Karen Flyp timersuutinut taski aappalaartoq ammarpaa. Taquani nuersakkanilu qaqippai. Karsilu qisummik sanaaq. Pinnersaatit Københavnimi Kongens Havep eqqaani sannavimmini suliarisimasani tassaniitippai: Assammiorujussuit iligaanni nipituumik tuttartut. Ujammit aappaluttunik sapangallit. Iverutit orsuaasatut ilusillit.
Pinnersaatinik ilusilersuisartoq ikinngutini ilaquttanilu tikeraarlugit Nuummiippoq. Aammattaaq pinnersaasiani tigummiaannarlugu nassatamini Atlantikoq qulaallugu nassatani tuniniarniarlugit ullormi ataatsimi pisiniarfimmik ammaassaaq. Nuummi nuersagassaarniarfimmi NaNi-mi, ullormi ataatsimi tuniniaaffigisassamini, pinnersaatit karsimit qisummeersumit qaqippai. Suli naammassinngitsoq pisiniarfimmi pisiniartoqalereerpoq.
- Wow, sunaana taanna? pisiniartoq aperaaq pinnersaasiarlu sølvi qernertisitaq atorlugu sanaaq tikkuarpaa.
Karen Flyp pinnersaasiani pingasut atorlugit. Pinnersaatinik ilusilersuisartup pinnersaasiarisimasani tamangajaasa kikkullu pisiarisimaneraat eqqaamasinnaavai. - Pinnersaasiakka immikkuullarissumik ersersitsissasut — imaluunniit eqqornerusumik oqaatigalugu, nammineq tarneqassasut anguniartuaannarpara, Karen Fly oqarpoq.
Assi: Mette Kierstein
Soorlu tassa sanningasoq uillut qaleruaannik kaajallanneqarsimasoq. Allunaasami aappaluttumi saarngit atorlugit sapakkiartaqarluni nivingavoq.
Pinnersaasiaq Nunatta Katersugaasiviani Allagaateqarfianilu 2025-mi saqqummersinneqarpoq, tamannalu aamma Vogue-mi, tassa nunani tamalaani quppersagassiami, allaaserineqarpoq. Karen Fly Nadja Arnaaraq Kreutzmann, Hanne Bruun aamma Bent Olsvig peqatigalugit Kalaallit Nunaanni kuultimik, sølvimik sapannganillu pinnersaatinik ilusilersuisut ilaattut oqaatigineqarpoq.
- Pinngortitaq tiguaalerpa, imaluunniit sanningasoq aserorteriva, Karen Fly pinnersaammut tunngatillugu aperineqarami eqqarsarpoq.
Aamma nammineq akissutissaqartinngikkaa tusaaneqarsinnaavoq.
Karen Flyp pinnersaasiani inuunermini apeqqusiinermut atortarpai. Kalaallit Nunaanneersuunera pingaarnerpaat ilagaat. Siornatigut tamanna soqutiginngilaa – ullumikkulli anersaat silarsuaannit isumassarsisitaalluni pinnersaasiortarpoq.Kalundborgimi nittaakkaangat
Karen Flyp arnaa, Maren Fly, Ilulissaneersuuvoq. Karen Flyp Jyllandip kitaani Kalundborgimi peroriartornermini illoqarfik Jakobshavnitut ilisimavaa.
Arnaata 27-nik ukioqarluni Danmarkimut nuunnissami tungaanut tassani inuunini oqaluttuarerpiarneq ajorpaa.
- Pisimasut qaffakaatinnaveersaartarunarpai, Karen Fly pisiniarfik matummat Nuummilu cafémi naapeqatigiikkatta eqqarsarpoq.
Anaanaali eqqaasaqariataartarpoq:
- Nittaakkaangat eqqaamasat qaffakaasarput, Karen Fly oqarpoq.
Taava Maren Flyp aputikkoorneq, qanorlu qeraarpalaartarnersoq, oqaluttuarisarpaa.
- Suna tamarmi illugiiffaarikkaangat pikkunaalliortarpunga, Karen Fly pinnersaasiani pillugit oqarpoq. - Equngalaarsinnaapput.
Assi: Mette Kierstein
Angunni, piniartorsuaq, angerlarnersoq alapernaattarsimallugu oqaluttuarpoq.
- Piniariareerluni angerlaraangami ilaquttaminut, ikinngutinut pisariaqartitsisunullu agguaanissani nuannarisarpaa. Arnaa taamaammat tunissuteqarnissamik nuannarisaqartuuvoq, Karen Fly illarluni oqarpoq.
- Pisiniarnermik nappaateqartuusisarpoq!
Maren Flyp angajoqqaavisa piniartumut kimut katitinniarnerlugu oqaloqatigitillugit tusaavai.
- Katinnianngilluaasarporli! Ilinniarusuppormi, Karen Fly oqarpoq.
Arnaa taarsiullugu ilaqutariinni Rosingikkunni palasimi kiffanngorpoq. Kingusinnerusukkut napparsimmavimmi sulilerpoq, tassanilu nakorsaq Danmarkiliarnissaanik kajumissaarisoq naapippaa. Tassani peqqissaasutut ilinniarlunilu Karen Flyp angutaa Max Rasmussen naapippaa.
Taakku sisamanik qitornipput, Karen Flylu, 1971-imi inunngortoq, nukarlersaavoq. Meeraasorli ilaqutariit umiatsiamik angalaartarput, Kalaallit Nunaanniillu tikeraartoqaraangat naatsiivimmi siaasartoqatigiittarput.
Arnaa nuannataallaqqissuuvoq, aammali sakkortuumik pissuseqarpoq. Taamaammat Karen Flyp inersimasunngorami arni attaveqarfigiunnaarpaa. Aamma kalaallinit kingoqqisuunini.
Anaanattut ikkusunngilluinnarpunga, Karen Fly oqarpoq.
Nunap assinga allanngortitaasoq
Karen Flyp Nikolaj Melander uigaa, marlunnillu qitornaqarput, Mikkel 26-nik ukiulik Ajalu 23-nik ukiulik.
Mikkel ukiualuit matuma siorna nuummat Karen Flyp ilaquttani illersorniarlugit kakiortippoq. Kingusinnerusukkullu panini nunarsuaq kaajallallugu angalasussanngormat kakiorteqqippoq.
Meeraallunili kalaalinit kingoqqisuunini "suaartaatigerusunneq ajorpaa".
Kalaaliunera kanngusuutigisutullusooq illugu peroriartorpunga, Karen Fly oqarpoq.
Tassami Kalundborgimi peroriartornerminimi sumiuunera ajortunik attuumassuteqartinneqartarpoq — imaluunniit nuannarineqarpallaartarpoq.
Arnaa qallunaatut oqaaseqalernerup nalaani peroriartorpoq. Meeqqani kalaallisut ilinniartinnagillu nunaminut utertinngilai. Taamaammat Karen Flyp Kalaallit Nunaat ukiorpassuarni ungasissutut misigisimallugulu attaveqarfigisinnaanngilaa.
Qatanngutikkalu kinguaariit qanoq innersut ilisimalluannginnatsigu kinaanerput nammineq aalajangertariaqarparput, Karen Fly oqarpoq.
Karen Fly anaanami inunngorfianut angalaqqaarnermi kingorna nunap assinginik allanngortitanik assigiinngitsunik saqqarmiuliorpoq.
Assi: Kenneth Øksnebjerg
Saqqarmiuliamini Danmarkimi peroriartorami isummiussereertarneq ilisimasaqannginneq misigisimasani ersersippai
Assi: Kenneth Øksnebjerg
30-t sinnerlugit ukioqarluni akimasuumik nersornaaserneqarnini taamaaliornissaminut kajumississutigilerpaa.
Karen Fly Institut for Ædelmetal-imiit pinnersaatinik ilusilersuisartutut ilinniarpoq, 2006-imilu soraarummeerluni. Ukiup tulliani Assassorluni kusanartuliornermi ilusilersuinermilu Biennalemit nersornaaserneqarpoq. Aningaasanik akissarsivoq – Kiisalu Trapholtimi Kunstindustrimuseumimilu (ullumikkut Designmuseum Danmarkimi) saqqummersitsinissaq anguniarlugu suliniuteqarpoq.
- Isumaqalerpunga: ’Aningaasarpassuarnik tunineqaruma sumiiffinnillu akimasuuni saqqummersitsisussaaguma, taava aamma pingaarutilimmik saqqummiussaqartariaqarpunga. Immaqa maanna Kalaallit Nunaat sammisussanngorpara, Karen Fly oqarpoq.
Taamaammat ilaquttani Kalaallit Nunaanniittut attaveqarfigalugit Ilulissani, Nuummi Sisimiunilu tikeraarsinnaanerlugit aperai.
- Ukiorpassuarni attaveqarfigisimannginnakkit eqqaamaneraannga qularaara. Eqqaamasinnaavaanngali, takujumallungalu, Karen Fly oqaluttuarpoq.
Karen Flyp arnaa Ilulissaneersuuvoq, peqqissaasunngorniarlunilu Danmarkimut nuussimavoq. Pisimasut pillugit oqaluttuarpallaartanngilaq. - Qatanngutikkalu kinguaariit qanoq innersut ilisimalluannginnatsigu kinaanerput nammineq aalajangertariaqarparpu Karen Fly oqarpoq, taannalu inersimasunngroami aatsaat anaanami nunaanut tikeraaqqaarpoq.
Assi: Mette Kierstein
Angalanermi kingorna pinnersaasiaasa ilaat tassaapput saqqarmiut sisamat Kalaallit Nunaata nunap assinga allanngortitaasoq. Taakku ima qulequtaqarput: ”Grønland i udkanten“ (Kalaallit Nunaat killeqarfiit avataanni, aaqq.), ”Grønland på verdenskortet” (Kalaallit Nunaat nunarsuup assingani, aaqq.), ”Grønland i centrum I” (Kalaallit Nunaat qitiutillugu I, aaqq.) aamma ”Grønland i centrum 2” (Kalaallit Nunaat qitiutillugu 2, aaqq.).
- Qallunaat Kalaallit Nunaat pillugu isiginnittaasiannut uangalu nammineq Kalaallit Nunaat pillugu isiginnittaasinnut, peroriartorninni isummiussereertarneq ilisimasaqannginnerlu pissutigalugit sunnerneqarsimasumut, assersuutaapput, Karen Fly oqaluttuarpoq.
Aammattaaq pinnersaatinik ilaatigut kuultimik, rubininik, arfernit tuttullu meqquinik, sanavoq, taakkulu 2010-mi Nuummi Katuami saqqummersinneqarput.
Karen Fly
Karen Fly 1971-imi inunngorlunilu Kalundborgimi peroriartorpoq.
Pinnersaatinik ilusilersuisartuuvoq, pinnersaatinillu ilusilersuisartoq Lene Hald peqatigalugu Københavnimi Gothersgade 99-imi sannaveqarlunilu pisiniarfiuteqarpoq.
Institut for Ædelmetal-imi 2006-imi ilinniakkaminik naammassinnillunilu arlaleriarluni nersornaaserneqarsimavoq. Ilaatigut Biennalemit assassorluni kusanartuliornermi ilusilersuinermilu nersornaat,, ullumikkut danskinut eqqumiitsuliortunut ilusilersuisunullu nersornaasiutigineqartartut annersaat.
Karen Flyp nersornaat iluaqutigalugu anaanami inunngorfia Kalaallit Nunaat 2007-imi siullerpaamik tikeraarsinnaasimavaa. Angalaneq tamanna allannguisitsivoq - tassanimi kingornatigut nammineq kalaaliussutsini paasilerpaa, tamannalu eqqumiitsuliorneranut sunniuteqangaatsiarpoq.
Karen Fly pillugu uani paasisaqarnerugit
Anaanami inunngorfianut angalaneq taassuma inuunerani allannguerujussuarpoq. Qimarratigisartakkanimi nammineq ilumineereersoq tassanngaannaq paasilerpaa.
Kalaallit Nunaanni sumiikkaluaraangamaluunniit imminut ilisarisarpunga, Karen Fly oqarpoq.
Assersuutigalugu quiasaartarnini:
- Inuit orlusut illaatigineqartarnerat, Karen Fly illarluni oqarpoq.
Karen Flyp nunatsinnut angalanini qamuuna paasisaqarfigaa. Suminngaanneernini paasivaa – taamanikkumiillu arlaleriarluni Kalaallit Nunaanniissimavoq.
Uterninilu nuannaarutigigaluarlugu aamma aliasuuteqarpoq, tamannalu Karen Flyp eqqartoraangamiuk aamma killitsissutigisarpaa:
- Kalaallit Nunaanniikkaangama suut arajutsisimanerikka misiginngitsoorsimanerikkalu malunnarsisarpoq, taanna oqarpoq.
Assammiorujussuit qalipaatilllu ersarissut
Karen Fly pinnersaatinik nunarsuarmi maluginiarneqarumasunik ilusilersuisarpoq. Ilusileeriaaseq taanna pilersikkumallugu inuttut ineriartorfeqarsimavoq.
Ilaqutariinni nukarlersaavoq. Qujagisaq. Aammali ulapaarnermi qaangiinnarneqartartoq.
- Ilaqutariittut ingerlalluanngilagut, Karen Fly oqaluttuarpoq.
Mianersornissani meeraalluni ilikkarpaa. Taamaalilluni silaannaq qanoq innersoq qaqugukkullu maluginiarneqannginnissaq pitsaanerunersoq maluginiartarpaa.
Maren Fly Jehovamut Nalunaajaasuuvoq. Taamaammat angerlarsimaffimminni juullisiortaratillu inuuissiortoorneq ajorput.
Upperisaqaqatigiit sapaatip-akunneranut ataatsimiikkaangata Karen Fly meeqqallu allat ileqqorissaartuusariaqarlutik, inussiarnersuusariaqarlutillu kusanartariaqarlutik oqarfigineqartarput.
- Inussiarnersuunera Kingusinnerusukkut taamaatippara, Karen Fly oqarpoq.
Aqqanilinnik ukioqarluni Jehovap Nalunaajaasuisa ataatsimeersuarneranni kuiserlaaqarmat najuulluni eqqaamavaa.
- Qalipaatai takoriakkit, Karen Flyp kuanni illup silataanniittoq sanioqqutigamiuk oqarpoq. Qalipaataasa qorsuusut illup qarmarsui aappalaartut qanoq assigiinngitsigisut maluginiarpaa.
Assi: Mette Kierstein
Karen Fly Institut for Ædelmetal-imi ilusilersuinermik ilinniarsimasuuvoq. Ilinniagaq taanna imminerminut naleqqulluinnarpoq, tassanimi atortorissaarutinik misilieraaffiullunilu pinnersaatinik eqqumiitsuliornermi killigititaasut unammillerfiupput.
Assi: Mette Kierstein
- Kingorna qiviarlunga oqarput: "Illit tullinnguupputit", Karen Fly oqaluttuarpoq.
Timimigut erseqqissumik malugisinnaavaa: Taamaaliussanngilaq. Taamaammallu ataatsimiigiartarunnaarniarluni oqarpoq.
- Ataatama sinnerlunga anaanaga akerlilerlugu iliuuseqarpoq, Karen Fly oqarpoq.
- Tamanna pillugu naammattumik qujaffiginikuugunanngilara.
Karen Fly 15-it missaannik ukioqartoq angajoqqaavi avipput.
Taamanikkut Maren Fly Karen Flyp ullumikkut ukiuinik ukioqarpoq. Maanna inuunermini nutaamik aallartitsinermini tamanna eqqarsaatigisarpaa:
- Utoqqaliarsaalerama suut aqqusaarneqartarnersut paasilerakku ataqqeqqilerpara.
Arnaatami kisimiilluni tamanna atorpaa.
- Ilaquttani, ikinngutinilu inillu avatangiisiminiittut tamaasa qimappai. Soorunami Danmarkimi ikinnguteqarpoq, kisiannili inuttut paasinnissinnaasumik ilaqarnani tamakkua aqqusaarpai.
Ujalussiaq kuultiusoq
Karen Fly tikimini talerperlermi ujalussiaasamik kuultiusunik sanaanik assammioqarpoq. Pinnersaasioriaseq kuultip akia pissutigalugu atulersimasaa.
- Aallarteqqaarama kuultimut akissaqanngingajappunga. Taamaammat ujalussiaasaq atorlugu pinnersaasiortariaqarpunga, Karen Fly nassuiaavoq.
Namminersortunngorniarluni pinnersaatinillu ilusilersuisartutut nersornaaserneqarsimalluni nammineq pisiniarfiuteqalernissaq aamma imaannaanngilaq. Karen Fly tassunga killinniarnermini ujalussiaasatulli aamma kittorangajattarsimavoq.
Karen Engelsholm Højskolemi ilinniartuulluni pinnersaatinik sanaartorfimmut isersinnaalerpoq. Tassani unnuit weekendillu tamaasa sølvimik, kanngussammik, ujaqqanik qisunnillu suliaqartarpoq. Taamaalilluni pinnersaasiorneq kisiat kajumigisalerpaa.
Ilaqutariinnimi kuultinik saffiortoqareerpoq: Karenip akkaa Georg Jensenimi sulisarpoq. Akimavoq, Karen Flyp angerlarsimaffiani isumaqartoqarpoq.
- Diamantit pillugit annilaangasarnera tissinarpoq. Passukkaangamigit qanoq iliussalluni nalusarpaa, Karen Fly oqarpoq.
Karen Flyp, erlinnartunik eqqissisimasumik suliaqartartup, akkani isumassarsissutigisimassagunarpaa.
Karen Fly sannavimmini. Inuusuttuulluni qillalaartut soqutiginngilai, kingusinnerusukkulli ujaqqat erlinnartut nuannarilerpai.
Assi: Kristine Spore Kreutzmann
Killorluinnaraali. Pinnersaatit kusanartuliaasariaqanngitsut, atortussaalli akisuut erseqqissarneqarlutillu kusanarluinnartariaqartut, paaseqqaartariaqarpaa.
- Taamaaliornissara soqutiginngilara. Suli soqutiginngilara, Karen Fly oqarpoq.
Kuultimik saffiuuni arlalinni ilinniartuuvoq, ilaatigut Jytte Kløvemi, eqqumiitsuliullaqqissumi — taassumalu ilinniartitami namminneq suliaminnik ineriartortitsinissaat pingaartippaa.
- Diamantit mianersuunnagit atortarpai, ilutsillu pingaartippai, Karen Fly oqarpoq.
Karen Flyp Jytte Kløve ilinniarfigaa - tamannali aamma imminut nanertuutigilerpaa. Naggataatigut ilinniartuujunnaarlunilu kuultimik saffiuunngorniarfimmi ilinnialerfigisimasaraluamini ilinniarunnaarpoq.
Karen Flyp Komplot Design peqatigalugu, assimi ilaasut allat marluk, Assassorluni kusanartuliornermi ilusilersuinermilu Biennalemit 2007-imi nersornaaserneqarput.
Assi: Nils Rosenvold
- Nersornaaserneqarnera pissutigalugu kiisami Kalaallit Nunaannukarlungalu qanoq kalaaliujuaannarsimatigalunga paasilerpara, Karen Fly oqarpoq. Assi una Nuummeeqqaarami assilisaraa.
Assi: Nammineq pigisaq
Karen Flyp Institut for Ædelmetal-imi, atortunik misiliiffiusumi pinnersaatinillu eqqumiitsuliornermi killigititanik unammillerfiusumi, ilinniarnermini pinnersaatit silarsuaat kiisami ilisarisimalerpaa.
- Piumangaarama saqqummiilernerit tamaasa qiasarunarpunga, Karen Fly oqarpoq.
Aakkiartorneq
Karen Fly meeraalluni issialluni titartaqattaanngikkuni arlaannik passutaqartuaannarpoq. Igalaat nuiallu qulaavaasut isiginnaakkajuttarpai. Ilinniartitsisuisalu tusarnaanngissorisarpaat. Apeqqutaali akisinnaajuaannarpai. Assamminik arlaannik passutaqarluni eqqarsarluarnarineruinnarpaa.
Suli taamaappoq. Sapinngisani tamaat suliarisimasami assinganik sananeq ajorpoq.
- Pinnersaasiorninni misigisaqarusuppunga, taanna oqarpoq.
Ilusilersuileraangami qanoq naammassissanerlugit qaqutiguinnaq naluneq ajorpaa.
Pinnersaatinik ilusilersuisartutut inuit allat inuuneranni pingaaruteqarluinnartunik sunniuteqartartunik, pisuni pingaarutilinni sunniuteqakkajuttunik, pinnersaasiortoqartarpoq.
TV-mi aallakaatitassiami Borgenimi atorfilik Emmy Rasmussen, Nivi Pedersenimit inuttaaffigineqartoq, aamma taamaappoq. Taanna danskit issittumi aallartitaannik sammisaqarneranik ersersitsisumik saqqarmioqarpoq.
Karen Flyp pinnersaasiai ilisarnartunik iluseqakkajupput. Assersuutigalugu uillup qaleruai, saarulliup siunnai orsuaasalluunniit.
Assi: Mette Kierstein
Karen Flyp kuulti akisummata assammiut ujalussiaasamik kuultimik sanaat ilusilersortarpai.
Assi: Mette Kierstein
Saqqarmioq Karen Flyp pinnersaasiaannit assigiinngitsunit Vildskud-imik taaguutilinnersuuvoq. Taann Karen Flyp tunisarinerpaasaasa ilagaat. Assigiinngitsorpassuanngorlugu sanasimavaa, taamaalillunilu nuannarinnitserpassuaqalersimavoq.
Tamannali unikkunarpoq.
Karen Fly aakkiartorneq pillugu saqqummersitsinermut pinnersaatinik qanittukkunni sanasussanngorpoq.
Isumassarsigami iliuuseqapallappoq. Pinnersaat Vildskudimeersoq amusarissamiit tigugamiuk kaattamik aallerpoq - kaallugulu aserorpaa.
- Nuanneq!
Pinnersaat naggataatigut naasutut naqitatut isikkoqalerpoq.
Nunarsuarmut allamut iserfissat
Nuummi NaNi-mi pisiniartoq assammiumik pupingasumik tikiminut atisivoq.
- Attorlugillu tigusinnaavasi, Karen Fly oqarpoq ullorlu naappat sofap ataa takussallugu imminut eqqaatippoq.
Ukiup ataatsip matuma siorna kingullermik Nuummiinnerminiilli pinnersaatinik nutaanik sanasimavoq, tassa iverutit sølviusut manniusatut ilusilersukkat putoortut.
- Talinniittutut ittumik assigiimmik allalinngorlugit putorpassuarnik qillerivunga. Taava sunniuteqarluartumik pisoqarpoq, Karen Fly oqaluttuarpoq.
- Putut angakkuamullusooq tunngasut paasileriataarpara: anersaat silarsuaannut attaveqarnermut, upperisatsinnut ataatsimoorutsitsinnullu.
Iverutit nunatsinnukaruni aatsaat tuniniarusussimavai.
Takutitsivigisaasa taassumatut takusinnaallugillu malugisinnaavaat.
Karen Fly pinnersaasiamini putunik angakkuakkatut ittunik, anersaat silarsuaannut attaveqartitsisunik, suliaqarpoq. – Suliaralugit sunniuteqarluarpoq, taanna oqaluttuarpoq. Pinnersaasiami takutinnissaat Kalaallit Nunaannukarnissaminut utaqqisissimavaa. Takunneqqaartussammi aamma paasisinnaasiariaqarpaat.
Assi: Mette Kierstein
Sananerminik siulliullugit takutitsiffigisimasai nammineq takusamisut misigisamisullu takusinnaallutillu misigisinnaasariaqarsimapput.
