Navianartut nalilerneqarnerat: Innermik anitsisartoq anitsippat Grindavík eqqorneqarsinnaavoq
Islandimi illoqarfik Grindavík Reykjanesip qeqertaasa ilaanniittoq, innermik anitsisartunik ilisimasallit naapertorlugit qanittukkut innermik anitsiseqqinnermit eqqugaasinnaavoq.
Innermik anitsisoqarsinnaanera pissutigalugu illoqarfiup Grindavíkip eqqaani aqqusineq matuneqarsimasoq assimi takuneqarsinnaavoq.
Imago/Ritzau Scanpix
Sapaatip-akunnerini kingullerni Islandimi qeqertami Reykjanesimi nunap sajunnera annikitsuararsuuvoq, maannali Islandimi Met Officep naliliinerata nutaap takutippaa sapaatip-akunnerini tulliuttuni illoqarfik Grindavík innermik anitsisumik eqqorneqarsinnaasoq.
Islandimi tusagassiuutit ilaat Iceland Review naapertorlugu misissuinermi maluginiarneqarpoq siornatigut maajip 29-annit juunip 22-annut innermik anitsisoqarnera ullumikkullu pissutsit assigiissuteqartut.
Nunap sajunneri annikitsuararsuit
- Akunnerit 24-t kingulliit ingerlaneranni nunap sajunneri annikitsuararsuit qulit qaqqap innermik anitsisartup eqqaani paasineqarput, sapaatip-akunneratalu siuliani 90-it missaanniissimapput. Qaqqap innermik anitsisartup kingullermik anitsinerata nalaani nunap sajunneri ullormut 50-init amerlanerusut nalunaarsorneqartarput. Nunap sajunnera ullut tamaasa annertusiartorpoq, immikkut ilisimasallit naliliipput.
Aarlerinaatit arlallit nunap assingani nalunaarsorneqarsimapput, soorlu illoqarfiup avannaani iluanilu nunami itinersaqalerfiusinnaasut, nunamik sajuffiusinnaasut, lavaqarfiusinnaasut, gasimik mingutsitsiffiusinnaasut nunamilu itersaniffiusinnaasut.
2023-mi decembarimi 2024-milu januaarimi innermik anitsisartoq anitsimmat lava inissiarsuarnik eqquivoq, illullu arlallit ikuallapput. Inunnik ajoqusertoqanngilaq.
