Nukissiorfiit aamma NunaGreen kattunneqassasut Siumup kissaatigaa

Aningaasaqarnermut akileraartarnermullu Naalakkersuisup, Múte Bourup Egedep (IA), tallimanngornermi Inatsisartut ilassutitut aningaasaliissutinut inatsisissaannut siunnersuut 2024 saqqummiuppaa.

2024-p ingerlanerani ilassutissatut aningaasaliissutit akuerineqarsimasut IST-mi inernernut missingersuutaasunut ataatsimut isigalugu 416,4 millioner koruuninik ajorseriartitsipput. 

Naalakkersuisut naapertorlugit ajorseriaat pingaarnertut Nuummi erngup nukinganik innaallagissiorfimmik annertusaanermut, kiisalu Aasiaat Qasigiannguillu pilersorneqarnerannut erngup nukinganik innaallagissiorfiliornissamut 400 millioner koruuninik NunaGreen A/S-mut aningaasaliissuteqarneranik pingaarnertut patsiseqarpoq.

AAMMA ATUARUK:

Milliardinik aningaasaliiffigisassaq akuerineqartoq

NunaGreenimik pilersitsisoqarnissaanik aalajangernermi pissutaasut pingaarnerpaat ilaginikuuaat Nukissiorfiit kisimiilluni suliassanik taamak annertutigisunik, tassa erngup nukissiorfissaanik pilersitsinissamik kivitsisinnaanngitsoq. Ingerlatseqatigiiffiullu, tassa NunaGreenip suliniutit timitalersorneqarnerat maanna ingerlappai. 

4,6 milliarder koruueqassangatinneqarput

Utoqqarmiut Kangerluarsunnguani Nuup eqqaani nukissiorfiup allileriffigineqarnissaanut missingiunneqarnikuuvoq 3 milliarder koruunit missaannik akeqassasoq.

Taanna aammalu Qasigiannguit eqqaani erngup nukissiorfissaq marluutillugit 2022-mi taamaalillutik missingiunneqarnikuuvoq 4,6 milliarder koruunit missaannik akeqassasut. 

NunaGreen 2024-mi aningaasanut inatsit aqqutigalugu pilersinneqassasoq akuersissutigineqarnikuuvoq, tamanna pereermat Naalakkersuisut 2023-mi ukiup naalernerani aningaasaqarnermut ataatsimiititaliamut qinnuteqarnikuupput aningaasat 400 millioner koruunit suliniutinut pineqartunut illuartinneqassasut, tassa NunaGreenimut aningaasaliissutigineqassasut, taamaaliornikkut NunaGreen avataanut taarsigassarsiniarsinnaalissammat aammalu avataaniit aningaasalersueqataajumasoqassappat isumaqatigiissusiorsinnaalersinneqassammat.

Partiit taamatut iliortoqarnissaanut akuerseqataasut taamanikkut tassaapput Inuit Ataqatigiit, Siumut, Atassut aamma Naleraq, taamaalillutillu Naalakkersuisut 400 millioner koruuninik ingerlatseqatigiiffimmut piginnittutut aningaasaliipput.

Siumut kissaateqarpoq NunaGreen aamma Nukissiorfiit kattutsinneqassasut

Nunatta aningaasameernera pingaarnertut innersuussutigalugu partiit arlallit isumaqarput "kukkusimallutik" ingerlatseqatigiiffimmik nukissiuutinut mingutsitsinnginnerusunut ikaarsaartoqarnissa pillugu pilersitsinissamut akuerseqataagamik, aammalu kukkunerusimasoq piginneqataassutsit 400 millioner koruuninik ingerlatseqatigiiffimmut pilersinneqarlaamut aningaasaliisimagamik.

Naleraq suliniut pillugu nutaamik naliliisoqarnissaanik kissaateqarpoq ingerlatseqatigiiffillu matuneqassasoq piumasaqarluni, Siumut kissaateqarpoq NunaGreen aamma Nukissiorfiit ingerlatseqatigiiffik ataasinngortinneqassasut.

- Siumumiit ingerlatseqatigiiffiit katitigaanerat pillugu isumaqarpugut, ingerlatseqatigiffiit imminnut assingusut kattussuutsinneqarnerat Naalakkersuisut sukkatsisarlugu ingerlattariaqaleraat. Tamannami aamma piginnittuunermut politikkimut partiit sisamat atsioqatigiissutigisimasaannut naapertuutissammat.

- Taamaammat Siumup kissaatigaa Nuna Green aammalu Nukissiorfiit kattuttariaqartut sulisullu tassani piginnaasaat atorlugit suleriaqqittoqartariaqartoq. Taamaalilluta aatsaat ammasumik ingerlatsineruneq qulakkiissavarput, aamma ataqatigiissumik ingerlatsineq ilanngullugu minnerunngitsumillu ukiut arlerlugit aningaasalersuinikkut akisussaassuseq annertusarneqarsinnaassaaq, Siumup aningaasaqarneq pillugu oqaaseqartartua Erik Jensen tunngavilersuivoq.

Naleraq isumaqarpoq inatsisit malinneqanngitsut

Naleraq isumaqarpoq, aningaasaliineq taanna missingersuusiortarnermut inatsimmi piumasaqaatinik naammassinnissinnaajunnnaarsimasoq:

- Naalakkersuisut nammineq erseqqissarpaat aningaasaliissutit annerit taamaallaat pisinnaasut, inuiaqatigiit aningaasaqarneranni tamarmiusumik pitsaasumik pissarsissutigineqartussatut Nalilerneqarpata. Taamaakkaluartoq Naalakkersuisut nunatta karsiata naqqa tikillugu, 400mio kr nuussimavaat NunaGreen A/S-imut. 

AAMMA ATUARUK (DK):

Vandkraft: Fra underskud til overskud

- Aana taamatut aaliangersimanermut ajornatorsiut: • Nalunaarutit inuiaqatigiit aningaasaqarneranni tamarmiusumik pitsaasumik pissarsissutigineqarnissaat takutinngilaat. Naak kusassarlugu Inuiaqatigiinnut iluaqutissaaneraarneqaannavissoq.

- Kingunerivaa IST-mut sinneqartoornissaraluaq 125mio kr amingartoorneq. Aningaasartuut annertooq ataatsip nunatta karsia imaarlugu, inatsisit malillugit taamaallaat pisinnaagaluartoq inuiaqatigiinnut pitsaasumik kingeqartitsisuuppat. Tamanna akisussaassusilimmik aqutsinerunngilaq. Inatsisinik avaqqutaarneruvoq, Naleqqap aningaasaqarnermut oqaaseqartartua, Pele Broberg, oqarpoq.

Ilassutitut aningaasaliissutit 2024-moortut akuerineqarnissaat pillugu siunnersuut aappassaaneerneqartinnani aningaasaqarnermut ataatsimiititaliamut suliassanngortinneqarpoq, taamaalillutillu partiit kingumut aningaasaliissutaareersut kisiisa pinnagit aammali siumut isigisumik oqallinnissaat qularisassaanngilaq.

Ilassutitut aningaasaliissutit pillugit inatsit aalajangiinerit pereersut pisortatigoortumik akuerineqartarnerannik suliaasarpoq, matumanilu Naalakkersuisut 2024-mi Inatsisartut aningaasaqarnermut akileraartarnermullu ataatsimiititaliaata akuerisaanik aningaasaliissutigereersimasaat pineqarput.

Aappassaaneerinninneq pissaaq oktobarip 23-ani.