Qimusseq Sisimiut: KNQK immikkut ittumik ataatsimeersuarli

Kalaallit Nunaanni Qimussertartut Kattuffianut, KNQK-mut, peqatigiiffik tunuliaqutaasoq, Qimusseq Sisimiut, kattuffiup ingerlanneqarnera pillugu naammatsippoq. Kattuffik immikkut ittumik ataatsimeersuartariaqartoq, peqatigiiffiup siulersuisui tusagassiorfinnut allapput.

 - KNQK-imut immikkut ittumik ataatsimeersuarnissamik piumasaqarpugut, taakkua allapput.

Qimusseq Sisimiuni siulersuisut tassaapput: Paninguak´K Rafaelsen, Nukannguaq Knudsen, Lars Thomassen, Reginald Kruse- Rafaelsen, Piitannguaq Krisensen, Nuka-Peter Berthelsen aamma Villiam Olsen.

Taakkua nalunaarumminni allagaannut ilaavoq, KNQK-p aningaasaqarnikkut ingerlatsinera ukiumut sisamariarluni nalunaarusiorneqartartussaagaluartoq. Tamannami Qimusseq Sisimiunit KNQK-p siorna ataatsimeersuarnerni siunnersuutaasoq, peqatigiiffik allappoq. Tamannali suli piviusunngunngitsoq Sisimiormiut allapput.

- 2025-imi ataatsimeersuarnermi peqataatitatsinnit siunnersuutigineqartoq tassaavoq ukiut sisamararterutai tamaasa kattuffiup aningaasaqarnera saqqummiunneqartassasoq. Siunnersuuterput ataatsimeersuartunit tamanit akuerineqarnikuuvoq.

- Ullumikkumut suli aningaasaqarneq paasissutissiissutigineqanngilaq. Immikkoortortaqarfinnut tamanut.

Sermitsiap KNQK-mi siulittaasoq, Mikkel Jeremiassen, apersorusullugu marlunngornermit attavigisarpaa. Saaffiginnissutilli taassuma suli qisuariarfiginngilai. 

Qimusseq Sisimiut: Kattuffik illoqarfitsinni akiitsoqarpoq

Peqatigiiffilerinermi aningaasannanniarneq imaluunniit aningaasaliisussarsiortarneq ileqquuvoq. Tamanna Qimusseq Sisimiunut aamma atuuttoq, siulersuisut allapput. Taamaakkaluartoq KNQK-p Sisimiuni akiitsoqarnera aporfiulersoq, peqatigiiffik allappoq.

- Uagut ukioq manna peqatigiiffittut eqqorneqaatigaarput aningaasaliisussarsiornermi kattuffik illoqarfitsinni akiitsoqarnera suliffeqarfinnut pissutaalluni tapiiffigineqarnissamik mattussaaqqalluta. Suliffeqarfiit tapeerusukkaluarlutik tunuarsimaarput, siulersuisut allapput.

Kattuffik Sisimiuni qanoq akiitsoqartiginersoq taakkua itisilinngilaat. Tamannali apeqqut Sermitsiap KNQK-p siulittaasuanut apeqqutissaanut ilaagaluarpoq.

USA-mit aningaasaliineq kattuffimmut annaassisuuneraraat

KNQK aningaasanut inatsisikkut siorna ukioq mannalu ukiut tamaasa 250.000 koruuninik taperneqartarpoq. 2025-imili tapiissutit tamarmik siunertamut atorsimanngitsut, Naalakkersuisut ilisimasimagaat, Inatsisartut Kukkunersiunermut Ataatsimiititaliaata nunatta karsiata 2025-mut naatsorsuutai pillugit isumaliutissiissutaani allassimavoq. 

Taassuma saniatigut KNQK USA-p Nuummi konsulia aqqutigalugu, aningaasanik tapiiffigineqarsimasoq, Mikkel Jeremiassen, Sermitsiamut siorna marsi naalersoq uppernarsaavoq. Kattuffilli qanoq aningaasannassimatiginera taassuma taamani oqaatigiumanngilaa.  

- Isumaqatigiissut malillugu oqaatigisinnaanngilakka, kisianni annertulaarput, Mikkel Jeremiassen oqarpoq.

Aningaasat taakkua USA-mit tunissutit kattuffimmut annaassisuusut, Qimusseq Sisimiut maanna allappoq.

- Kattuffik aningaasatigut aqutsinerlulluni annakannajaaleruttortoq amerikkamiut tapiineratigut ingerlallualerpoq, Qimusseq Sisimiut allappoq.

Nassuiaateqarnissamik Facebookkikkut neriorsuisoq

Kattuffik Naalakkersuisunit, Inatsisartunut ilaasortanit inunnillu tamat oqallittarfiini oqallisaaqaat. Taamaakkaluartoq ulluni arlaqalersuni sunnguamik nalunaaruteqarneq ajorpoq. Tamannali maanna allanngulersoq KNQK-p siulittaasua neriorsuivoq. 

Mikkel Jeremiassen Facebookkimi tallimanngornermi ilaatigut ima allappoq.

- Ajunngilanga, ippassarli pisut soorunalimi malinnaaffingaakka. 

- Maanna nassuiaatissaq piareersarneqarpoq, kingusinnerpaamik aqagu KNQK-p FB-mi qupperneratigut nassuiaat saqqummiutissuarput, kattuffiup siulittaasua allappoq.

Kattuffiup nassuiaataa allaaserisap suliarineqarnerani suli saqqummersinneqanngilaq.