Nunanut allanut ministeriaqarfiup Paul Watsonip tunniunneqarnissaa itigartitsissutiginngilaa
Avatangiisinik illersuiniaqatigiiffimmi suliaqartoq Paul Watson sapaatip akunnerata naanerani Kalaallit Nunaanni tigusarineqarpoq. Japanip 2010-miilli eqqartuussivilersuuteqarnissaa kissaatigisimavaa.
Avatangiisinik illersuiniaqatigiiffimmi suliaqartoq 73-inik ukiulik Paul Watson sapaatiummat Nuummi tigusarineqareerluni Kalaallit Nunaanni tigummigallarneqalerpoq.
Philippe Desmazes/Ritzau Scanpix
Danmarkimi inatsisinik atortitsinermut ministereqarfiup avatangiisinik illersuiniaqatigiiffimmik suliaqartup Paul Watsonip nunatsinni tigusaasimasup Japanimut tunniunneqarnissaa itigartitsissutiginngilaa.
Taama ministeriaqarfik tallimanngornermi allakkatigut akissuteqarluni ilisimatitsivoq.
Tassani innersuussutigaa Kalaallit Nunaanni tunniussinermut inatsik naapertorlugu, danskit ministeriaqarfiat Kalaallit Nunaanniit tunniussisoqarnissaanik itigartitsisoqarnissaanilluunniit naliliisuusussaasoq.
- Inatsisitigut aalajangersakkamiippoq Inatsisinik atortitsinermut ministereqarfik naliliigallartussaasoq paasissutissat pineqartut tunngavigalugit Kalaallit Nunaanniit tunniussinissamik qinnuteqaat itigartinneqarnissaanut tunngavissaqarnersoq.
- Paasissutissat maannakkut pigisavut tunngavigalugit inatsisinik atortitsinermut ministereqarfiup qinnuteqartoqassappat itigartitsinissamut tunngavissaqanngitsutut isigaa, ministeriaqarfik allappoq.
Kalaallit Nunaanni politiit Paul Watson Nuummi sapaatiummat tigusaraat.
Taanna Japanimi nunanit tamalaanit tigusarineqarnissaanik peqqussut tunngavigalugu tigusarineqarpoq.
Suli aalajangerneqanngilaq avatangiisinik illersuiniaqatigiiffimmi suliaqartoq 73-inik ukiulik tunniunneqassanersoq.
Inatsisinik atortitsinermut ministereqarfik naapertorlugu Japan piumasaqassappat maanna itigartitsinissamut pissutissaqanngilaq.
Ministeriaqarfiup Japanimi oqartussaasut Paul Watsonip tunniunnissaa pillugu pisortatigoortumik qinnuteqaataat, tigusaaneranit ullut 30-t qaangiutsinnagit tunniunneqartussaq, suli utaqqivaa.
Tamatuma kingorna qinnuteqaat nalilersorneqaqqissaaq.
Oqartussaasut ilisimatitsipput Japanimit tunniussisoqarnissaanik qinnuteqaat tallimanngornermi suli tigusimanagu.
Japanip pineqartup tigusarineqarnissaanut peqqussut 2010-mi nalunaarutigaa.
Japanimi arfanniat Sikuiuitsumi kujallermi sulineranni Watson akornusersuisimavoq, tamatumalu kingorna tigusarinninnissamut peqqussut nalunaarutigineqarsimalluni.
Japanimi oqartussat naapertorlugit arfanniartut saassuppai suliaannillu akornusersorlugit.
Kalaallit Nunaanni Politiit naapertorlugit Danmarkimi Inatsisinik atortitsinermut ministereqarfiup aalajangertussaavaa Paul Watson Japanimut tunniunneqassanersoq.
Taassuma illersuisui isumaqarput tunniunneqassappat Europami Inuit Pisinnaatitaaffii pillugit Isumaqatigiissut unioqqutinneqassasoq.
Eqqartuussissuserisut naapertorlugit nunami tamatumani inuit pisinnaatitaaffii ataqqineqannginnerat pissutaavoq.
Tigummigallarneqartoq ataasinngornernmi eqqartuussivimmi sassartinneqarpoq, augustillu 15-iata tungaanut tigummigallarneqarnissaa aalajangerneqarluni.
Tamanna tigummigallarneqartumit nunatta eqqartuussiviani aalajangiiffigineqartussanngortillugu qinnutigineqarpoq, Nunatta Eqqartuussiviatali eqqartuussiviup aalajangernera atortittussanngortippaa.
/ritzau/
