Nunanit allaneersunik sulisoqarneq: Angajoqqaat isummerput
Qeqqata Kommuniani sulisussaaleqineq iliuuseqarfiginiarlugu Sisimiuni meeqqerivimmi Uiami utoqqaallu angerlarsimaffiani Maniitsumiittumi kangiamiunik sulilersitsiniarput. Kangiamiut sulilersussat nerisitsinermi, aneerussinermi nangilersuinermilu sulisorineqassapput. Aalajangerneq pillugu angajoqqaat isummerput.
Foto: Dorthea Reimer-Johansen
Jeanette Pedersen-Larsenip ernera meeqqerivimmi Uiamiittarpoq, taassuma ernermi ulluinnarni inuuneranut qanoq sunniuteqassanersoq ernummatigaa.
- Uanga anaanatut isumaqarpunga ajoraluartoq tamaanga killittoqartariaqalersimassappat. Ernunaammernartortaqarpoq, nangiaammerlungalu ernera allatut oqaluttumik paarsisoqalissappat.
Jeanette Pedersen-Larsenip nassuiaatigaa kangiamiunik sulilersitsinissaq pillugu tusarniaaffigineqarsimanatik, ataatsimiinnermili paasitinneqarlutik.
Nutaarsiassaq saqqummiunneqarmalli eqqarsaatigisaqattaarsimallugu oqaluttuaraa, neriullunilu meeqqat atugaannut sunniuteqassanngitsoq.
- Pissanganarpoq qanoq pisoqarumaassanersoq, kisianni neriungaarlunga iluaqutaagumaartut meeqqagullu paarilluarumarai allatuulli sulisutut, Jeanette Pedersen-Larsen naggasiivoq.
Nunaqavissunut oqilisaataassapput
Petrine Johansen meeqqerivimmi Uiamiittuuteqarpoq. Taassuma nutaarsiassaq tusaramiuk isumalluarpoq:
- Uanga ernumaginngilara, naatsersuutigigakku sulilluarumaartut, meeqqallu iluamik paaqqutarineqarnerulissasut, qularinagulu sulisut suliuaannartunut aamma oqilisaataasorujussuussasoq.
Qeqqata Kommuniani sulisussaaleqineq aaqqinniarlugu avataaniit tikisitsinissaq aaqqiissutaassasoq, borgmesteri allaaserisap siuliani nassuiaavoq:
- Oqaatigeqqissavara sulisussanik allanik nassaassaqanngilagut pissutigalugu inunnik sulisinnaasunik amigaateqaratta. Tikittussanut qilanaarpugut isumalluarlutalu suleqatigiligassaannut ilaqutaasunullu annertuumik iluaqutaanissaannut, Malik Berthelsen Qeqqata Kommuniani borgmesteriusoq naggasiivoq.
