Nukissiorfiit teknikkimut pisortamik nutaamik atorfinitsitsipput

Maanna Nukissiorfiit Nuummi immikkoortortaani pisortaasoq, Filip Sivertsen, Nukissiorfinni teknikkimut pisortatut atorfinitsinneqarpoq, taannalu ingerlatseqatigiiffiup aqutsisuinut decembarip aallaqqaataani ilanngutissasoq, tusagassiorfinnut nalunaarutigineqarpoq.

Filip Sivertsen, savalimmiormiunik siuaasalik Nuummi inunngorlunilu peroriartorpoq, ilinniakkamigullu maskinmesteriulluni. Nukissiorfiit iluani ukiut 13-it sinnerlugit, siullertut sulisunut aqutsisutut, tulliatut ingerlatsinermut pisortatut, ukiunilu kingullerni pingasuni Nuummi nunap immikkoortuanut pisortatut Filip Kalaallit Nunaanni aamma Nukissiorfiit iluani pilersuinermik immikkoortoqarfimmut tunngasunik ilisimaarinnittorujussuuvoq. Taamatuttaaq Filip teknikkimut tunngasunik patajaatsunik tunuliaqutaqarpoq, taamaalillunilu pisortaaneqarfik teknikkikkut pingaarutilinnik ilisimasaminik ilassuteqarsinnaassaaq, tusagassiuutitigut nalunaarummi erseqqissaatigineqarpoq.

Inuk nuannarineqarluartoq

Nukissiorfiit iluani nukissiornermut pisortaagallartoq, aamma aningaasaqarnermut pisortaq Johan Danielsen atorfinitsinneqartoq pillugu ima oqarpoq:

- Nukissiorfiit iluani Filip Sivertsenip teknikkikut pisortatut atorfinitsinnera assut nuannaarutigaara. Kalaallit Nunaanni atuisartunut iluaqutaasussamik pilersuinikkut isumannaatsuutitsinermik annertuumik sunniuteqarluartumillu qularnaarinissamut suliaqarnermi Filip annertuumik inissisimaffeqassaaq. Aammattaaq Filip assut ilakkuminarlunilu nuannarisaavoq, pisortaaneqarfimmilu ilaasortatut aalajangersimasumik inissisimaffeqalernissaa qilanaaraara.

Ingerlatseqatigiiffiup Nuummi immikkoortortaqarfimmi pisortassamik nutaamik atorfinitsitsinissaq maanna sulissutigalugu aallartissavaa.

Aqutsisoqatigiit tassaalerput pisortaagallartoq aammalu aningaasaqarnermut pisortaq, Johan Danielsen, teknikkimut pisortaq Filip Sivertsen aamma sulisut pisortaat Sandra Husted Rasmussen.