinik kinguneqaatinik nalilersuissapput. Dieselolia katillugit 1.600 liiteri suli, nappartanit seerisimasinnaasoq suli sumiiffissineqanngilaq. Uulia tissussangatinneqarpoq.
World of Greenlandip sermip iigartartup eqqaani nappartanik puttasunik uuliaarluernermilluunniit takunnittut Avannaata Kommuniata avatangiisinut immikkoortuanut – oqarasuaat 387614 imaluunniit World of Greenlandimut oqarasuaat 944300-mut kalerriinissaannik kaammattorpai.
