IGASUP KUNNGIKKORMIUT NERISASSIUUKKAI
- Nerisassaatigut tamarmik illoqarfimmeersut atorpagut
Kunngikkormiut Sisimiunut tikeraarnermini kulturip illorsuani Taseralimmi ilassinnipput, igasullu Malik Mathiassenip ippassarli ulapputigisimavaa
Malik Mathiassen Sisimiuni kulturip illorsuani Taseralimmi ilassinninnermut nerisassiorpoq.
Jonna Enoksen Dahl
Kunngikkormiut Sisimiut takornariarneranni kulturip illorsuani Taseralimmi kalaaliminersunni naamassaavoq. Malik Mathiassen inunnut 100-t missaanniittunut, ilaatigut kunngi Frederimmut dronning Marymullu, nerisassiorsimavoq. Kalaaliminernik taamaallaat nerisassiorsimalluni taanna Sermitsiamut oqaluttuarpoq.
-Maani pigisagut najukkatsinneersuupput tamarmik. Raajat, assagiaarsuit, tuttut, tikaagulliit, nipisaat suaat umimmaallu
maanngaanneerput. Salatit maani naatitaapput, tiggaliallu tiggaliorfimmi J-Simingaanniik pisiaapput. Illoqarfitsinngaanneersut tamarmik atorniarlugit
aaliangernikuuvugut, Malik Mathiassen Sermitsiamut oqarpoq.
Nerisassanik piareersaaneq ippassarli aallartippoq, Malik Mathiassenilu, igasutut ilinniarsimasup, pissutsit taamaattut akornganni sulineq sungiusimareerpaa.
-Soorunami igasutut
misilittakkakka amerliartornikuugamik imatut eqqissillunga piareersarpunga, imminut ulapisinnaveersaarlunga. Piffissaq najoqqutaralugu suligama ajunngitsorujussuuvunga, Malik Mathiassen oqarpoq.
Siullermiinngilaq
Malik Mathiassen kunngikkormiunut nerisassiornermik misilittagaqareerpoq. Kingullermik Dronning Margrethe prins Henrikilu Sisimiuniinneranni 2015-imi Malik Mathiassen aamma nerisassiorsimavoq. Tamatumuunali kunngikkormiunut nerisassiornera eqqissimaneruvoq.
-Dronningikkut nerisassiuukkatsigit eqqiluisaarnerupput, suna tamarmi
qillersaqqissaarlugu piareersaqqissaarlugulu. Pujortartarallarmat
arsakoorfilernikuuaat. Dronning maaniimmat issiallutik neripput, massakkut
maani nikorfallutik neriniarput.
Kunngikkormiunut nerisassiorneq inunnut allanut mersernarsinnaavoq, kisiannili Malik Mathiassenip kunngikkormiunut nerisassiorneq misilittagaqarfigereeramiuk annilaangatiginngilaa.
-Eqqarsaannarpunga inuinnaat nerisassiuunniarlugit. Soorunami
kunngikkormiuupput, kisianni uagutsituulli inuinnaapput, Malik Mathiassen oqarpoq.